Հինգշաբթի, 21 Սեպտեմբերի 2023 19:50

Արմինֆո. Վարչապետ Նիկոլ Փաշինյանը պնդում է, որ Լեռնային Ղարաբաղի դեմ Ադրբեջանի ագրեսիայի նպատակներից մեկը եղել է Հայաստանին պատերազմի մեջ ներքաշելը: Այդ մասին նա հայտարարել է սեպտեմբերի 21-ի երեկոյան ֆեյսբուքյան ուղիղ եթերի ժամանակ։

 

Փաշինյանի խոսքով, դեռևս Լեռնային Ղարաբաղի վրա Ադրբեջանի հարձակման օրը ինքը վարկած է առաջ քաշել, որ "այս գործընթացի" նպատակներից մեկը Հայաստանին ռազմական գործողությունների մեջ նեքաշելն ու ՀՀ-ում քաոս ստեղծելն է: "Եվ այն, որ այսօր հաստատվել է հրադադարի ռեժիմը, դա ամենևին չի նշանակում, որ այդ հարցը (ՀՀ-ին պատերազմի մեջ ներքաշելը-խմբ.) դրված չէ այն օրակարգ բերողների օրակարգում", - նշել է նա:

 

Վարչապետը, ինչպես եւ սեպտեմբերի 20-ին ՝ հրադադարի մասին ՌԽԶ-ի առաջարկն ընդունելու մասին Ստեփանակերտի հայտարարությունից անմիջապես հետո, ընդգծել է, որ Հայաստանը չի մասնակցել փաստաթղթի մշակմանը, "պայմանների քննարկման կողմ չի եղել": "Մենք տեղեկացվել ենք, որ նման գործընթացներ տեղի են ունենում, բայց մենք որևէ կերպ չենք մասնակցել դրան ։ Եվ ես իմ տարակուսանքն եմ հայտնել այն համատեքստում, որ այդ փաստաթղթում հիշատակվում է Հայաստանի ԶՈՒ ստորաբաժանման դուրսբերման մասին այն պայմաններում, երբ Երևանը բազմիցս հայտարարել է ԼՂ - ում ՀՀ բանակի բացակայության մասին", - նշել է նա ։

 

Փաշինյանը նշել է, որ հրադադարի հաստատման գործընթացը վարել են ՌԽԶ ներկայացուցիչները ՝ Լեռնային Ղարաբաղի ներկայացուցիչների հետ համատեղ։ Նրա խոսքով ՝ ԼՂ - ում բոլոր որոշումները ընդունվել են ԼՂ իշխանությունների կողմից ընդլայնված կազմով ՝ կառավարության, ԱԺ անդամների, ինչպես նաև երկրի նախկին ղեկավարների մասնակցությամբ:

 

Հիշեցնենք, որ սեպտեմբերի 19 - ին Լեռնային Ղարաբաղի վրա Ադրբեջանի հարձակումից հետո վարչապետ Նիկոլ Փաշինյանը ֆեյսբուքյան ուղիղ եթերի ժամանակ "արձանագրել էր Հայաստանին ռազմական էսկալացիայի մեջ ներքաշելու փորձեր": Նա կոչ էր արել ՀՀ քաղաքացիներին իրավիճակին վերաբերվել սթափ, սառը գլխով և զերծ մնալ որևէ <չհաշվարկված, կտրուկ, արկածախնդիր գործողություններից>: Սեպտեմբերի 20-ին, արդեն Ստեփանակերտի կողմից հրադադար հաստատելու առաջարկն ընդունելու մասին հայտարարությունից հետո, մասնավորապես, Լեռնային Ղարաբաղից "Հայաստանի Հանրապետության զինված ուժերի մնացած ստորաբաժանումների եւ զինծառայողների դուրսբերման" պայմանով, Փաշինյանը նշել էր, որ "փաստաթղթում ՀՀ-ի մասին հիշատակումը, որն, ըստ էության, ՀՀ-ի հետ կապ չունի", արդարացնում է նախօրեին հնչեցրած իր վարկածը, որ Լեռնային Ղարաբաղի դեմ ագրեսիայի նպատակներից մեկը եղել է Հայաստանին ռազմական գործողություններում ներգրավելը, ինչը, ի վերջո, հարվածի տակ կդներ ՀՀ ինքնիշխանությունն ու անկախությունը: Նա նաեւ հայտարարել էր, թե այսուհետ ԼՂ հայերին լիարժեք եւ անվերապահ պաշտպանելու պարտավորությունը եւ իրենց տներում, իրենց հողում արժանապատիվ եւ անվտանգ ապրելու հայերի իրավունքների ապահովումը դրված է ՌԽԶ-ի վրա, իսկ ՀՀ իշխանությունները "գործնական առումով կհետեւեն իրադարձություններին":