Արման Թաթոյանը Հ1-ին մեղադրել է հայ ժողովրդի ազգային ինքնության, Հայոց պետականության բարոյական հիմքերի դեմ ոտնձգության համար

Արմինֆո. Ամենայն Հայոց Կաթողիկոսի ամանորյա ուղերձը Հ1-ով հեռարձակելուց Հանրային հեռուստաընկերության հրաժարվելը քաղաքական բարձրագույն մակարդակի ողորմելի որոշում էր: Այդ մասին ասվում է "Թաթոյան" հիմնադրամի ղեկավար, ՀՀ նախկին օմբուդսմեն Արման Թաթոյանի հայտարարության մեջ:

«Հայաստանի Հանրապետության ստեղծումից ի վեր` Վազգեն Վեհափառից սկսած, բոլոր կաթողիկոսների ամանորյա ուղերձները կեսգիշերից առաջ հեռարձակվել են Հանրային հեռուստատեսությամբ, ինչը մշտապես յուրահատուկ հոգևոր խորհուրդ է ունեցել ամբողջ աշխարհի հայերի համար:

Այս ամոթալի որոշումից հետո էլ Կառավարության ղեկավարի ընտանիքին պատկանող լրատվամիջոցով տարածվում են Մայր Աթոռին ու Վեհափառ Տիրոջը զրպարտող ու վարկաբեկող տեղեկություններ: Այդ տեղեկությունները բացարձակ սուտ են:

Այնպես որ Մայր Աթոռը ճիշտ որոշում է կայացրել և չի ընդունել Հ1-ի դիտավորյալ նսեմացնող առաջարկը։ Ու հիմա էլ առանց ամոթի մանիպուլյատիվ մեկնաբանություններ են անում ընդդեմ Մայր Աթոռի:

Սա ոտնձգություն է հայ ժողովրդի արժեքների և մեր ազգային ինքնության, Հայոց պետականության բարոյական հիմքերի դեմ: Այն անարգանք է մեր պատմության նկատմամբ: Այս կերպ քաղաքական փորձ է արվում նսեմացնել Հայաստանյայց Առաքելական Սուրբ Եկեղեցու բացառիկ դերը և պատմական բացառիկ արժեքը հայ ժողովրդի կյանքում։ Հանրային հեռուստաընկերությունը ևս մեկ անգամ հաստատեց իշխանության քարոզիչ լինելու իր ամոթալի «առաքելությունը», - ասվում է հայտարարությունում:

Նշենք, որ դեկտեմբերի 31-ին Ամանորից մեկ ժամ առաջ հայտնի դարձավ, որ անկախ Հայաստանի պատմության մեջ առաջին անգամ Հ1-ով չի հեռարձակվելու Ամենայն հայոց կաթողիկոս Գարեգին Բ-ի ազգին ուղղված ամանորյա ուղերձը: Այդ մասին հայտնի դարձավ Մայր Աթոռի հայտարարությունից։

"Անկախության պատմության ողջ ընթացքում, դեռևս Վազգեն Ա Հայրապետի ժամանակաշրջանից, ավանդաբար Հանրային հեռուստաընկերության եթերով Ամանորի գիշերը երկրի ղեկավարի ուղերձից անմիջապես առաջ հեռարձակվում էր Ազգիս Վեհափառ Հայրապետի ուղերձը։ Այս տարի Հանրային հեռուստաընկերությունը, վերջին պահին, առանց որևէ պատճառաբանության տեղեկացրեց, որ Վեհափառ Հայրապետի ամանորյա ուղերձը եթեր չի հեռարձակվի կեսգիշերից առաջ, ինչպես և ավանդաբար ընդունված էր։ Փոխարենն առաջարկվեց Ամենայն Հայոց Հայրապետի ուղերձը ներկայացնել Լուրերի երեկոյան թողարկման ընթացքում, ինչը Մայր Աթոռի կողմից պատշաճ չնկատվեց և մերժվեց։ Մնացած բոլոր մեղադրանքներն ու վերագրումները հերյուրանք են, իսկ նման որոշման պատճառների վերաբերյալ հարկ է դիմել Հանրային հեռուստաընկերությանը", - հաղորդեցին Մայր Աթոռից:

