Հայաստանի պաշտպանության նախկին նախարար. մենք Արցախն անպայման վերադարձնելու ենք, պարտվել ենք ճակատամարտում, բայց ոչ՝ պատերազմում

Արմինֆո.Հոկտեմբերի սկզբին ՀՀ ԶՈՒ ԳՇ ռազմական հետախուզության նախկին պետ, ՀՀ պաշտպանության նախկին նախարար Արշակ Կարապետյանը հայտարարեց քաղաքական գործունեություն սկսելու և "Հայաստանի ազատագրումը ներքին և արտաքին թշնամիներից" քաղաքական շարժում ստեղծելու մասին: Սոցցանցում իր տեսաուղերձում նա նշել է, որ մտադիր է ստեղծել հուսալի և անվտանգ համակարգ, որը թույլ կտա պահպանել երկրի պետականությունը և ապահովել հանրապետության հետագա զարգացումը: Նրա խոսքով ՝ իր մտադրությունների լրջության մեջ քաղաքացիները շատ շուտով կհամոզվեն։

Խոսելով իր պաշտոնանկության մասին՝ Կարապետյանը հայտարարել է, որ դա տեղի է ունեցել այն պատճառով, որ ինքը չի ընդունել Ադրբեջանի ԶՈՒ-ի ներկայացրած վերջնագիրը՝ հրաման տալով կրակ բացել Հայաստանի պետական սահմանը խախտելու դեպքում: ՊՆ նախկին ղեկավարը պնդել է, որ Լեռնային Ղարաբաղի ողբերգությունը տեղի է ունեցել ԼՂ ժողովրդին բախտի քմահաճույքին թողած հայկական իշխանությունների վախկոտության և դավաճանության պատճառով:

Պաշտպանության նախկին նախարարն այսօր համաձայնել է պատասխանել ԱրմԻնֆո-ի մի շարք հարցերի:

- Կա թերահավատություն Ձեր մտադրությունների վերաբերյալ. որքանո՞վ են դրանք լուրջ և հիմնավոր:

- Ես վստահ եմ, որ անլուրջ մարդու տպավորություն չեմ թողնում։ Կարծում եմ՝ ովքեր ծանոթ են ինձ հետ և ինձ մոտիկից ճանաչում են, դա կհաստատեն։ Առաջիկայում դա կապացուցեմ իմ որոշակի գործողություններով ու քայլերով։ Միաժամանակ, ուզում եմ ձեզ տեղեկացնել, որ ես չեմ սիրում շատ խոսել, այլ, պարզապես, զբաղվում եմ գործով։

- Ի՞նչ է իրենից ներկայացնում Ձեր հայտարարած շարժումը։ Արդյո՞ք մտադիր եք միավորել կուսակցություններ ու հասարակական կազմակերպություններ՝ առաջադրված նպատակներին հասնելու համար: Եթե այո, ապա կարո՞ղ եք նշել այդ ուժերը:  Ի՞նչ քայլեր եք մտադիր ձեռնարկել. հանրահավաքներ, երթեր անցկացնել, թե՞ այլ ակցիաներ:

- Շարժումը կմիավորի բոլոր հայրենասեր հայերին՝ անկախ այն հանգամանքից, թե արդյոք դա կազմակերպություն է, կուսակցություն թե առաանձին մարդիկ: Գործընթացն արդեն ընթանում է։

Իմ հայտարարությունից հետո արդեն մի քանի օրվա ընթացքում ավելի քան 12 հազար հայտ եմ ստացել հայազգի ֆիզիկական անձանցից՝ ողջ աշխարհից և, իհարկե, Հայաստանից։ Այսօր, ինչպես գիտեք, «Հայկական ազգային ճակատը»՝ ի դեմս Գևորգ Գևորգյանի, արդեն հայտարարել է միանալու պատրաստակամության մասին։ Կազմակերպությունն այժմ ակտիվ աշխատում է։ Առաջիկայում իրենց հայտարարությունները կանեն նաև այլ կազմակերպություններ։ Ողջ տեղեկությունը կարող եք գտնել  կայքում, որը մենք գործարկում ենք: Այնտեղ կլինեն Ձեր բոլոր հարցերի պատասխանները:

- Արդյո՞ք Դուք տեսնում եք Արցախը վերադարձնելու հնարավորություններ:

- Արցախը մենք անպայման վերադարձնելու ենք։ Առանց Արցախի Հայաստանը շատ խոցելի կլինի։ Մենք պարտվել ենք ճակատամարտում, բայց՝ ոչ պատերազմում։ Կան որոշակի խնդիրներ, որոնք մենք կլուծենք այն բանից հետո, երբ ձերբազատվենք դավաճանների ու վախկոտների ներկայիս կառավարությունից։ Սրանց հետ դա անհնար է: Նման խայտառակություն, որը հենց նրանք թույլ տվեցին, հայ ժողովուրդն իր բազմադարյա պատմության ընթացքում երբեք չի զգացել։ Նրանք պետք է պատասխան տան մեր Արցախը հանձնելու համար։ Եվ նրանք պատասխան են տալու:

