Երկուշաբթի, 27 Նոյեմբերի 2023 10:50

Արմինֆո.Հայաստանը երրորդ տեղն է զբաղեցրել նախօրեին Ֆրանսիայի Նիցցա քաղաքում անցկացված "Մանկական Եվրատեսիլ-2023" երգի ամենամյա մրցույթում։

Հայաստանի ներկայացուցիչ Yan Girls խումբը, որի կազմում են Նանեն, Նենսին, Կամիլան, Սյուզաննան և Աիդան, հանդես են եկել 8-րդ համարի ներքո ՝ "Do It My Way" երգով: Հոկտեմբերի 24-ից մեկնարկած քվեարկության արդյունքում հանրապետության ներկայացուցիչները ստացել են 180 միավոր:

 

Մրցույթի մասնակիցների գնահատումն իրականացրել են 16 ազգային ժյուրիներ և առցանց քվեարկությամբ՝ աշխարհի 175 երկրներում: Հայաստանի օգտին առավելագույն 12 միավոր են տվել Մալթան, Մեծ Բրիտանիան, Հյուսիսային Մակեդոնիան և Գերմանիան, իսկ առցանց քվեարկության արդյունքում հայկական խումբը ստացել է ևս 64 միավոր:

 

Երկրորդ տարին անընդմեջ մրցույթի հաղթող է ճանաչվել Ֆրանսիան, երկրորդ տեղում Իսպանիան է: Ընդհանուր առմամբ "Մանկական Եվրատեսիլ" մրցույթին մասնակցել են 16 երկրների՝ Ալբանիայի, Հայաստանի, Էստոնիայի, Ֆրանսիայի, Վրաստանի, Գերմանիայի, Իռլանդիայի, Իտալիայի, Մալթայի, Նիդերլանդների, Հյուսիսային Մակեդոնիայի, Լեհաստանի, Պորտուգալիայի, Իսպանիայի, Ուկրաինայի, Մեծ Բրիտանիայի պատանի ներկայացուցիչներ: Հիշեցնենք, որ 2022 թվականին "Մանկական Եվրատեսիլ" - ն անցկացվել է Հայաստանում։ Մրցույթը Երևան է բերել երգչուհի Մալենան՝ Փարիզում կայացած "Մանկական Եվրատեսիլ 2021"-ում իր հաղթանակով՝ "Քամի, Քամի" երգով։