Ներսես քահանա Խանանյանը, մեկնաբանելով իշխանությունների այդ որոշումը, ենթադրել է, որ Կաթողիկոսի ելույթը չեղարկվել է դրա բովանդակության պատճառով: "2024 թվականի առաջին օրը սկսեցի Հայաստանի ղեկավարության շնորհավորական ուղերձները դիտելով։ ՀՀ-ում առաջին ալիքը երեք ելույթ է ցուցադրել համայն հայությանը։ Մոտ 7-8 րոպե տևեցին ՀՀ ԱԺ նախագահ Ալեն Սիմոնյանի և ՀՀ նախագահ Վահագն Խաչատրյանի ուղերձները: Մնացած ժամանակ խոսում էր Փաշինյանը։ Երեք ելույթները կապում է մեկ ուղերձ, որը տարբեր ձևաչափերով հասցվում է Հայաստանի քաղաքացիներին. "մենք պետք է հասնենք խաղաղության և նորմալ հարաբերություններ հաստատենք մեր բոլոր հարևանների հետ": Փաշինյանը մոտ երեք րոպե խոսեց հարկեր վճարելու կարևորության մասին և ամփոփեց. "Սիրում ես հայրենիքը՝ վճարիր հարկերը. ձեր հարկերի շնորհիվ կարողացանք օգնել Արցախից տեղահանվածներին": Հետո վարչապետը խոսում է այն մասին, որ բոլոր պետական աշխատողների աշխատավարձերը բարձրացրել են ու դեռ բարձրացնելու են։ Եվ հանկարծ դեմքի տխուր արտահայտությամբ նա սկսում է ներողություն խնդրել բոլորից և, նույնիսկ, Լեռնային Ղարաբաղից տեղահանվածներից ։ Բայց պետք չէ ուրախանալ ։ Որպես խոսամոլության իսկական վարպետ, նա, ներողություն խնդրելով, իրականում ներողություն չի խնդրում))

"Ես տեղահանվածներից ներողություն եմ խնդրում ոչ թե նրա համար, որ նրանց նկատմամբ որևէ հանցանք եմ գործել կամ մոռացել եմ ձեր հանդեպ ունեցած պարտավորությունների մասին, այլ, որովհետև գիտեմ ձեր ցավը և նաև այն վերապրում եմ", - ասել է Փաշինյանը:

Ամենայն հայոց կաթողիկոսի ելույթը արդի անկախ Հայաստանի ավելի քան 30 տարվա ընթացքում առաջին անգամ եթեր չհեռարձակվեց: Երեկ մեր եղբայր Ավետիք Հարությունյանն արդեն նշել է այդ միջադեպի ակնհայտ պատճառը, և ես լիովին համաձայն եմ նրա հետ ։ Վեհափառի խոսքը միակն էր, որում ասվում էր, որ Արցախի թեման մեզ համար փակ չէ։ Ես չծուլացա և դիտեցի նաև այն հարևանների նախագահի ելույթը, որոնց հետ մենք պետք է խաղաղություն ունենանք։ Ալիևը խոսում էր 16 րոպե, որոնցից 14-ը՝ Արցախի, ռազմական հաջողությունների, նոր ժամանակակից զենքի ձեռք բերման, Արևելյան Զանգեզուրում լայնածավալ շինարարության մասին։ "Ծնկի բերեցինք", "պատմության աղբանոցը գցեցինք", "ահաբեկիչներ", "անջատողականներ". սրանք Արցախից տեղահանված հայերի հասցեին հնչած արտահայտությունների մի մասն են: "Հայաստանի ղեկավարությունը պետք է իրեն այնպես պահի, որ մեր զայրույթը չառաջացնի", - եզրափակել է հարևանը", - գրել է Սրբազան հայրը: