Ղազախստանն օգնության համար դիմել էր ոչ թե Ռուսաստանին, այլ՝ ՀԱՊԿ-ին.  Տոկաևը՝ 2022 թվականի հունվարի իրադարձությունների մասին

Արմինֆո. Քաոսի և տարածաշրջաններում փաստացի անիշխանության պայմաններում Անվտանգության խորհրդի նիստում որոշում էր կայացվել դիմել ՀԱՊԿ-ին՝ կայունության և անվտանգության ապահովման համար խաղաղապահ զորախումբ մտցնել Ղազախստան՝ անհրաժեշտ ժամկետով: Այդ մասին Egemen Qazaqstan թերթի հարցազրույցում ասել է Ղազախստանի նախագահ Կասիմ-Ժոմարտ Տոկաևը՝ ի պատասխան այն հարցի, թե որքանով էր ճիշտ 2022 թվականի հունվարին Ռուսաստանի զինծառայողներին Ղազախստան հրավիրելու որոշումը, քանի որ Մոսկվայում շատ են խոսում Ղազախստանի անկարգությունների ժամանակ իրենց փրկարար դերի մասին։

Այս առումով՝ Տոկաևը հարկ է համարել ընդգծել, որ դիմումը եղել է ոչ թե Ռուսաստանին, այլ՝ ՀԱՊԿ-ին, որի անդամ է նաև Ղազախստանը։ "Դիմելու պահին կազմակերպության նախագահը Հայաստանն էր, իսկ այս տարի նախագահությունը ստանձնեց Ղազախստանը։ ՀԱՊԿ զորակազմն իսկապես խաղաղապահ և զսպող գործոնի դեր խաղաց այն ողբերգական օրերի վակխանալիայում։ Կազմակերպության անդամ երկրների հետ պայմանավորվածության համաձայն, զորախումբը լքեց երկիրը՝ առանց որևէ նախապայմանի, այն էլ ՝ ժամանակից շուտ",- հավելել է ՂՀ նախագահը ։

Միևնույն ժամանակ, նա ուշադրություն է հրավիրել այն փաստի վրա, որ ՀԱՊԿ խաղաղապահ զորակազմը չի մասնակցել հակաահաբեկչական գործողությանը և ոչ մի կրակոց չի արձակել: "Հայկական զորախումբը հսկում էր "Ակսայ" քաղաքային ջրատարը և հացի կոմբինատը, բելառուսականը՝ օդանավակայանը Ժետիգենում, տաջիկականը և ղրղզականը՝ համապատասխանաբար, Ալմաթի քաղաքի ՋԷԿ-1-ը և ՋԷԿ-2-ը, ռուսականը՝ ՋԷԿ-3-ը և հեռահաղորդակցության օբյեկտները։ Եղել են կենսապահովման օբյեկտներում ահաբեկչություններ իրականացնելու սպառնալիքներ, այդ իսկ պատճառով զորակազմն ուղարկվել էր հենց այնտեղ։ Բայց, ամենակարևորը,  դա թույլ տվեց ազատել մեր ուժերը հակաահաբեկչական գործողություն իրականացնելու համար", - ամփոփել է Ղազախստանի նախագահը։

Հիշեցնենք, որ 2022 թվականի հունվարի 2-ին Ղազախստանում բողոքի ցույցեր էին սկսվել՝ գազի գնի բարձրացման պատճառով, սակայն շուտով վերաճել էին հակակառավարական ցույցերի ողջ երկրում։ Այդ մի քանի օրերը երկրի պատմության մեջ մտան որպես "Qandy Qantar" ՝ արյունոտ հունվար։ Այն ժամանակ, միայն պաշտոնական տվյալներով, զոհվեց ավելի քան 200 մարդ։ Բողոքի ակցիաները սկսվել էին Ղազախստանի արևմուտքում գազ արդյունահանող Ժանաոզեն քաղաքում, սակայն հունվարի 3-4-ը տարածվել էին Ալմաթիում և երկրի այլ քաղաքներում: Հունվարի 4-5-ը Ալմաթիում բողոքի ցույցերը վերաճել էին զանգվածային անկարգությունների, այդ թվում՝ կառավարական շենքերի հրկիզման և թալանի, իսկ իշխանությունները կորցրել էր քաղաքի նկատմամբ վերահսկողությունը. Հրկիզվել էին նախագահի նախկին նստավայրը և ակիմատը (քաղաքապետարանը), ցուցարարները գրավել էին Ալմաթիի օդանավակայանը: Մյուս քաղաքների մեծ մասում, այդ թվում՝ Ղազախստանի մայրաքաղաքում, իշխանությունները պահպանել են վերահսկողությունը։ Ղազախստանում արտակարգ դրություն էր հայտարարվել: Հունվարի 6-ին Ղազախստանի նախագահի խնդրանքով հայտարարվել էր ՀԱՊԿ գործողություն Ղազախստանում, որը ներառում էր Ռուսաստանի և մյուս 5 երկրների զինված ուժերը, և հայտարարվել էր որպես խաղաղապահ առաքելություն ՝ կարևոր օբյեկտների պաշտպանության և իրավակարգի պահպանման գործում օգնելու համար: Հայտարարվել էր հակաահաբեկչական գործողության ռեժիմ, սկսվել էին քաղաքների մաքրումները ցուցարարներից։ Հունվարի 7-ին Ղազախստանի իշխանությունները հայղրդել էին երկրում կարգուկանոնի վերականգնման մասին։