- Գործող իշխանություններն ակտիվորեն օգտագործում են այն թեզը, որ նախկին իշխանությունները սպառազինություն չեն գնել, իսկ Ռուսաստանը չի կատարել իր դաշնակցային պարտավորությունները: Որքանո՞վ է այս մեղադրանքը համապատասխանում իրականությանը, հաշվի առնելով սպառազինությունների այն քանակը, որն Արցախի Պաշտպանության բանակը փոխանցել է Ադրբեջանին:

- Գիտե՞ք, թե մեր իշխանություններին ամենից լավ ինչն է հաջողվում։ Մեր ժողովրդին ներքաշել անցյալի "պարզաբանումների" մեջ, բոլորին ներքաշել այդ արկածախնդրության մեջ, որպեսզի մարդիկ չտեսնեն իրենց ներկան և չհասկանան, որ ազգի գլխին լուրջ վտանգ է կախված։ Ադսպիսով, իշխանություններն արդարացնում են իրենց, մեղմ ասած, ոչ կոմպետենտությունն ու վախկոտությունը։ Ինչ վերաբերում է սպառազինության հարցին, ապա ասեմ, որ լինելով պաշտպանության նախարար՝ պայմանավորվել եմ ՌԴ-ից սպառազինության խոշոր մատակարարումների մասին, արդեն գրեթե լուծվել են նույնիսկ լոգիստիկ հարցերը։ Արդեն պայմանավորվածություն է եղել ՌԴ ԶՈՒ-ի հետ համատեղ սկսել ՀՀ ԶՈՒ արդիականացումը։ 2023 թվականին ավելի քան մեկ ամիս ՀՀ ԶՈՒ ԳՇ-ում աշխատել են ՌԴ ԶՈՒ բարձրագույն ղեկավարության շուրջ 30 գեներալներ և սպաներ եւ մի քանի ակադեմիաների և բարձրակարգ մասնագետներ: Արդիականացման ավարտի արդյունքում արդեն 2023 թվականի վեեերջին մենք արդեն կունենայինք Հայաստանի որակապես նոր զինված ուժեր։ Նման պայմաններում, ինչպես հասկանում եք, մենք կպահպանեինք Արցախը։ Ասեմ ավելին.  ՌԴ-ից հարյուր միլիոնավոր ԱՄՆ դոլարների սպառազինությունների մատակարարումները նախկինում "ռազմատեխնիկական օգնության" շրջանակներում Հայաստանին չէին վաճառվում, այլ, գործնականում, նվիրաբերվում էին։ Այդ սպառազինության մի մասը մենք ժամանակին փոխանցել ենք Արցախին։ Եվ, ինչպես ճիշտ նկատեցիք, հետո Արցախի Պաշտպանության բանակն այն հանձնեց Ադրբեջանին։

- Եվ մի հարց ևս. ՀՀ Ազգային ժողովի պատգամավոր Տիգրան Աբրահամյանը մի առիթով նկատել է, որ իշխանությունների հասցեին մեղադրանքներ հնչեցնելով, Դուք պետք է ներկայացնեք Ձեր ունեցած փաստերը: Կարո՞ղ եք Դուք դրանք ներկայացնել:

- Ես համաձայն եմ պատգամավորի հետ։ Ես դա կանեմ, երբ ներկայիս իշխանությունները հրաժարական տան։ Հիմա դա անօգուտ է: Դա վերաբերում է նաև Ռուբեն Վարդանյանի հանձնմանը։ Իշխանությունները քրեական գործեր են սարքում, մեծ մասամբ՝ զինվորականների նկատմամբ։ Նրանք խոսում են ժողովրդավարության մասին, իսկ իրենք արգելափակում են բոլոր նրանց, ովքեր փորձում են խանգարել իիրենց։ Նոր գործեր են հարուցում, ձերբակալում։ Իրենցով են արել ողջ իրավապահ համակարգը։ Բայց ես շատ հայրենասերների գիտեմ այս համակարգից։ Հենց ես հայտարարեցի քաղաքական պայքարի մեջ մտնելու մասին, արդեն հաջորդ օրը հարազատներիս կանչեցին և հեռացրին պետական ծառայությունից։ Իմ հարևանին՝ հասարակ պայմանագրային սերժանտին, աշխատանքից ազատել են՝ իմ ֆեյսբուքյան էջի մեկ հավանման համար։ Չեմ զարմանա նոր "նկարված" քրեական գործերի առնչությամբ։ Դա է մեր իշխանությունների մակարդակը։ Ոչ մի իշխանության օրոք ես նման բան չեմ հիշում։ Դեռ 2018 թվականին վկաների ներկայությամբ ես երկրի ղեկավարին ասել եմ, որ նա չի կարող վարչապետ լինել։ Նրա հարցին՝ "իսկ ով կարող է լինել նա> , ես պատասխանել եմ, որ նրա տեղը խորհրդարանում է: Այժմ մենք աշխատում ենք: Եվ հաղթանակը մերն է լինելու:

- Շնորհակալություն հարցազրույցի համար

- Շնորհակալություն Ձեր հարցերի համար: