Հայաստանում մեկնարկել է արցախցիներին կենսաթոշակների նշանակման դիմումների ընդունումը

Արմինֆո. Այսօրվանից ընդունվում են Լեռնային Ղարաբաղի հայրենակիցների կենսաթոշակների նշանակման դիմումները: Այդ մասին հաղորդում է ՀՀ աշխատանքի և սոցիալական հարցերի նախարարության մամուլի ծառայությունը:  

«Նրանք, ովքեր ԼՂ-ում ստանում էին կենսաթոշակ, այսօրվանից կարող են դիմել ՀՀ-ում կենսաթոշակների նշանակման համար։

Կենսաթոշակի (այդ թվում՝ աշխատանքային, հաշմանդամության, զինվորական, սոցիալական) նշանակման դիմում ներկայացնելու համար հետևեք ստորև ներկայացվող քայլերի հաջորդականությանը՝

ՔԱՅԼ 1 - նախ անհրաժեշտ է դիմել ՆԳՆ միգրացիայի և քաղաքացիության ծառայության տարածքային անձնագրային բաժիններ՝ բնակության վայրում հաշվառվելու համար (կամ փաստացի կամ մշտական հիմունքներով):

ՔԱՅԼ 2 - https://online.ssa.am/ հարթակում ընտրել «Լեռնային Ղարաբաղի կենսաթոշակի առցանց դիմումներ» պատուհանը՝ սեղմելով «Մուտքագրել Լեռնային Ղարաբաղի կենսաթոշակառուին Հայաստանի Հանրապետությունում կենսաթոշակի նշանակման դիմում» դաշտի վրա։

ՔԱՅԼ 3 - եթե հարթակում դեռևս չունեք անձնական հաշիվ, մինչ պահանջվող տվյալները լրացնելը, անհրաժեշտ է նախապես գրանցվել՝ սեղմելով կայքի վերևի աջ կողմում գտնվող «Գրանցում» պատուհանի վրա, ապա համապատասխան դաշտերում մուտքագրել Ձեր էլեկտրոնային հասցեն, անուն, ազգանուն, հայրանունը, ծննդյան օր, ամիս, տարեթիվը, գաղտնաբառը և նշել արդյոք ՀՀ քաղաքացի եք, թե ոչ։ Վերոնշյալ քայլերը կատարելուց հետո անհրաժեշտ է սեղմել «Գրանցվել» կոճակը։ Գրանցվելուց հետո Ձեր էլեկտրոնային հասցեին կստանաք հաղորդագրություն, որը հաստատելուց հետո համակարգը Ձեզ հնարավորություն կտա օգտվել կայքից։

ՔԱՅԼ 4 - վերոնշյալ քայլերը կատարելուց հետո՝ անհրաժեշտ է սեղմել «Մուտքագրել Լեռնային Ղարաբաղի կենսաթոշակառուին Հայաստանի Հանրապետությունում կենսաթոշակի նշանակման դիմում» կոճակի վրա, նշել էլեկտրոնային հասցե և գաղտնաբառ, որից հետո կկարողանաք լրացնել պահանջվող տվյալները, այն է՝

անուն, ազգանուն, ծննդյան օր, ամիս, տարեթիվ, անձը հաստատող փաստաթղթի համար, հեռախոսահամար, վճարման եղանակ (կանխիկ-անկանխիկ),   միայն 75 տարին լրացած, ինչպես նաև 1-ին կամ 2-րդ խմբի հաշմանդամություն ունեցող անձինք կենսաթոշակի վճարման տեսակը կարող են ընտրել կանխիկ եղանակը, վճարող կազմակերպություն (Ձեր նախընտրելի բանկ)։

Պահանջվող տվյալները լրացնելուց հետո անհրաժեշտ է տալ համաձայնություն՝ «Տեղեկացված եմ անձնական կամ ընտանեկան կյանքի մասին տեղեկություններ ապօրինի հավաքելու, պահելու, օգտագործելու կամ տարածելու համար ՀՀ քրեական օրենսգրքի 144-րդ հոդվածով նախատեսված պատասխանատվության մասին» դաշտում և սեղմել «Ստեղծել» կոճակի վրա։

Դիմումի հաստատման կամ մերժման վերաբերյալ համակարգը կտեղեկացնի անմիջապես՝ էկրանին հայտնվող համապատասխան հաղորդագրության միջոցով։

Դիմումը մուտքագրելիս դժվարություններ ունենալու դեպքում կարող եք զանգահարել 114 կամ դիմել Միասնական սոցիալական ծառայության ցանկացած տարածքային կենտրոն», - ասվում է նախարարության հաղորդագրությունում։

Հիշեցնենք, որ նոյեմբերի 22-ին Հայաստանի խորհրդարանն ընդունել է "Պետական կենսաթոշակների մասին" օրենքում կատարված փոփոխություններն եւ լրացումները եւ հարակից օրենքներում փոփոխությունները, որոնց համաձայն, Լեռնային Ղարաբաղից բռնի տեղահանվածներին Հայաստանում կսկսեն վճարել կենսաթոշակներ եւ նպաստներ: Արդյունքում՝ Լեռնային Ղարաբաղից բռնի տեղահանված անձինք կենսաթոշակ և նպաստ ստանալու իրավունք են ստացել՝ Հայաստանի Հանրապետության օրենսդրությամբ սահմանված համապատասխան պահանջների պահպանմամբ: Եվ դա տեղի կունենա անկախ այն հանգամաանքից, թե նրանք Լեռնային Ղարաբաղում թոշակ կամ նպաստ ստացել են, թե ոչ ։ Փախստականները պետք է համապատասխան դիմում ներկայացնեն լիազոր մարմին։ Կատարվելու է նաև ստաժի հաշվարկ ։ Այն դեպքերում, երբ անձը Լեռնային Ղարաբաղում կենսաթոշակ չի ստացել, նա պետք է անձամբ դիմի միասնական սոցիալական ծառայության ցանկացած տարածքային բաժին՝ այն Հայաստանում ձևակերպելու համար:

Նոյեմբերի 30-ին ՀՀ կառավարությունը հստակեցրել է Լեռնային Ղարաբաղից բռնի տեղահանված անձանց կենսաթոշակի իրավունքի իրացման ընթացակարգերը: Նշվել է, որ կառավարության համապատասխան որոշմամբ ժամանակավոր պաշտպանության տակ վերցված փախստական ճանաչված անձը, որի կենսաթոշակային գործն առկա է Լեռնային Ղարաբաղի կենսաթոշակային բազայում, կարող է կենսաթոշակ նշանակելու առցանց դիմում ներկայացնել մինչև 2024 թվականի հունիսի 1-ը: Որոշ դեպքերում անհրաժեշտ կլինի տրամադրել համապատասխան փաստաթղթեր: Մասնավորապես, դրանք այն դեպքերն են, երբ մարդու անաշխատունակության ժամկետը լրացել է, և վերջինս չի հասցրել բժշկասոցիալական փորձաքննություն անցնել Լեռնային Ղարաբաղում, կամ անցել է, բայց Լեռնային Ղարաբաղում կենսաթոշակ ստանալու իրավունքը չի իրացվել: ԼՂ բժշկասոցիալական փորձաքննության կողմից տրված տեղեկանքները հիմք կդառնան հաշմանդամության կենսաթոշակ ստանալու համար ՝ անկախ բժշկասոցիալական փորձաքննության տվյալների բազայում առկա լինելուց: Կենսաթոշակի նշանակման վերջնաժամկետ է սահմանվում մինչև 2028 թվականի դեկտեմբերի 31-ը: