Beeline-ի Կապի թանգարանը միանում է «Թանգարանների գիշեր» ակցիային

 Beeline ընկերությունը տեղեկացնում է, որ միանում է Թանգարանների օրվան  նվիրված ամենամյա միջազգային ակցիային: Ինչպես Արմինֆո գործակալությանը տեղեկացվել է Ընկերության մամուլի ծառայությունից, մայիսի 16-ին և 18-ին Beeline Կապի թանգարանի դռները բաց կլինեն այցելուների առջև. մայիսի 16-ին ժամը 18։00–ից մինչև 24։00–ն և մայիսի 18-ին՝ 10։00-ից մինչև 18։00–ն։

«Այս տարի Թանգարանների օրվա ամենամյա միջազգային ակցիան Հայաստանում նվիրված է Ցեղասպանության 100-րդ տարելիցին և կանցկացվի «Թանգարանները որպես հիշատակի վկաներ» խորագրով: Beeline-ը միանում է «Թանգարանների գիշեր» ամենամյա միջոցառմանը  և հրավիրում է բոլոր ցանկացողներին այցելելու Կապի թանգարան, որտեղ ներկայացված են  հայ կապավորների և հեռահաղորդակցության զարգացման պատմությունը», - նշեց Հայաստանում Beeline-ի Գլխավոր տնօրեն Անդրեյ Պյատախինը։

Կապի թանգարանում ներկայացված են հեռախոսային կապի և ընկերության զարգացման պատմությանը վերաբերող նյութեր, ինչպես նաև երկրում ներդրված կապի ժամանակակից տեխնոլոգիաների ցուցանմուշներ: Թանգարանում ներկայացված ցուցանմուշները հնարավորություն են ընձեռում այցելուներին ծանոթանալ XX-րդ դարից սկսած մինչև  ժամանակակից թվային ֆիքսված, բջջային և ինտերնետ կապի սարքավորումներին: Կապի թանգարանը գործում է Ազատություն 24/1 հասցեում։

«Թանգարանների գիշեր»  միջազգային ակցիայի հիմնական նպատակն է երիտասարդությանը թանգարաններ ներգրավելով՝ ներկայացնել ժամանակակից թանգարանների ռեսուրսն ու ներուժը: Առաջին անգամ «Թանգարանների գիշեր» ակցիան կայացել է Բեռլինում 1997 թվականին, իսկ 2009 թվականին այս միջոցառմանը մասնակցել են արդեն 2300 Եվրոպական թանգարան:

Հայաստանը  «Թանգարանների գիշեր» ակցիային միացել է 2005 թվականին: Այդ ժամանակ ակցիային մասնակցել են հայկական 9 թանգարան: Անցյալ տարի այս ամենամյա միջոցառմանը  մասնակցել են Հայաստանի և ԼՂՀ արդեն 100  թանգարան:

Նշենք, որ «ԱրմենՏել» ՓԲԸ-ն (Beeline ապրանքանիշ) հանդիսանում է «ՎիմպելԿոմ» ընկերությունների խմբի մի մասը: «ՎիմպելԿոմ»-ը հանդիսանում է աշխարհի խոշորագույն ինտեգրված օպերատորներից մեկը, որը գործում է աշխարհի 14 երկրում, իսկ գլխամասային գրասենյակը գտնվում է Ամստերդամում: Ընկերությունների խումբն ընդգրկում է մի շարք հեռահաղորդակցության ընկերություններ, որոնք մատուցում են ինչպես անլար և ամրակցված կապի տեխնոլոգիաների լայն շրջանակի վրա հիմնված ձայնային կապի ու տվյալների հաղորդման, այնպես էլ լայնաշերտ ինտերնետ հասանելիության ծառայություններ Ռուսաստանում, Ուկրաինայում, Ղազախստանում, Ուզբեկստանում, Տաջիկստանում, Հայաստանում, Վրաստանում, Ղրղզստանում, Լաոսում, Ալժիրում, Բանգլադեշում, Պակիստանում, Զիմբաբվեում, Իտալիայում: «ՎիմպելԿոմ»-ը ծառայություններ է մատուցում ամբողջ աշխարհում` շուրջ 740 մլն. ընդհանուր բնակչությամբ տարածքներում: «ՎիմպելԿոմ» խմբի ընկերությունները ծառայություններ են մատուցում «Beeline», «Киевстар», «Wind», «Infostrada», «Mobilink», «Banglalink», «Telecel» և «Djezzy» ապրանքանիշերի ներքո: 2015թ. մարտի 31-ի դրությամբ ընկերության բաժանորդների թիվը կազմում էր 218 միլիոն: “ՎիմպելԿոմ”-ի բաժնետոմսերը շրջանառվում են NASDAQ բորսայում VIP նշումով: Մանրամասներին կարելի է ծանոթանալ www.vimpelcom.com կայքում: