Երկուշաբթի, 2 Հոկտեմբերի 2023 18:10

Արմինֆո. Ինչպես և պետք էր սպասել, Լեռնային Ղարաբաղում էթնիկ զտումներ իրականացնելով, Թուրքիան և Ադրբեջան ողջ ձայնով սկսեցին խոսել, այսպես կոչված, "Զանգեզուրի միջանցքի" մասին։

 

Թուրքական «A Haber» հեռուստաալիքին տված հարցազրույցում Թուրքիայի տրանսպորտի և ենթակառուցվածքների նախարար Աբդուլքադիր Ուրալօղլուն հայտարարել է, որ Անկարան այդ հարցը քննարկում է Երևանի հետ: "Թուրքիան Հայաստանի հետ քննարկում է 43 կմ երկարությամբ "Զանգեզուրի միջանցքի" բացումը: Հնարավոր է նաև, որ միջանցքն իրացվի Իրանի կողմից: Մենք մտածում ենք այդ ծրագիրն արագ կյանքի կոչելու մասին", - ասել է նախարարը։ Ուրալօղլուի խոսքով՝ նոր երթուղին կմիացնի "թուրքական երկու հանրապետություններն ու հեռավոր Արևելքն՝ ուղիղ գծով":

 

ԱրմԻնֆո-ին մեկնաբանելով այդ հնարավորությունը ' քաղաքագիտության դոկտոր, ՀՀ էներգետիկ անվտանգության ինստիտուտի ղեկավար Վահե Դավթյանը նշել է միջազգային դերակատարների շահագրգռվածությունն այդ նախագծի իրականացման հարցում: Նրա խոսքով ՝ բոլոր գործընթացները, որոնք տեղի են ունենում տարածաշրջանում, անմիջական կապ ունեն էներգետիկ, տրանսպորտային և լոգիստիկ ոլորտների հետ։ Բոլորովին վերջերս Եվրոպական միությունն Ադրբեջանի հետ համաձայնագիր է ստորագրել ԵՄ երկրներ գազի մատակարարումների ծավալների ավելացման շուրջ։ "Խոսքը 2027 թվականից սկսած դեպի Եվրոպա ադրբեջանական գազի մատակարարումների ծավալները մինչև 20 մլրդ խմ ավելացնելու մասին է ։ Պատճառն այն է, որ գործող "Հարավային գազային միջանցք" գազատարն ունի բավական սահմանափակ թողունակություն, և այն 20 մլրդ խմ, որը ԵՄ-ն մտադիր է ներմուծել Ադրբեջանից 2027 թվականից հետո, առավելագույն ծավալն է, - նշել է փորձագետը։

 

Նա ընդգծել է, որ լրացուցիչ ծավալների համար Եվրոպային անհրաժեշտ են նոր երթուղիներ Կասպից ծովի տարածաշրջանից բնական գազի և այլ ածխաջրածինների մատակարարման համար: Եվ այս առումով Հայաստանի  Սյունիքի մարզը սկսում է շատ կարևոր նշանակություն ձեռք բերել։ ""Զանգեզուրի միջանցք" կոչվող նախագիծը, որը փորձում են իրականացնել մեր հարևանները, պարզապես, տրանսպորտային հաղորդակցություն չէ, այլ, ինչպես բազմիցս հայտարարել է Ադրբեջանի էներգետիկայի նախարար Փարվիզ Շահբազովը, Թուրքիա և, այնուհետև, եվրոպական շուկաներ գազ և էլեկտրաէներգիա փոխադրելու հնարավորություն", - ասել է Վահե Դավթյանը:

 

Նա հավելել է, որ ակնհայտ է Ադրբեջանում իր բոլոր պայմանագրային պարտավորությունների ապահովման ռեսուրսային բազայի պակասը։ Դրա համար, ինչպես փորձագետը նշել է, Ադրբեջանին անհրաժեշտ է թուրքմենական գազ՝  "Զանգեզուրի միջանցքով" երրորդ երկրների շուկաներ վերաարտահանման համար: "Ես ավելի քան համոզված եմ, որ "Զանգեզուրի միջանցքի" նախագիծը ներգրվում է ԵՄ երկրներ էներգառեսուրսների մատակարարմաե ուղղությունների դիվերսիֆիկացման ռազմավարության մեջ, այդ թվում՝ նաև ռուսական գազի մատակարարումների տեսակարար կշիռը նվազեցնելու նպատակով", - ընդգծել է փորձագետը: -