Հայաստանի ԶՈՒ գնդապետ. Արժանապատիվ խաղաղությունը բոլորիս նպատակն է

Արմինֆո. Արժանապատիվ խաղաղությունը բոլորիս նպատակն է։ Այդ մասին հայտարարել է N զորամասի հրամանատար, գնդապետ Վահան Սարգսյանը՝ ՀՀ պաշտպանության նախարարության կողմից երկրի հյուսիս-արևելյան սահմանագոտի ԶԼՄ-ների համար կազմակերպված այցի ժամանակ։

Սարգսյանը հաղորդել է, որ իրավիճակն առաջնագծում համեմատաբար կայուն է, գործնականում, կրակոցներ չեն լինում, ինչպես նաեւ թիրախային կրակ չկա:

Անդրադառնալով ճշգրտող հարցին՝ թե արդյոք պատերազմն ավարտվել է զինվորականների համար, գնդապետը նշե, է, որ զինծառայողը միշտ պետք է պատրաստ լինի պատերազմի: Այս համատեքստում նա նշել է, որ հայկական կողմը միշտ պատրաստ է կանխել ցանկացած սադրանք, և զինծառայողների մարտական ոգին բարձր է:

"Անձնակազմի մարտական ոգին բարձր է։ Ես, նույնիսկ, կասեի, որ թե շարքային զինծառայողների, թե սպայական կազմի շրջանում վերջին պատերազմից հետո մարտական ոգին բարձրացել է, ինչը պայմանավորված է մի շարք գործոններով։ Օրինակ, այն բանով, որ բոլորն ունեն պատերազմի ընթացքում զոհված հարազատներ։ Ես զգում եմ, որ անձնակազմի շրջանում ծառայության նկատմամբ մոտեցումն ավելի գիտակցված է դարձել", - նշել է սպան, պարզաբանելով, որ զգացվում է, որ յուրաքանչյուրը, զինվորական համազգեստ հագնելով, ձգտում է իր առջև դրված խնդիրը լիարժեք կատարել, այդ թվում ՝ արժանապատիվ խաղաղության հաստատմանն ուղղված։

Այցի ընթացքում լրագրողները ծանոթացել են առաջնագծում տիրող իրավիճակին, իրականացվող ամրաշինական աշխատանքներին, մարտական դիրքերում զինծառայողների կենցաղային պայմաններին, թիկունքում իրականացվող աշխատանքներին, զինծառայողների առօրյային:

Սարգսյանը, ոչ առանց հպարտության, ցույց է տվել իր ենթակա մարտական դիրքերի կահավորումը, նշելով, որ իր զինծառայողները միշտ տաք ցնցուղ ընդունելու հնարավորություն ունեն, լոգասենյակը հագեցած է դրա համար անհրաժեշտ բոլոր պայմաններով, դիրքերում շուրջօրյա առկա է ջեռուցում և լուսավորություն: Նրա խոսքով ՝ դիրքերին հոսանք է մատակարարվել, տեղադրվել են արևային վահանակներ և գեներատորներ, ուստի, իր անձնակազմը միշտ ապահովված է էլեկտրաէներգիայով։ Դիրքերը սարքավորված են այնպես, որ առավելագույնս պաշտպանեն երկրի սահմանները պաշտպանող զինվորականների կյանքը։

"Բոլոր կրակակետերը պաշտպանված են, մեր զինվորների կյանքն ապահով է", - ասել է գնդապետը ՝ ցույց տալով խրամատները: Միաժամանակ, նա ընդգծել է, որ զորքերը պատրաստ են կատարել իրենց առջև դրված ցանկացած խնդիր։

Խոսելով անցնող տարվա մասին՝ նա նշել է, որ, ընդհանուր առմամբ, իր ենթակայության տակ գտնվող տարածքում եղել է առանց միջադեպերի: "Մեր կողմից արվում է ամեն ինչ, որպեսզի ամենօրյա ռեժիմով ապահովենք մեր զորքերի անվտանգությունը  Բարձր մակարդակի վրա են գտնվում հրամանատարության և անձնակազմի միջև փոխհարաբերությունները ։ Նվազագույնի են հասցվել ոչ կանոնադրական հարաբերություններին առնչվող միջադեպերը", - նշել է բարձրաստիճան սպան։

Բերդ քաղաքից պայմանագրային զինծառայող, 32-ամյա սերժանտ Պապյանը, ում հետ հաջողվել է զրուցել մարտական դիրքերից մեկում, նշել է, որ արդեն 5 տարի  կանգնած է պետական սահմանների պաշտպանության համար: Նրա խոսքով ՝ իրեն դուր է գալիս ռազմական գործը, և այդ պատճառով էլ որոշել է անդամագրվել ՀՀ ԶՈՒ-ին։ Պայմանագրային զինծառայողը պատմել է, որ մինչ այդ զբաղվել է սպորտով ՝ ըմբշամարտով ։ "Ես եկել եմ բանակ, քանի որ ինձ դուր է գալիս ռազմական գործը ։ Ինձ համար մեծ պատիվ է օգտակար լինել իմ երկրին", - նշել է զինծառայողը, հավելելով, որ պատրաստ է կատարել իր առջև դրված ցանկացած խնդիր, իսկ երկրին ու հայ ժողովրդին նոր տարում մաղթում է բարգավաճում և արժանապատիվ խաղաղություն:

