Երեթշաբթի, 26 Սեպտեմբերի 2023 18:08

Արմինֆո.Ադրբեջանի կողմից Լեռնային Ղարաբաղը Հայաստանին կապող միակ ճանապարհի ՝ Լաչինի (Քաշաթաղի) միջանցքի շրջափակումը վերջին 9 ամիսներին հումանիտար ծանր պայմաններ է ստեղծել նրա էթնիկ հայերի համար: Այդ մասին այսօր ՝ սեպտեմբերի 26-ին, Կոռնիձորում լրագրողների հետ զրույցում հայտարարել է ԱՄՆ Միջազգային զարգացման գործակալության (USAID) ղեկավար Սամանթա Փաուերը՝ նշելով սննդամթերքի եւ դեղորայքի պակասը։

 

Միևնույն ժամանակ, նա փաստել է, որ միջազգային մարդասիրական կազմակերպությունները հնարավորություն չեն ունեցել ներկա գտնվել տեղերում ՝ իրական իրավիճակը գնահատելու համար, քանի որ Ադրբեջանի իշխանությունները նրանց մուտքի թույլտվություն չեն տվել: Փաուերը նաև հավելել է, որ վերջին շաբաթվա ռազմական գործողություններն էլ ավելի են խորացրել առանց այդ էլ ծանր հումանիտար իրավիճակը: Այս համատեքստում նա ևս մեկ անգամ ընդգծել է մարդասիրական կազմակերպությունների ՝ Արցախ մուտքի անհրաժեշտությունը։

 

Նշելով Լեռնային Ղարաբաղից հեռանալ ցանկացողների տարհանման անհրաժեշտությունը՝ Փաուերը հաղորդել է, որ "ԱՄՆ-ը Հայաստանին կտրամադրի 11,5 միլիոն դոլարի աջակցություն՝ Լեռնային Ղարաբաղից տեղահանված մարդկանց մարդասիրական կարիքների համար":

 

Նա նաև հավելել է, որ ԱՄՆ-ը լինելու է Հայաստանի կառավարության, տեղական իշխանությունների, կամավորների կողքին, որոնք ջերմորեն ընդունում են Լեռնային Ղարաբաղից եկածներին: "Մենք աշխատելու ենք նրանց հետ, որպեսզի կարողանանք անհրաժեշտ աջակցություն ցուցաբերել այն ընտանիքներին, որոնք դրա կարիքն ունեն։ Զրուցում ենք Հայաստան տեղափոխված անձանց հետ, պարզում, թե ովքեր կցանկանային վերադառնալ կամ այցելել հարազատների շիրիմներին: Տեղաշարժի ազատությունը բացարձակապես անհրաժեշտ է", - ասել է նա, չմանրամասնելով, թե ինչպես է նախատեսվում ապահովել այդ "ազատությունը"՝ Լեռնային Ղարաբաղը Ադրբեջանի վերահսկողության տակ անցնելու պայմաններում ։

 

Միեւնույն ժամանակ,  Politico-ի լրագրողի այն հարցին, թե արդյոք նա կարող է "էթնիկ զտումներ" որակել այն, ինչ տեղի է ունենում այսօր Արցախում, հաշվի առնելով, որ նա գիրք է գրել էթնիկ զտումների մասին, Փաուերը հայտարարել է Լեռնային Ղարաբաղում միջազգային կազմակերպությունների ներկայության խիստ անհրաժեշտության մասին, քանի որ այնտեղ շարունակում են մնալ տասնյակ հազարավոր էթնիկ հայեր՝ այս ծանր պայմաններում:

 

"Մենք ականատեսներից արդեն լսել ենք ադրբեջանցիների կողմից բռնության, բնակչության տառապանքի, Ադրբեջանի իշխանությունների հանդեպ վախի մասին։ Մեր ուշադրության կենտրոնում են առավել խոցելի խմբերը, նրանց աջակցություն ցուցաբերելը, եթե նրանք ցանկանում են լքել Լեռնային Ղարաբաղը", - հայտարարել Է Փաուերը։

 

Հարցին, թե արդյոք չի եկել Ադրբեջանի նկատմամբ պատժամիջոցներ կիրառելու ժամանակը ՝ Արցախում էթնիկ զտումների ֆոնին, Փաուերը ևս մեկ անգամ նշել է, որ Հայաստան է ժամանել ԱՄՆ նախագահի հանձնարարությամբ՝ գնահատելու Լեռնային Ղարաբաղից հեռացող բնակչության մարդասիրական կարիքները: ԱՄՆ ՄԶԳ ներկայացուցիչը ձևացրել է, թե չի լսել պատժամիջոցների հարցը, միայն հավաստիացրել է, որ այստեղ տեսածը կփոխանցի նախագահի աշխատակազմին, և որոշում կկայացվի հետագա քայլերի վերաբերյալ: Նրա խոսքով ՝ այժմ դիտարկվում են մի քանի միջոցներ, սակայն այդպես էլ չասելով, թե ինչ միջոցների մասին է խոսքը ։