Զախարովան՝ Երևանում վանդալիզմի մասին. Ռուսաստանի և Հայաստանի համար ընդհանուր պատմությունը ոչ մեկին չի հաջողվի վերաշարադրել

Արմինֆո.Խստորեն դատապարտում ենք Երևանում պաշարված Լենինգրադի երեխաների հուշարձանի մոտ հունվարի 29-ին կատարված վանդալիզմի ակտը: Այդ մասին ասվում է Ռուսաստանի ԱԳՆ պաշտոնական ներկայացուցիչ Մարիա Զախարովայի մեկնաբանությունում ՝ կապված Երևանում նշված հուշարձանի պղծման հետ։

"Խոր ցավով նշում ենք, որ սա Ռուսաստանի և Հայաստանի համար ընդհանուր պատմության հերոսական էջերին նվիրված հուշարձանների պղծման առաջին դեպքը չէ։ Տեսնում ենք բարեկամ հայ ժողովրդի կողմից տեղի ունեցածը չընդունելու սուր արձագանքը ։ Նույնը ակնկալում ենք նաև հանրապետության իշխանություններից, ինչպես նաև՝ այսուհետ կանխելու բարբարոսության նման դրսևորումները",- ընդգծել է ռուս դիվանագետը։

Ընդ որում, նա համոզմունք է հայտնել, որ նման արարքներին նպաստում է հանրապետությունում եւ Հարավային Կովկասում Ռուսաստանի դերի սեւացմանն ուղղված հրապարակային արշավը: "Պաշարման ժամանակ զոհված 1 մլն 384 հազար լենինգրադցիների լուսավոր հիշատակի ծաղր թույլ չենք տա։

Ակնհայտ հանցագործության կապակցությամբ մենք համագործակցում ենք պրոֆիլային դաշնային գերատեսչությունների, այդ թվում ՝ Ռուսաստանի Դաշնության Քննչական կոմիտեի հետ, որը քրեական գործ է հարուցել վանդալիզմի այս ակտի փաստի առթիվ: Երեւանում գիտության եւ մշակույթի ռուսական կենտրոնի տնօրենը պաշտոնական դիմում է հղել ՀՀ Գլխավոր դատախազություն: Ֆիքսել են, որ հունվարի 30 - ի երեկոյան հայկական իրավասու մարմինները քրեական գործավարություն են նախաձեռնել", - հավելել է Զախարովան։ Միաժամանակ, նա շնորհակալություն է հայտնել Հայաստանի ոչ անտարբեր քաղաքացիներին, ովքեր սրտի կանչով հունվարի 30-ին վերականգնել են արդարությունը՝ քանդվածների փոխարեն նոր ծաղկեպսակներ դնելով հուշակոթողին, ինչպես նաև՝ պաշարման ամեն օր խորհրդանշող մեկական մեխակ: "Ռուսաստանի և Հայաստանի համար ընդհանուր պատմությունը ոչ մեկին չի հաջողվի վերաշարադրել։ Հիտլերյան Գերմանիայի դեմ մեր երկրների ժողովուրդների, այդ թվում ՝ ռուսների և հայերի համատեղ պայքարի և նացիզմի դեմ նրանց հաղթանակի հիշատակը միշտ վառ կմնա մեր սրտերում", - ամփոփել է ՌԴ ԱԳՆ ներկայացուցիչը ։

Ավելի վաղ սոցիալական ցանցերում Սամվել Շիրինյան ներկայացած ոմն քաղաքացի տապալել էր հուշարձանին դրված ծաղկեպսակներն ու տրորել ռուսական եռագույնի գույներով ժապավենը ՝ իր գործողությունները տեսանկարահանելով ու հրապարակելով: Գրառման մեջ տղամարդը դժգոհություն է հայտնում ՌԴ ԱԳՆ պաշտոնական ներկայացուցիչ Մարիա Զախարովայի խոսքերից, ով ճեպազրույցի ընթացքում, անդրադառնալով Արցախում էթնիկ զտումների մասին հայտարարություններին, առաջարկել է հղում տրամադրել որևէ միջազգային կազմակերպության, օրինակ ՝ ՄԱԿ - ի փաստաթղթին կամ հայտարարությանը, որը վկայում է, որ նման էթնիկ զտումներ եղել են: