Պատգամավոր. Հայաստանի ԱԱԾ-ն պետք է պարզի, թե ինչպես, ում միջնորդությամբ և ինչի շուրջ է Բաբայանը խոսել Ադրբեջանի հետ

Արմինֆո. Սամվել Բաբայանը Հ1-ի եթերում խոստովանել է, որ առանց Արցախի իշխանության գիտության, Ադրբեջանի հետ շփումների մեջ է եղել, առաջարկներ փոխանցել: Հանրային հեռուստաընկերության եթերում Բաբայանի երեկվա "բացահայտումները" այդպես է մեկնաբանել ԱԺ "Պատիվ ունեմ" խմբակցության պատգամավոր Տիգրան Աբրահամյանը։

«Մեր երկրում, եթե շարքային քաղաքացին Ադրբեջանի հետ կապի դուրս գա` ցանկացած թեմայով, ԱԱԾ-ն նվազագույնը համապատասխան աշխատանք կտանի: Արցախի երկրորդ ուժի առաջնորդը` ինքն է շատ սիրում այդպես ներկայանալ, իր ընտրողներին, իր քաղաքական ուժին, ժողովրդին թողել է աղետի մեջ` պատերազմ, խոշոր պայթյուն, հայրենազրկում, առաջիններից մեկը դուրս եկել Արցախից, իսկ հիմա Հ1-ի եթերում ուրախ-զվարթ խոստովանություններ է անում:

Հայաստանի ԱԱԾ-ն պետք է պարզի, թե ինչպե՞ս, ու՞մ միջնորդությամբ և ի՞նչի շուրջ է Բաբայանը խոսել Ադրբեջանի հետ` իր պատմած հեքիաթները մի կողմ:

ՀԳ. Մինչ Արցախում մարդիկ ճակատագրի ու դավաճանների հարվածների ծանր հետևանքներն են կրում, Սամվել Բաբայանը հայաստանյան իշխանության օրակարգն է սպասարկում, մեղադրում մարդկանց, ովքեր մինչև վերջին պահը փորձում են կյանքեր փրկել, Ադրբեջանին զսպել», - գրել է պատգամավորը՝ «Ֆեյսբուքի» իր էջում:

Նշենք, որ սեպտեմբերի 26-ին Սամվել Բաբայանը հարցազրույց էր տվել Հ1-ին, որտեղ ժպիտը դեմքին շրջապատում բոլորին մեղադրում է դավաճանության մեջ, մինչդեռ, ինքն առաջիններից է փախել հայրենիքից: Հայրենիքը կորցրած անձը ցինիզմով պատմում էր, թե ինչպես է անցել Ստեփանակերտ-Գորիս ճանապարհի Հակարի կամրջի մոտ գտնվող ադրբեջանական ապօրինի անցակետը, վստահեցնելով, թե, իբր, ադրբեջանցիները թույլ են տվել, քանի որ չեն ճանաչել: Բաբայանը, ով առաջիններից մեկն էր, ով փախավ Արցախից, լքելով իր ժողովրդին և ընտրողներին, հայտարարել է, թե, իբր, ԼՂՀ նախկին և գործող իշխանությունները, հատկապես, Արկադի Ղուկասյանը, Բակո Սահակյանը, Արայիկ Հարությունյանը, Սամվել Շահրամանյանը պետք է պատասխան տան և դատարանի առաջ կանգնեն ԼՂՀ-ն ոչնչացնելու համար։ Նրա հավաստմամբ ՝ հենց " Ռուսաստանն է տեքստը գրել, տվել իրենց ստորագրությանը, որպեսզի Հայաստանին ներգրավեն գործընթացում։ Դրանով է պայմանավորված այն, որ փաստաթղթում կար կետ այն մասին, որ Հայաստանը զորք ունի Արցախում։ Նպատակը ՀՀ - ին հերթական անգամ մեղադրելն է ստանձնած պարտավորությունները չկատարելու մեջ, իսկ ԼՂ իշխանությունները "հլու-հնազանդ համաձայնել են" դրան", - ասել է նա։

