Արմինֆո.Նոյեմբերի 30-ին Սկոպյեում ԵԱՀԿ նախարարական 30-րդ համաժողովի շրջանակներում տեղի է ունեցել ՀՀ ԱԳ նախարար Արարատ Միրզոյանի և Մալթայի Հանրապետության արտաքին գործերի, Եվրոպայի հարցերի և առևտրի նախարար Իեն Բորջի հանդիպումը։
ԱԳՆ հաղորդագրության համաձայն, Արարատ Միրզոյանը և Իեն Բորջը քննարկել են Հայաստանի և Մալթայի միջև քաղաքական երկխոսության օրակարգային թեմաներ՝ ի շարունակություն ս.թ. մարտին ՀՀ ԱԳ նախարար Արարատ Միրզոյանի՝ Մալթա կատարած պաշտոնական այցի և դրան հաջորդած՝ նաև բազմակողմ հարթակներում արդյունավետ քննարկումների։ Անդրադառնալով ԵԱՀԿ գործունեությանն առնչվող հարցերի՝ նախարար Միրզոյանն Իեն Բորջին հաջողություն է մաղթել ԵԱՀԿ նախագահությունը ստանձնելիս՝ հաշվի առնելով տարածաշրջանային անվտանգության հարցերում կազմակերպության առջև ծառացած լուրջ մարտահրավերները։ Հանդիպման ընթացքում մտքեր են փոխանակվել նաև Հարավային Կովկասում վերջին զարգացումների շուրջ: Վկայակոչելով ՄԱԿ Անվտանգության խորհրդում սեպտեմբերին կայացած քննարկումները՝ նախարար Միրզոյանն ընդգծել է, որ աղետալի էր առերեսվել Լեռնային Ղարաբաղում փաստացի էթնիկ զտմանը, ինչը տեղի ունեցավ ի հեճուկս միջազգային գործընկերների թիրախային կոչերի։
ՀՀ արտաքին գերատեսչության ղեկավարը ներկայացրել է ՀՀ-ը ջանքերը՝ միտված տարածաշրջանում պահպանվող մարտահրավերների հաղթահարմանը, այդ թվում նաև՝ Ադրբեջանի հետ հարաբերությունների կարգավորման համաձայնագրի նախագծի շուրջ աշխատանքների՝ նախորդ շաբաթ ՀՀ առաջարկներն Ադրբեջանին փոխանցելու միջոցով։
Նույն օրը ՀՀ ԱԳ նախարարը հանդիպում է ունեցել Շվեյցարիայի Համադաշնության արտաքին հարաբերությունների դաշնային դեպարտամենտի ղեկավար Իգնասիո Կասիսի հետ: Ի շարունակություն սեպտեմբերին Նյու Յորքում ունեցած հանդիպման՝ Հայաստանի և Շվեյցարիայի արտաքին գերատեսչությունների ղեկավարները քննարկել են Հարավային Կովկասում անվտանգության իրավիճակին առնչվող հարցեր:
Նախարար Միրզոյանն ընդգծել է, որ ուժի կիրառման և միջազգային իրավունքի շարունակական խախտումների պրակտիկան ստեղծում է անպատժելիության մթնոլորտ, ինչը չի վերացնում թե՛ Հարավային Կովկասում, թե՛ այլ տարածաշրջաններում նոր համանման մարտահրավերների հավանականությունը: Արարատ Միրզոյանը շեշտել է Ադրբեջանի կողմից նման գործելակերպի ժխտման հրամայականը և Հարավային Կովկասում խաղաղության հասնելու ջանքերին ամուր աջակցության կարևորությունը:
Նախարար Միրզոյանն իր գործընկերոջն է ներկայացրել նաև Լեռնային Ղարաբաղից բռնի տեղահանված 100 հազարից ավել հայ բնակչության կարիքների և իրավունքների պատշաճ հասցեագրման ուղղությամբ իրականացվող քայլերը:
Անդրադառնալով երկկողմ փոխգործակցությանը՝ Արարատ Միրզոյանն արժևորել է Շվեյցարիայի զարգացման գործակալության հետ ձևավորված արդյունավետ համագործակցությունը և Հայաստանում տարբեր ծրագրերի իրականացմանըաջակցությունը:
ԵԱՀԿ նախարարական 30-րդ համաժողովի շրջանակներում Արարատ Միրզոյանը հանդիպում է ունեցել նաեւ Լիխտենշտայնի Իշխանապետության արտաքին գործերի, կրթության և սպորտի նախարար Դոմինիկ Հասլերի հետ: Զրուցակիցները կարևորել են երկու երկրների միջև քաղաքական երկխոսության հետագա զարգացումը՝ հիմնված ընդհանուր արժեքների վրա։ Ընդգծվել է բարձրաստիճան այցերի իրականացման հարցում փոխադարձ պատրաստակամությունը՝ երկկողմ օրակարգը նոր ուղղություններով հարստացնելու նպատակով։ Քննարկվել են բազմակողմ հարթակներում փոխգործակցության հարցեր՝ մասնավորապես հաշվի առնելով Եվրոպայի խորհրդի նախարարների կոմիտեում Լիխտենշտայնի նախագահությունն ու առաջնահերթությունները։
Հայաստանի և Լիխտենշտայնի ԱԳ նախարարներն անդրադարձել են նաև տարածաշրջանային մարտահրավերներին։ Նախարար Միրզոյանը ներկայացրել է Գրանադայի քառակողմ հայտարարության մեջ արտացոլված սկզբունքները և շեշտել տարածաշրջանում կայունությամբ հետաքրքրված գործընկերների կողմից դրանց աջակցության, Հայաստանի և Ադրբեջանի միջև հարաբերությունների կարգավորմանը նպաստելու իրական ջանքերի կարևորությունը։
Արարատ Միրզոյանը ներկայացրել է Ադրբեջանի կողմից Լեռնային Ղարաբաղի էթնիկ զտման հետևանքով բռնի տեղահանված ավելի քան 100 հազար հայերի՝ Հայաստանում պատշաճ ընդունելուն, կարիքների և իրավունքների հասցեագրմանն ուղղված քայլերը։