Արտահերթ ընտրություններ. բոլորը դեմ են, իրականությունը՝ կողմ. փորձագետի կարծիք

Արմինֆո. Արտահերթ ընտրությունների թեման նկատելիորեն ակտիվանում է, և ներքաղաքական պրոցեսը հավանորեն դրան է գնալու։ Նման կարծիք է հայտնել "Այլընտրանքային նախագծեր" խմբի փորձագետ Վահե Հովհաննիսյանը։

Նրա ասելով, իրականությունն այն է, որ այս խորհրդարանն անկախ Հայաստանի պատմության մեջ ամենաողբերգական ու ամենաանունակ խորհրդարանն է։ «Այս խորհրդարանի գործունեության ընթացքում է եղել.

1. Արցախի գրեթե մեկ տարվա անմարդկային, ֆաշիստական բլոկադա, և խորհրդարանն այդ ընթացքում հանգիստ աշխատել է այլ օրակարգով։

2. Արցախի կորուստ, և այս խորհրդարանը շարունակել է հանգիստ աշխատել թե´ այդ ընթացքում, թե´ դրանից հետո։

Երբ ադրբեջանական զորքը հարձակումից մեկ շաբաթ առաջ տեղակայված էր հայկական բնակավայրերի մատույցներում և պարզ էր, որ աղետ է լինելու, այս խորհրդարանը հանգիստ աշխատում էր։ Սա է փաստը։ Եվ պետական խայտառակությունն այնն է, որ այս խորհրադարանը դեռ շարունակում է գործել։ Հազար տարի էլ անցնի պատմության մեջ, այս խորհրդարանը մնալու է այս բնորոշման մեջ։

Եվ ԱԺ-ում ներկայացված քաղաքական ուժերն այս հարցին պետք է պատասխանեն՝ ներկա և գալիք սերունդների առաջ։ Ակնհայտ է, որ խոսքը չի կարող լինել հավասար պատասխանատվության մասին. պատմական պատասխանատվության վերահսկիչ փաթեթն իշխող ուժին է։ Բայց կա քաղաքական և վարքագծային պատասխանատվության խնդիր։ Միանգամից պատասխանեմ «ի՞նչ կարող էր անել ընդդիմությունը» կոնտր-հարցին։ Նշված պայմաններում ընդդիմության ամենակարևոր առաքելությունը խորհրդարանում և երկրում մթնոլորտ փոխելն էր՝ ամեն կերպ, ամեն օրինական քայլով, գերմարդկային ակտիվությամբ։ Շրջափակման ողջ ընթացքում և Արցախի կորստից հետո խորհրդարանը երկրում ստեղծում է նորմալության իլյուզիա։ Մեր երկում ոչ մի բան նորմալ չէ, բայց ընդդիմության և իշխող ուժի համատեղ-կառուցողական աշխատանքը ստեղծում է այդ իլյուզիան, ինչպես ստեղծում էր շրջափակման ողջ ընթացքում։

Այդ փուլում Արցախ փրկելու մեկ շանս կար՝ փոխել երկրում մթնոլորտը և աշխարհին ցույց տալ, որ Արցախի հայաթափման բազմակողմ համաձայնությունը խափանվում է։ Մենք դրա համար ունեինք 9 ամիս, ինչը քիչ չէր։

Ստացվում է, որ խորհրդարանական կառավարման երկրում հայրենիքի մի մեծ հատված կորցնելուց հետո խորհրդարանը շարունակում է հանգիստ աշխատե՞լ։ Կներեք, սա պետական դեգրադացիայի հատակն է։

Ուրիշ էլ ի՞նչ պետք է լինի, որ իրականությունը պահանջի նոր ընտրություններ և նոր իշխանություն։

«Ո՞վ է գեներացնում արտահերթ ընտրություններ» հարցն ունի մի քանի պատասխան, և դրանցից հիմնականը իրականությունն է։ Թեման ունի այլ ենթահարցեր, որոնց մասին՝ հաջորդիվ», - գրել է փորձագետը՝ «Ֆեյսբուքի» իր էջում։

Նշենք, որ ավելի վաղ հայկական լրատվամիջոցներում սկսել են լուրեր տարածվել, որ վարչապետ Նիկոլ Փաշինյանը նախատեսում է 2024 թվականին արտահերթ խորհրդարանական ընտրություններ անցկացնել, իսկ որոշումը կառավարության ղեկավարն ընդունել էր օրեր առաջ՝ "Քաղաքացիական պայմանագիր" կուսակցության նիստի ժամանակ։ ԶԼՄ-ների տվյալներով՝ Փաշինյանը ցանկանում է նվազեցնել ընդդիմադիր կուսակցությունների տեղերը խորհրդարանում, իսկ արտահերթ ընտրությունները, իբր, անակնկալի կբերեն քաղաքական դաշտը և թույլ չեն տա հասունացնել ընդդիմադիր նոր ուժ:

Հայաստանում վերջին արտահերթ խորհրդարանական ընտրությունները տեղի են ունեցել 2021 թվականի հունիսի 20-ին։ Դրանցում հաղթել է Փաշինյանի "Քաղաքացիական պայմանագիր" կուսակցությունը ՝ ստանալով ընտրողների ձայների 54%-ը (72 տեղ խորհրդարանում)։ Ընդդիմությունն ունի 36 մանդատ։ Այսպիսով, իշխող ուժը միանձնյա ի վիճակի է առաջ տանել ցանկացած օրինագիծ կամ նախաձեռնություն և որևէ կերպ կաշկանդված չէ իր գործողություններում: Մինչդեռ, ընդդիմությունը իշխանության այս կամ այն նախաձեռնության վրա ազդելու որևէ գործիք չունի։ Հաջորդ խորհրդարանական ընտրությունները երկրում պետք է անցկացվեն 2026 թվականին։