Արմինֆո.Վաշինգտոնը շարունակում է խրախուսել երկու երկրների ղեկավարությանը և պատրաստ է աջակցել Հայաստանի և Ադրբեջանի միջև բանակցություններին՝ կայուն և տևական խաղաղության հասնելու համար, որտեղ հարգվում են բոլորի իրավունքները: Այս մասին հայտարարել է ԱՄՆ Պետդեպարտամենտի մամուլի քարտուղար Մեթյու Միլլերը՝ ամենօրյա ճեպազրույցի ժամանակ։
Ճշգրտող հարցին, թե ինչ պետք է տեղի ունենար նոյեմբերի 20-ին ԱՄՆ Պետդեպարտամենտի շենքում և տեղի չունեցավ, հաշվի առնելով, որ այնտեղ էր ժամանել Հայաստանի դեսպանը, արդյոք պետք է լինեին Արցախի հարցով բանակցություններ, Միլլերը պատասխանել է, որ այդ մասին չի խոսի։
"Ես միայն կասեմ, որ մենք շարունակում ենք խրախուսել երկու երկրների ղեկավարությանը և պատրաստ ենք աջակցել Հայաստանի և Ադրբեջանի միջև բանակցություններին՝ կայուն և տևական խաղաղության հասնելու համար, որտեղ հարգվում են բոլորի իրավունքները", - ասել է ԱՄՆ Պետդեպարտաամենտի ներկայացուցիչը:
Այս առումով նա կարևորել է, որ Հայաստանն ու Ադրբեջանը սկսեն ուղիղ քննարկում և լուծեն հարցերը՝ ի շահ տարածաշրջանի։ "Մենք կողջունեինք մեր դերն այդ բանակցություններին աջակցելու գործում։ Մենք տեսանք, որ այլ երկրներ նույնպես առաջարկում են աջակցել այդ բանակցություններին։ Մենք կարևոր ենք համարում երկու երկրների միջև դեմ առ դեմ բանակցություններ վարելը՝ երկարաժամկետ համաձայնության հասնելու համար", - հավելել է Միլլերը։
Հիշեցնենք, որ ավելի վաղ Ադրբեջանը հրաժարվել էր Վաշինգտոնում Հայաստանի հետ հանդիպումից ՝ ԱՄՆ-ի կողմից Արցախի նկատմամբ Բաքվի գործողությունների քննադատության պատճառով: Ինչպես հայտնի է դարձել, հանդիպումը նախատեսված էր նոյեմբերի 20-ին։
Հավելենք նաև, որ նախօրեին ԱԺ պաշտպանության և անվտանգության հարցերի հանձնաժողովի փոխնախագահ, "Քաղաքացիական պայմանագիր" խմբակցության պատգամավոր Արմեն Խաչատրյանը հայաստանյան լրատվամիջոցներից մեկի հետ զրույցում հայտարարել է, թե Ադրբեջանի և Հայաստանի միջև խաղաղության պայմանագիրը կստորագրվի Արևմուտքում: Նա հայտարարել է, թե Հայաստանը չի կրկնի 2020 թվականի նոյեմբերի 9-ի սխալը: " Մեր նպատակն է խաղաղության համաձայնագրի ստորագրումից հետո ունենալ կոնկրետ երաշխավորներ, որպեսզի որևէ խախտման դեպքում մենք իմանանք, թե ինչ միջազգային մեխանիզմներ կարող ենք օգտագործել։ Ռուսաստանի բոլոր երաշխիքները անհետացել են նոյեմբերի 9-ից հետո։ Հայաստանը երկրորդ անգամ չի կրկնի այդ սխալը", - ասել է Խաչատրյանը, հավելելով, որ խաղաղության համաձայնագիրը կկնքվի արևմտյան մի շարք երկրների երաշխիքների ներքո։ Ուշագրավ է, որ անցած շաբաթվա վերջին Հայաստանի Անվտանգության խորհրդի քարտուղար Արմեն Գրիգորյանը եւս նշել է ռուսական հարթակում Ադրբեջանի հետ հանդիպման աննպատակահարմարությունը: Նա դա հիմնավորել է այն հանգամանքով, որ Մոսկվան որևէ կոնկրետ առաջարկ չի ներկայացնում, մինչդեռ, արևմտյան հարթակն ավելի նպատակահարմար է, և կան կոնկրետ առաջարկներ։ Ընդ որում, նա "փակագծերը չի բացել", թե ինչ առաջարկների մասին է խոսքը։