Գլխավոր դատախազությունը գործ է հարուցել Սամվել Բաբայանի հայտարարությունների հիման վրա

Արմինֆո. Իրավապահները քրեական գործ են հարուցել Արցախի պաշտպանության նախկին նախարար Սամվել Բաբայանի՝ Հայաստանի Հանրային հեռուստաընկերության եթերում հնչեցրած հայտարարությունների ու հոկտեմբերի 6-ին ներկայացրած հաղորդման հիման վրա։ Այդ մասին հաղորդում է «Ազատություն» ռադիոկայանը:

Նշվում է, որ Լաչինի ադրբեջանական անցակետն անխոչընդոտ հատած Բաբայանը Երևան հասնելուն պես իրավապահներին հորդորել է քրեական գործ բացել Արցախի իշխանությունների դեմ՝ «Լեռնային Ղարաբաղը հանձնելու համար»։

«Ազատության» հարցմանն ի պատասխան՝ Գլխավոր դատախազությունից հաղորդել են, որ վարույթը նախաձեռնվել է երկու հոդվածներով՝ «Զինվորական պաշտոնեական անփութությունը» (Քրեական օրենսգրքի հոդված 550)՝ ռազմական դրության, պատերազմի ժամանակ կամ մարտի պարագաներում հրամանատարի կամ պաշտոնատար անձի կողմից իր ծառայողական պարտականությունների կատարման նկատմամբ անբարեխիղճ կամ անփույթ վերաբերմունքի հետևանքով դրանք չկատարելը կամ ոչ պատշաճ կատարելը, ինչպես նաև «Մարտ վարելու միջոցները հակառակորդին հանձնելը կամ թողնելը» (ՔՕ հոդված 545)՝ առանց մարտի հանգամանքներով հարկադրված լինելու հրամանատարի (պետի) կողմից ամրությունը, մարտական տեխնիկան կամ մարտ վարելու այլ միջոցը հակառակորդին հանձնելը կամ թողնելը։

Գործով մեղադրյալներ այս պահի դրությամբ չկան:

Ավելի վաղ Բաբայանը ՀՀՀ եթերում մի շարք աղմկահարույց հայտարարություններ էր արել, այդ թվում՝ այն մասին, որ ԼՂ նախկին նախագահներն ու խորհրդարանի պատգամավորները հանձնել են Լեռնային Ղարաբաղը: Նա նաև հայտարարել էր, որ վերջին շրջանում ինքնավարության հարցի շուրջ բանակցություններ է վարել ադրբեջանցիների հետ, ինչին, ըստ նրա, Բաքուն համաձայնել է: Բաբայանը չի պարզաբանել, թե ինչպես է Ադրբեջանի կազմում Լեռնային Ղարաբաղի որևէ կարգավիճակ մերժող Բաքուն համաձայնել իր առաջարկներին: Բաբայանը պնդում է, որ միջնորդավորված բանակցություններ է վարել, փոխանակել է 23 կետից բաղկացած փաստաթղթեր, բայց այդ մասին տեղյակ չի պահել իշխանություններին, քանի որ իրեն չեն ցանկացել լսել և չեն հրավիրել քննարկման: <Ադրբեջանը համաձայնել է 23 կետի, մարդիկ, ովքեր այդ փաստաթղթերը տվել են սահմանին, ստացել են սահմանին, և մի շարք հարցեր, որոնք համաձայնեցված են եղել, այդ մարդիկ կգան, դատարանում ցուցմունք կտան, և այդ տեքստը, այդ կետերը... իհարկե, այլընտրանք կար։ Մենք կարող էինք Ինքնավար Հանրապետություն ստեղծել Արցախի (Լեռնային Ղարաբաղի - խմբ.) տարածքում՝ 4400 քառ. կմ տարածքով, և ունենալ մեր գվարդիան։ Այդ մարդիկ դա չուզեցին", - հայտարարել էր Բաբայանը։