Երեւանի "Աստղային ճեմուղում" փայլեցին ոչ թե աստղեր, այլ տիեզերքներ

Արմինֆո. Այսօր Շառլ Ազնավուրի անվան հրապարակում բացել են երկու նոր "աստղ"՝ անիմացիոն կինոյի հայ ականավոր գործիչներ Լեւ Ատամանովի և Վալենտին Պոդպոմոգովի:

Հաշվի առնելով վերջիններիս տաղանդը և ներդրումը անիմացիոն արվեստի զարգացման և կայացման գործում, նրանց, պարզապես, աստղեր անվանելը դժվար է, սրանք տիեզերքներ են, քանի որ Լև Ատամանովը մուլտիպլիկացիայի առաջին դեմքերից մեկն է Խորհրդային Միությունում, իսկ Վալենտին Պոդպոմոգովը, լինելո հայտնի մուլտիպլիկատորի սանը, ստեղծել է անհավանական անիմացիաներ մի շարք գեղարվեստական ֆիլմերի համար, որոնց թվում են "Կախարդական գորգը", "Մի կաթիլ մեղրը", "Պույ-պույ մկնիկը", "Փարվանա լճի մասին լեգենդը",  "Ուրվականները լքում են գագաթները", "Սիրտը երգում է", "Առաջին սիրո երգը", "Ճանապարհ դեպի ասպարեզ", "Մորգանի խնամին", "Ձյունը սգի մեջ" և այլն:

Թեեւ հաճախ Պոդպոմոգովի մասին խոսում են որպես գեղանկարչի, ինքը բազմիցս հայտարարել է, որ որպես նկարիչ ինքը ձևավորվել է կինոյի շնորհիվ. <Գեղանկարչություն ես եկել եմ կինոյից: Գույն, լույս, դրամատուրգիայի զգացում՝  այդ ամենն ինձ տվել է կինոն>:

Ատամանովի և Պոդպոմոգովի "աստղերի" բացումը տեղի է ունեցել "Ռեանիմանիա" անիմացիոն կինոյի 15-րդ միջազգային փառատոնի շրջանակներում ՝ "Ոսկե ծիրան" միջազգային կինոփառատոնի հետ համագործակցությամբ: Հատկանշական է, որ նրանց աստղերը գտնվում են հարևանությամբ ՝ ասես խորհրդանշելով մտերմությունը, համատեղ աշխատանքի տարիները: Չէ որ հենց Ատամանովը 1940 թվականին ընդունեց այն ժամանակ դեռ շատ երիտասարդ Վալյա Պոդպոմոգովին "Հայֆիլմ" կինոստուդիայում։

Բացման արարողությանը ներկա էին ՀՀ կրթության, գիտության, մշակույթի և սպորտի նախարար Ժաննա Անդրեասյանը, նրա տեղակալ Արա Խզմալյանը, "ՌեԱնիմանիա" փառատոնի հիմնադիր տնօրեն Վրեժ Քասունին, "Ոսկե ծիրան" կինոփառատոնի գեղարվեստական ղեկավար Կարեն Ավետիսյանը, High Fest կատարողական արվեստների փառատոնի հիմնադիր նախագահ Արթուր Ղուկասյանը, Վալենտին Պոդպոմոգովի ընտանիքի անդամներ և արվեստի երկրպագուներ:

Մասնավորապես, Վրեժ Քասունին նշել է, որ "աստղերի" հայտնագործությունն ընդամենը մի կաթիլ է այն բանի համեմատ, թե ինչ ժառանգություն են թողել Լև Ատամանովն ու Վալենտին Պոդպոմոգովը: <Յուրաքանչյուր անցնող կտեսնի այս անունները, կհարցնի, կհետաքրքրվի, թե ովքեր են այդ մարդիկ: Եվ դա կարևոր է ոչ միայն մեզ համար՝ այստեղ ապրողներիս, այլև օտարերկրացիների համար, որպեսզի բոլորը հասկանան, թե ինչ մշակութային ժառանգություն ունենք, այդ թվում ՝ անիմացիոն ոլորտում>, - ասել է նա։

Հիշեցնելով, որ այս տարի լրանում է հայկական անիմացիայի 85-ամյակը, Քասունին նշել է, որ, եթե չլիներ Ատամանովի և Պոդպոմոգովի աշխատանքն այս ոլորտում, որը ոչնչով չի զիջում եվրոպական, ամերիկյան ոճի անիմացիաներին, ապա Հայաստանը միայն այսօր ձեռնամուխ կլիներ անիմացիայի իր առաջին քայլերին: "Մենք ստեղծում ենք միջազգային մակարդակի անիմացիոն կինո՝ միայն այն պատճառով, որ այսքան երկար ճանապարհ ենք անցել այդ նշանավոր անհատների շնորհիվ", - ընդգծել է նա: