Արմինֆո. 2023թ. Ուկրաինայի օգնության հիմնադրամը՝ Dopomoga.am, որը ստեղծվել է Երևանում 2022 թվականին՝ Հայաստանում ապաստան հայցող Ուկրաինայից փախստականներին աջակցելու նպատակով, ընդհանուր առմամբ, օգնություն է ցուցաբերել ավելի քան 6 հազար մարդու։ Անցած տարին կազմակերպության համար առանձնացավ նրանով, որ հիմնադրամի շահառու դարձան ոչ միայն ուկրաինացի փախստականները, այլև հայտնի ցավալի իրադարձություններից հետո Արցախից Հայաստան բռնի տեղահանված աանձինք:
ԱրմԻնֆո-ի թղթակցի հետ զրույցում կազմակերպության նախագահ Ելենա Շևչուկը նշել է, որ հիմնադրամը, պարզապես, մարդասիրական օգնության տրամադրման կենտրոն չէ: Այսօր կազմակերպությունը ինտեգրացիոն կենտրոն է, որտեղ տեղի են ունենում հանդիպումներ, տարբեր միջոցառումներ, լեզուների ուսուցման դասընթացներ և այլն: Ընդհանուր առմամբ, նրա ասելով, 2023 թվականին անցկացվել է ավելի քան 600 միջոցառում, որոնց մասնակցել է շուրջ 7 հազար մարդ:
Ինչպես նշել է Շևչուկը, ուկրաինացի փախստականների թիվը տարվա ընթացքում գրեթե չի փոխվել, քանի որ ոմանք գալիս են, մյուսները՝ մեկնում: Հայաստանը, ըստ հիմնադրամի ղեկավարի, հիմնականում, ընտրում են էթնիկ հայերն ու նրանց ընտանիքի անդամները։ «Ինձ՝ անձամբ, տպավորում են կյանքի պատմությունները, երբ հայերը 90-ականների սկզբին ջարդերի ժամանակ Արցախից և Բաքվից փախան Ուկրաինա, այսինքն, նրանք արդեն փախստական էին և հիմա նորից ստիպված էին փախչել: Դա ողբերգություն է», - ասել է նա:
«Դոպոմոգա» հիմնադրամը միացել է արցախցիներին օգնելու նախաձեռնություններին՝ քաղաքացիների բռնի տեղահանման սկզբից (2023թ. սեպտեմբերից): Ընդհանուր առմամբ, մթերային փաթեթներ, հագուստ, անկողնային պարագաներ, ծածկոցներ են ստացել շուրջ 2000 արցախցիներ: Բացի այդ, շտաբին հաջողվել է ավելի քան 30 արցախցիների օգնել կացարանների հարցում։ «Մենք նրանց մի քանի անգամ մթերք ենք տարել, իսկ Ամանորին յուրաքանչյուր ընտանիքի տրվել են տոնական պարենի հավաքածուներ, երեխաներին ՝ նվերներ։ Բայց մեր աշխատանքը միայն նվերները չեն, մենք միշտ հարցնում ենք խնդիրների մասին և փորձում լուծել դրանք, խորհուրդ ենք տալիս և ուղղորդում», - ասել է նա:
Նոյեմբերից արցախցիներին օգնություն ցուցաբերելու նպատակով Ուկրաինական հիմնադրամին են միացել, բացի Հայաստանի ոչ անտարբեր քաղաքացիներից, Ուկրաինայի հայերի միությունը, Հայաստանի Զապորոժիեի համայնքը և Դնեպրի հայերի շտաբը։ Վերջինս ստեղծվել է Ուկրաինայում պատերազմի սկզբից՝ կարիքավորներին օգնելու համար։
Ուշագրավ է, որ կազմակերպությունը համագործակցում է նաև ՄԱԿ Փախստականների հարցերով գերագույն հանձնակատարի գրասենյակի հետ՝ ուկրաինացի փախստականների, իսկ 2023 թվականի սեպտեմբերից ՝ Արցախից փախստականների հետ կապված հարցերը լուծելու համար։ Շևչուկը նշել է, որ, ընդհանուր առմամբ, ՄԱԿ ՓՀԳ-ի հետ համագործակցությունը մշտական է: Մասնավորապես, տարեկան երկու անգամ հիմնադրամը փոքր օգնություն է ստացել իր գրասենյակի շելթերի համար նախատեսված սարքերի տեսքով, որտեղ այսօր ապրում են Ուկրաինայից փախստականները, որոնք հայտնվել են դժվարին կացության մեջ:
Խոսելով 2024 թվականի ծրագրերի մասին՝ Ելենա Շևչուկը նշել է. «Ընթացիկ տարում մենք նախատեսում ենք գործարկել սոցիալական բիզնես, որպեսզի հասույթն օգտագործենք կազմակերպության գործունեության համար: Եվ մենք արդեն ունենք որոշակի գաղափարներ»: Միաժամանակ, նա ընդգծել է, որ ծրագրում են դուրս գալ միջազգային համագործակցության, մասնակցել դրամաշնորհային ծրագրերին՝ հետագա արդյունավետ աշխատանքի համար:
Նշենք, որ հիմնադրամն ակտիվորեն լուսաբանում է իր գործունեությունը սոցիալական ցանցերում, մասնավորապես, անհրաժեշտ տեղեկատվությունը կարելի է գտնել «Ֆեյսբուքում»
( https://www.facebook.com/groups/1125045808339463/), «Ինսթագրամում» (https://www.instagram.com/dopomoga_am/), թելլեգրամյան ալիքում (https://t.me/dopomoga_am) և այլն:
Հիշեցնենք, որ օգնության Dopomoga.am հիմնադրամը (<dopomoga >՝ ուկրաիներեն "օգնություն" - խմբ.) ստեղծվել է Ուկրաինայում ռազմական գործողությունների սկզբից և գործում է Երևանում՝ Խանջյան 35 հասցեում։