Արմինֆո. Հայաստանը պետք է օգտագործի ցանկացած ձևաչափ՝ անվտանգային միջավայրի հետ կապված հարցերը լուծելու համար։ Այդ մասին հոկտեմբերի 23-ին լրագրողներին հայտարարել է Ազգային ժողովի անվտանգության եւ պաշտպանության հարցերի հանձնաժողովի նախագահ Անդրանիկ Քոչարյանը՝ մեկնաբանելով Թեհրանում կայանալիք "3+3" ձեւաչափով ԱԳ նախարարների հանդիպումից ակնկալիքների մասին հարցը։
Պատգամավորը կաարեւորել է տարածաշրջանային խնդիրների լուծման գործում տարածաշրջանի երկրների, այդ թվում նաև Ռուսաստանի Դաշնության մասնակցությունը, որն այս կամ այն կերպ ներկա է Հարավային Կովկասում: "Հայաստանի խնդիրը տարածաշրջանում սահմանների անձեռնմխելիությունն է և այն ուժերին հակազդելը, որոնք երկրի թիկունքում փորձում են խնդիրներ ստեղծել նրա համար: Այս ձևաչափով անհրաժեշտ է պաշտպանել մեր շահերը։ Մշտական թշնամանքը ոչ մեկին օգուտ չի տվել։ Իսրայելի և Պաղեստինի միջև հակամարտությունը դրա վառ ապացույցն է։ Հակամարտությունները լուծվում են բանակցությունների միջոցով, բայց դա չի նշանակում, որ խաղաղության պայմանագիրը չպետք է խնդրի լուծում նախատեսի՝ մեր երկրի անվտանգային միջավայրի հետ կապված", - նշել է խորհրդարանականը։
Քոչարյանը մեկնաբանել է նաև 400 մլն դոլարի ռուսական սպառազինության ձգձգված մատակարարումների հարցը ։ Նա նշել է, որ Երևանը դեռ սպասում է այդ մատակարարումներին։ "Մենք այդ միլիոնները տվել ենք, որ զենք ստանանք։ Հիմա զենքի ենք սպասում։ Ցանկացած պայմանագիր ներառում է ինչպես ժամկետներ, այնպես էլ պատժամիջոցներ՝ այդ ժամկետների խախտման դեպքում", - նշել է պատգամավորը։
Հիշեցնենք, որ այսօր Թեհրանում պետք է տեղի ունենա <3+3> ձևաչափով ԱԳ նախարարների հանդիպում, որտեղ, ինչպես սպասվում է, քննարկումներ կանցկացվեն տարածաշրջանային անվտանգության խնդիրների շուրջ:
Ավելի վաղ հայկական ԶԼՄ-ները հաղորդել էին, որ ռուսական զենք արտադրող "Սպլավ" ԲԸ դիմել է ՀՀ պաշտպանության նախարարությանը, որ "Սմերչ" ՀԿՌՀ-ի հրթիռների պատվերը պատրաստ է: Բայց ՀՀ ՊՆ մասնագետները մեկ տարվա ընթացքում այդպես էլ չեն կազմակերպել ապրանքի փոխադրումը։ Նրանք այն երկար չեն պահել պահեստում, և արկերը օգտագործվել են Ուկրաինայում ռազմական գործողությունների սկսվելուց հետո: Եվ, այնուամենայնիվ, Մոսկվան պատրաստակամություն է հայտնել նոր ապրանք մատակարարել Երևանին, բայց՝ արդեն խմբաքանակներով։ Հայկական լրատվամիջոցներին հայտնի է դարձել նաև, որ 2020 թվականից հետո Ռուսաստանն առաջարկել է Հայաստանին 1,4 մլրդ դոլարի զենք-զինամթերք մատակարարել՝ 20 տարի մարման ժամկետով վարկով։ 400 մլն դոլարի առաջին պայմանագիրն արդեն հաստատվել էր և պատրաստ էր ստորագրման, սակայն հանկարծ Հայաստանը հրաժարվել է այդ համաձայնագրերից։ Փոխարենը՝ Երևանը պայմանագրեր է կնքել Հնդկաստանի մասնավոր ընկերությունների հետ և Դելիին փոխանցել միանգամից 500 մլն դոլար կանխավճար, սակայն մինչ օրս չի ստացել պատվիրված ծավալների նույնիսկ 5% - ը։