Սակայն այսքանով էլ Բաբայանը չի բավարարվել, հավաստիացնելով, որ "ԼՂՀ նախագահ Արայիկ Հարությունյանը հրաժարական է տվել ՌԴ ԱԴԾ  5-րդ ծառայության ցուցումով այն հիմքով, որ Լեռնային Ղարաբաղի նախկին նախագահները, նրանց մյուս գործակալները ԱԴԾ-ում գրել են, որ Արայիկ Հարությունյանն իրենց խաբում է շատ հարցերում":

Միաժամանակ Բաբայանը խոստովանել է, որ բանակցություններ է վարել Ադրբեջանի հետ ։ "Մենք Ադրբեջանի հետ պայմանագիր ունեինք Ինքնավար Հանրապետության մասին 4400 քառակուսի կիլոմետր տարածքում, որին Ադրբեջանը համաձայնել էր, 23 կետերից միայն 3 - ն էին, որոնք ես ներկայացրել էի Ադրբեջանին, վերապահումներ ունեին, իսկ Ղարաբաղի իշխանությունները դրան չհամաձայնեցին, ինչը նրանց դարձնում է պետական հանցագործներ", - նշել է նա:

Նա նաև առիթը բաց չի թողել քար նետել բարերար Ռուբեն Վարադանյանի բոստանը, հայտարարելով, թե, իբր, Ռուսաստանը դիմել է Ադրբեջանին ՝ "իր գործակալ Ռուբեն Վարդանյանին" դուրս բերելու խնդրանքով ։

Այնուհետև նա հայտնել է, որ պայմանավորվել է Ադրբեջանի հետ, որպեսզի Արցախի ողջ զինտեխնիկան փոխանցվի Հայաստանին, սակայն, իբր, ԼՂՀ իշխանությունները, այդ ամենը տվել են Ադրբեջանին ։ Ճիշտ է, Բաբայանը չի բացատրել, թե ինչ հիմքերով և ում թույլտվությամբ է նման բանակցություններ վարել ՝ լինելով միայն փոքր կուսակցության ղեկավար։

"Հայաստանի իշխանությունները պարտավոր են առգրավել Արցախը քանդած հանցագործների ողջ ունեցվածքը ։ Բոլորը համոզված էին, որ Ադրբեջանը ուժ չի կիրառելու, որովհետև այնտեղ ռուս խաղաղապահներ կան ։ Միայն ես էի ասում, որ ուժ կկիրառվի, որովհետև այլ ելք չկա, դրա համար պետք էր ուղղակի բանակցել Ադրբեջանի հետ ։ Նրանք չլսեցին", - ասել է նա: "Ռոբերտ Քոչարյան և Սերժ Սարգսյան, ովքեր հպարտությամբ շնորհավորեցին նոր նախագահին, ինչու՞ հիմա ձայն չեք հանում: Ասելիք ունե՞ք":

Բաբայանը նաեւ մեղադրանքներ է հնչեցրել ընդդիմության և ՀՀ վարչապետ Նիկոլ Փաշինյանի հրաժարականի պահանջով փողոց դուրս եկած մարդկանց հասցեին՝ նրանց մեղադրելով օտարերկրյա ուժերին, օտարերկրյա հատուկ ծառայություններին սպասարկելու համար: "Ռուսաստանը հասկանում է, որ, կորցնելով Հայաստանը, կկորցնի Հարավային Կովկասը, Միջին Ասիան, Հյուսիսային Կովկասում հակամարտություններ կսկսվեն, ուստի փորձում է ամեն գնով ճնշել դա և թույլ չտալ", - հավելել է Բաբայանը, այդպես էլ չպատմելով, թե ինչպես է նա, ով գտնվում է Ադրբեջանի հետախուզման բոլոր ցուցակներում, այդքան անարգել առաջիններից մեկը լքել Արցախը: