Երկուշաբթի, 27 Նոյեմբերի 2023 11:03

Արմինֆո. Ցխինվալում կտրուկ են արձագանքել "Հարավային Օսիան և Աբխազիան օկուպացված տարածքներ ճանաչելու" հնարավորության մասին Նիկոլ Փաշինյանի հայտարարություններին:

 

Հարավային Օսիայի նախագահ Ալան Գագլոևն, արձագանքելով քաղաքացիների հետ զրույցի ընթացքում Նիկոլ Փաշինյանի հայտարարությանը, մասնավորապես ասել է. "Մենք հարգանքով ենք վերաբերվում հայ ժողովրդին, որի հետ մեզ կապում են դարավոր բարեկամական հարաբերությունները, բայց մեզ չի հետաքրքրում Հայաստանի վարչապետի կարծիքը, որը Լեռնային Ղարաբաղը թողել է ծանր կացության մեջ ։ Նա դավաճանեց իր իսկ ժողովրդին, մեծամասամբ ազգությամբ հայերին, որոնք Հայաստանից օգնություն էին ակնկալում։ Փաշինյանն իր մեջ համարձակություն չգտավ ճանաչելու Արցախի անկախությունը։ Մեզ չի հետաքրքրում նման քաղաքական գործիչների կարծիքը։ Այսօր Հարավային Օսիան Ռուսաստանի Դաշնության և մի շարք այլ երկրների կողմից ճանաչված անկախ պետություն է, և բոլորը պետք է հաշվի նստեն դրա հետ"։

 

Հիշեցնենք, որ նոյեմբերի 24-ին ուղիղ եթերում պատասխանելով այն հարցին, թե արդյոք Հայաստանը պատրաստ է Աբխազիան և Օսիան ճանաչել օկուպացված տարածքներ, Փաշինյանը հայտարարել էր, որ Հայաստանը լիովին և միանշանակ պաշտպանում է Վրաստանի միասնությունը, ինքնիշխանությունը, տարածքային ամբողջականությունը, անկախությունը, ժողովրդավարությունը, պետականությունը:

"ՄԱԿ - ում Հայաստանի քվեարկության արդյունքները 2019 թվականից առաջ և հետո արձանագրել են շատ տեսանելի և որոշակի տարբերություններ, ինչի կապակցությամբ մեր եղբայրական պետության ՝ Վրաստանի ներկայացուցիչները գոհունակություն են հայտնել", - նշել էր Փաշինյանը: