Դատարանը կքննի Գագիկ Խաչատրյանի գույքի բռնագանձման վերաբերյալ հայցը

Արմինֆո. Պետական եկամուտների կոմիտեի նախկին նախագահ, ՀՀ ֆինանսների նախկին նախարար Գագիկ Խաչատրյանից, նրա որդիներ Գուրգեն Խաչատրյանից, Արտյոմ Խաչատրյանից, եղբորորդի Արամ Խաչատրյանից և նրա հետ փոխկապակցված անձանցից գույքի բռնագանձման վերաբերյալ հայց է ներկայացվել դատարան:

Հակակոռուպցիոն դատարանի տեղեկատվության համաձայն, Խաչատրյաններից և նրանց հետ փոխկապակցված անձանցից բացի գործով պատասխանողներ են հանդիսանում Կիպրոսում, Շոտլանդիայում, Ֆրանսիայում և ԱՄՆ Կալիֆորնիա նահանգում գրանցված ընկերությունները:

Հիշեցնենք, որ մեկ տարի առաջ Գլխավոր դատախազությունը պահանջել էր ապօրինի ծագում ունեցող գույքի բռնագանձում ֆինանսների նախկին նախարար Գագիկ Խաչատրյանից և նրա հետ փոխկապակցված շուրջ 25 անձանցից (210 անշարժ գույք, որոնցից 60-ը գտնվում են Երևան քաղաքում): Բռնագանձման, ըստ վերահսկող մարմնի, ենթակա են նաև 14 տրանսպորտային միջոց, 33 իրավաբանական անձի բաժնետոմս և ավելի քան 40 մլրդ դրամ:

Նշենք, որ ֆինանսների նախկին նախարար Գագիկ Խաչատրյանը մեղադրվում է առանձնապես խոշոր չափերով յուրացումներ կատարելու և պաշտոնեական լիազորությունները չարաշահելու համար: Գագիկ Խաչատրյանը և նրա ազգականը՝ Կարեն Խաչատրյանը (ՊԵԿ նախկին աշխատակից), ձերբակալվել են օգոստոսի 27-ին: Գագիկ Խաչատրյանին մեղադրանք է առաջադրվել ՀՀ քրեական օրենսգրքի 308-րդ (պաշտոնեական լիազորությունները չարաշահելը, որն անզգուշությամբ առաջացրել է ծանր հետևանքներ - խմբ.), 179 - րդ (առանձնապես խոշոր չափերով յուրացնելը կամ վատնելը - խմբ.), 38-179-րդ (յուրացմանն օժանդակելը-խմբ.) և 314-րդ ( պաշտոնեական կեղծիք-խմբ.) հոդվածներով: Կարեն Խաչատրյանին մեղադրանք է առաջադրվել ՀՀ քրեական օրենսգրքի 179 - րդ (առանձնապես խոշոր չափերով յուրացում կամ վատնում - խմբ.) և 314-րդ (պաշտոնեական կեղծիք-խմբ.) հոդվածներով: Նրանք երկուսն էլ ձերբակալվել են, իսկ հետո կալանավորվել են 2019 թվականի օգոստոսի վերջին ։ Ըստ նախնական տեղեկությունների ՝ ՊԵԿ-ում գրանցվել են աշխատակիցներ, որոնց աշխատավարձ է վճարվել, բայց ովքեր իրականում աշխատանքի չեն գնացել: