Երևանի և Բաքվի միջև խաղաղության պայմանագրի ներկայիս բովանդակությունը մեկընդմիշտ կփակի Արցախի էջը. դիվանագետ

Արմինֆո. Երևանի և Բաքվի միջև, այսպես կոչված, խաղաղության համաձայնագիրը մոտ է ստորագրմանը։ Դրա ներկայիս բովանդակությունը մեկընդմիշտ կփակի Արցախի էջը: Այդ մասին հայտարարել է Հայաստանի նախկին արտգործնախարար Վարդան Օսկանյանը՝ Facebook-ի իր տեսաուղերձում։

"Իմ տեղեկություններով ՝ այդ, այսպես կոչված, խաղաղության համաձայնագիրը բավական հեռուն է գնացել և մոտ է ստորագրմանը։ Այդ փաստաթղթում նախկինում կար մի կետ, եթե չեմ սխալվում 9-րդ կետը, որտեղ խոսվում էր Արցախի ժողովրդի իրավունքների, անկախության հարցերի մասին, այդ կետն այսօր հանված է այդ պայմանագրից, գոյություն չունի, ընդհանրապես, Արցախի մասին խոսք չկա եւ եթե այս բովանդակութամբ է ստորագրվում այդ պայմանագիրը, դրանով մենք փակում ենք Արցախի էջը", - ընդգծել է Օսկանյանը։

Դիվանագետը պատահական չի համարում Ադրբեջանի նախագահի վերջերս արած հայտարարությունն այն մասին, թե հայերը պետք է մոռանան Արցախի մասին: "Արցախի մոռացում նշանակում է մոռանալ մեր անցյալը, մեր պատմությունը մեր ողջ մշակութային ժառանգությունը: Արցախը մենք չենք կարող մոռանալ, որովհետեւ Արցախը հայկական հող է: Արցախը երբեք անկախ ադրբեջանի կազմում չի եղել, նույնիսկ, սովետական շրջանում Արցախն ունեցել է ինքնավար կարգավիճակ, իսկ վերջին 30 տարիներին Արցախը եղել է փաստացի քաղաքական միավոր: Պահանջել, որ հայ  ժողովուրդը մոռանա Արցախը, դա, ուղղակի, անհնար է", - նշել է նա։

Միաժամանակ, նրա ասելով, խնդիրն այն է, ՀՀ իշխանությունները գնում են դրան: "Ադրբեջանը պետք է հասկանա, որ այս պայմանագիրը նրանք ստորագրում են ոչ թե Հայաստանի հետ, հայ ժողովրդի հետ, այլ Նիկոլ Փաշինյանի եւ նրա կառավարության հետ, հայ ժողովուրդը չի կարող մոռանալ Արցախը: Արցախի ժողովրդի վերադարձն իրենց տներ պետք է մաս կազմի այս պայմանագրին, եթե իրոք այն խաղաղության պայմանագիր է", - ամփոփել է Օսկանյանը:

Իր հերթին՝ "Հայաստան" դաշինքի պատգամավոր, դաշնակցական Գեղամ Մանուկյանը վտանգավոր է համարել այն փաստաթուղթը, որը մտադիր են ստորագրել Հայաստանի իշխանությունները: "Երկար հարցումներից հետո այսօր Հայաստանի ԱԳՆ շենքում մենք, այնուամենայնիվ, ծանոթացանք Ադրբեջանի և Հայաստանի միջև հարաբերությունների կարգավորման համաձայնագրի վերաբերյալ Երևանի և Բաքվի վերջին առաջարկներին։ Առաջարկներին ծանոթանալը միայն հաստատեց դրա վտանգը և ուժեղացրեց բոլոր մտավախությունները, որոնք մենք նախկինում հայտնել էինք այս առնչությամբ", - գրել է նա:

Մինչդեռ, ՀՀ ԱԽ քարտուղար Արմեն Գրիգորյանը ՀՀՀ-ում Պետրոս Ղազարյանի հետ հարցազրույցում հիշեցրել է, որ Հայաստանը պատրաստակամություն է հայտնել Ադրբեջանի հետ խաղաղության պայմանագիր ստորագրել մինչև դեկտեմբերի վերջը: "Խաղաղության պայմանագրի վերաբերյալ Բաքվի առաջարկներին հայկական կողմի վերջին պատասխանում նշվում է որոշ հարցերի լուծման մասին, որոնք դեռևս համաձայնեցված չեն կողմերի միջև: Հայաստանը հայտարարում է, որ, եթե ադրբեջանական կողմը համաձայնի հարաբերությունների կարգավորման 3 հիմնական սկզբունքների, ապա խաղաղության պայմանագրի ավելի քան 70 տոկոսը կհամաձայնեցվի", - ասել է նա։

Ընդ որում, Գրիգորյանը կարծում է, որ հնարավոր են արտգործնախարարների հանդիպումներ, իսկ հետո երկրների ղեկավարների հանդիպում։ Քաղաքական կամքի առկայության դեպքում կարելի է վերջնական փուլ մտնել և խաղաղության պայմանագիր ստորագրել մեկ ամսվա ընթացքում։ ԱԽ քարտուղարը հավելել է, որ քննարկվում են բանակցությունների ինչպես երկկողմ, այնպես էլ բազմակողմ ձևաչափերը՝ հաջող ելքի հնարավորությամբ: Նա հիշեցրել է, որ Հայաստանը դրական է պատասխանել Վաշինգտոնում բանակցություններ անցկացնելու առաջարկին։

Անդրադառնալով այդ հարցով Երևանի նկատմամբ ճնշում գործադրելու վերաբերյալ հարցին՝ Գրիգորյանը հավաստիացրել է, որ Հայաստանը կողմնորոշվում է խնդիրների լուծման իրական հնարավորություններով: "Չնայած չլուծված խնդիրներին, ներառյալ՝ մյուս գերիները և անհետ կորածների մասին տեղեկություննը, Հայաստանը պատրաստակամություն է հայտնում շարունակել աշխատանքն Ադրբեջանի հետ ՝ այդ հարցերի լուծումները որոնելու համար", - հայտարարել Է նա՝ վերահաստատելով մինչև տարեվերջ պայմանագիրը ստորագրելու հնարավորությունը: