ԶԼՄ. Հնդկաստանը դիտարկում է Հայաստանին ռազմական տեխնիկայի նոր խմբաքանակ մատակարարելու հնարավորությունը

Արմինֆո. Հնդկաստանը դիտարկում է Կովկասում իր ռազմավարական դաշնակից Հայաստանին ռազմական տեխնիկայի նոր խմբաքանակի մատակարարման հնարավորությունը:

Ինչպես գրում է Economic Times պարբերականը, հղում անելով իր աղբյուրներին, վերջերս Նյու Դելի է այցելել բարձրաստիճան հայ պաշտոնյա (ՀՀ Անվտանգության խորհրդի քարտուղար - խմբ.), որը բանակցություններ է վարել այդ թեմայի շուրջ։

"Նոր մատակարարումների մանրամասները դեռ հայտնի չեն, սակայն սպառազինության նոր խմբաքանակը կարող է ներառել Ադրբեջանի հետ Հայաստանի հակամարտության պայմաններում զսպող գործոն ձևավորող տեխնիկա", - գրում է պարբերականը՝ հղում անելով հայաստանյան աղբյուրներին:

Նաեւ նշվում է, որ ավելի վաղ Հնդկաստանը Հայաստանին սպառազինության առաջին խմբաքանակի հաջող մատակարարում է իրականացրել: Կայքի տեղեկություններով՝ մատակարարումներն իրականացվել են Իրանի տարածքով։ Խմբաքանակը ներառում էր Pinaka ՀԿՌՀ-ներ, հակատանկային հրթիռներ և զինամթերք ։

Ավելի վաղ Indian Defence Research Wing-ը հաղորդել էր, որ օգոստոսի սկզբին Հնդկական Bharat Forge LTD պաշտպանական ընկերությունը Հայաստանին է փոխանցել վեց ATAGS 155 մմ հաուբից ՝ 155,5 մլն դոլար արժողությամբ պայմանագրի շրջանակներում: Գործարքը նախատեսում է երեք տարվա ընթացքում Հայաստան մատակարարել այդ տեսակի 90 հրետանի:

Նաև 2022 թվականի սեպտեմբերի վերջին Հնդկաստանն ու Հայաստանը ստորագրեցին հայկական կողմին մոտ 244 մլն դոլարի սպառազինության մատակարարման պայմանագիր։ Հաղորդվել է, որ պատվերը ներառում է հնդկական արտադրության Pinaka ՀԿՌՀ-ների պատմության մեջ առաջին արտահանման մատակարարումը։