Այնուհետև հրամանատարը պատմել է անձնակազմի ատեստավորման մասին ։ Այդ առումով Սարգսյանը ծրագիրը շատ հաջողված է համարել։ "Ծրագիրը թույլ է տալիս բարձրացնել ինչպես երկրի զինված ուժերի մարտունակությունը, այնպես էլ անձնակազմի սոցիալական վիճակը ։ Ծրագրին մասնակցել ցանկացողները բավականին շատ են, հատկապես պայմանագրային զինծառայողների շրջանում ։ Հավաստագրումը բավականին հաջող է ընթանում։ Բնականաբար, ամեն ինչ կախված է անձից ' նրա ֆիզիկական եւ մտավոր ունակություններից, իր վրա աշխատելու պատրաստակամությունից", - ասել է գնդապետը։ Ճշգրտող հարցին, թե՝ ինքն անձամբ ատեստավորում անցել է, Սարգսյանը հաղորդել է, որ հայտ է ներկայացրել և այն կանցնի փետրվարին ՝ ըստ ժամանակացույցի։

Սպայի խոսքով,  ընդհանուր առմամբ, ատեստավորման արդյունքները դրական են, "գերազանց" - ն այնքան էլ շատ չէ, ընդհանուր առմամբ, բոլորը հանձնում են "լավ" և "բավարար": "Նրանք, ովքեր բավարար են հանձնում, արդեն դիմում են վերաատեստավորման համար՝ ավելի բարձր գնահատականներ ստանալու նպատակով", - հավելել է զինվորականը:

Իր հերթին՝ արդեն ատեստավորում անցած կապիտան Արման Առաքելյանը նշել է, որ իր համար ոչ մի բարդ բան չի եղել այդ գործընթացն անցնելու մեջ: "Ընդհանուր առմամբ, ատեստավորման ծրագրում ներառվել է այն ամենը, ինչ կա մեր ուսումնական ծրագրում։ Սա վերաբերում է բոլոր առարկաներին. հրաձգություն, ֆիզիկական պատրաստություն, մասնագիտական հմտությունների մշակում: Ատեստավորումը հնարավորություն է գործնականում ստուգելու ձեր գիտելիքները: Ատեստավորման ընթացքում ես որևէ կողմնակալություն չեմ նկատել", - նշել է կապիտանը, համոզմունք հայտնելով, որ ՀՀ ԶՈՒ-ում ծառայողների համար որևէ դժվարություն չի ներկայացնի անցնել այն։

Հարցին, թե ինչ գնահատական է ստացել, Առաքելյանը հաղորդել է՝ գերազանց: "Դա թույլ է տալիս, մի կողմից, գնահատել սեփական գիտելիքները, բարձրացնել ֆիզիկական պատրաստվածությունը, միաժամանակ բարելավել նաև սոցիալական վիճակը", - ամփոփել է սպան:

Այցի ընթացքում հնարավոր է եղել զրուցել նաև ատեստավորում անցած բերդցի պայմանագրային զինծառայող, ենթասպա Մխիթար Խաչատրյանի հետ, ով իր կյանքի 25 տարիները նվիրել է Հայրենիքին ծառայելուն: Ինչպես պատմել է ենթասպան, նա սկսել է ուսումնասիրել ատեստավորման պայմանները, հենց որ ՀՀ ԶՈՒ-ում սկսել են ներդնել այդ համակարգը ։ "Ոչ մի նոր բան չի եղել։ Այն ամենը, ինչի մենք բախվում ենք մեր ամենօրյա ծառայության մեջ: Յուրաքանչյուր զինծառայող պետք է կատարի իր առջև դրված խնդիրները: Հավաստագրման և գործնական, և տեսական մասը ներառում է այն ամենը, ինչին բախվում ենք մեր առօրյա կյանքում: Ոչ մի նոր բան: Մեզանից յուրաքանչյուրը առավելագույն ջանքեր է գործադրել ատեստավորումն անցնելու համար։ Ես ստացել եմ չորս", - նշել է նա։

Խոսելով բանակում ծառայության մասին՝ նա նշել է, որ իր կյանքը նվիրել է Հայրենիքին ծառայելուն ։ "Ես եկել եմ Զինված ուժեր, քանի որ վստահ եմ, որ ինձնից լավ ոչ ոք չի կարող ապահովել իմ հայրենիքի սահմանների պաշտպանությունը։ Առավել ևս, որ ես ծնվել եմ սահմանամերձ տարածքում։ Իհարկե, սահմանը պատկանում է բոլորիս, բայց ես որոշեցի, որ ինձնից լավ ոչ ոք չի պաշտպանի իմ տունը։ Ես 20 տարի եմ տվել ԶՈՒ-ում ծառայելուն։ Սակայն 44-օրյա պատերազմից հետո որոշեցի, որ դեռ շատ բան ունեմ տալու հայրենիքիս, և պայմանագիրը երկարաձգեցի ևս 5 տարով։ Եւ հիմա էլ կրտսեր որդիս ժամկետային ծառայություն է անցնում զինված ուժերում", - նշել է նա, հավելելով, որ բոլորովին վերջերս ավագ որդին ավարտել է ժամկետային ծառայությունն ու զորացրվել։

Ճշգրրտող հարցին, թե՝ ինչ է կարծում, արդյոք իր որդիները կգնան իր հետքերով, Խաչատրյանը խոստովանել է, որ իրենք այլ ճանապարհ են ընտրել: "Հայրենիքի պաշտպանությունը միայն զինվորական ծառայության մեջ չէ, կան նաև այլ ոլորտներ, որոնք թույլ են տալիս զարգացնել մեր երկիրը ։ Նրանք այլ ճանապարհ են ընտրել", - եզրափակել է Խաչատրյանը։

Խոսելով նոր ՝ 2024 թվականի մաղթանքների մասին՝ զինվորականներից յուրաքանչյուրը երկրին մաղթել է արժանապատիվ խաղաղություն, բարգավաճում և զարգացում: