Հայաստանի ԱԳՆ-ն արձագանքել է պաշտոնական Բաքվի հայտարարությանը

Արմինֆո. Հայաստանի արտաքին գործերի նախարարությունը պատասխանել  է Ադրբեջանի արտաքին քաղաքական գերատեսչության հայտարարությանը, որն արձագանքել է ՀՀ վարչապետ Նիկոլ Փաշինյանի այսօրվա հայտարարությանը:

Հիշեցնենք, այսօր կառավարության նիստում վարչապետ Նիկոլ Փաշինյանը հայտարարել էր, որ անցած շաբաթ Հարավային Կովկասում ռազմաքաղաքական իրավիճակը զգալիորեն սրվել է, ինչը պայմանավորված է Լեռնային Ղարաբաղի հետ շփման գծի երկայնքով և Հայաստանի հետ սահմանին ադրբեջանական զորքերի կուտակումներով: Հիշեցնելով Լաչինի միջանցքի շարունակվող ապօրինի շրջափակման և սեպտեմբերի 1-ին Գեղարքունիքի մարզի Սոթքի հատվածում տեղի ունեցած հերթական սադրանքի մասին, որի հետևանքով զոհվել է ՀՀ ՊՆ 3 զինծառայող, Փաշինյանը նշել է, որ վերջին գործողություններով Բաքուն ի ցույց է դնում Հայաստանի և Լեռնային Ղարաբաղի դեմ նոր ռազմական սադրանք իրականացնելու իր մտադրությունը:

Հայաստանի վարչապետ Նիկոլ Փաշինյանի մեղադրանքները Ադրբեջանի հասցեին Բաքվում անվանել են "Հայաստանի կողմից հերթական կեղծ քաղաքական մանիպուլյացիայի բաղկացուցիչ մասը": Ադրբեջանի արտաքին քաղաքական գերատեսչության կարծիքով, "տարածաշրջանում անվտանգության իրական սպառնալիք են Հայաստանի կողմից շարունակվող ռազմաքաղաքական սադրանքները, հայկական կողմի, այդ թվում նաև վարչապետի կողմից շարունակվող հավակնությունները Ադրբեջանի տարածքային ամբողջականության և ինքնիշխանության նկատմամբ, հայկական զինված ուժերը, որոնք, ի հեճուկս ստանձնած պարտավորությունների, դեռևս դուրս չեն բերվել ադրբեջանական տարածքներից" (պաշտոնական Երևանը բազմիցս հայտարարել է, որ Հայաստանը Լեռնային Ղարաբաղում զինված ուժեր չունի-խմբ.): "Տարածաշրջանում խաղաղության եւ անվտանգության հաստատման համար հայկական կողմը պետք է հրաժարվի Ադրբեջանի նկատմամբ տարածքային հավակնություններից, դադարեցնի ռազմական եւ քաղաքական սադրանքները, դադարեցնի խաղաղության պայմանագրի շուրջ բանակցային գործընթացի հաջող ավարտի ճանապարհին խոչընդոտները", - նշում է պաշտոնական Բաքուն:

Ինչպես հաղորդում է Հայաստանի ԱԳՆ մամուլի ծառայությունը, ՀՀ կառավարության 2023թ. սեպտեմբերի 7-ի նիստում ՀՀ վարչապետ Նիկոլ Փաշինյանի ելույթից հետո Ադրբեջանի արտաքին գործերի նախարարության տարածած հայտարարության առնչությամբ Հայաստանի ԱԳՆ-ը անհրաժեշտ է համարում ընդգծել հետևյալը։

«Սոցիալական ցանցերի ադրբեջանցի օգտատերերը և լրատվամիջոցներն իրենք են հրապարակել Հայաստան-Ադրբեջան սահմանի մոտակայքում և Լեռնային Ղարաբաղի շփման գծի երկայնքով ադրբեջանական զորքեր կուտակելու մասին վկայող տեղեկություններ, ինչը հաստատվում է նաև այլ աղբյուրների տեղեկատվությամբ: 

Վերոհիշյալ ելույթում ՀՀ վարչապետը հայտարարել է, որ ՀՀ-ը հավատարիմ է 2022թ. հոկտեմբերի 6-ին Պրահայում, 2022թ. հոկտեմբերի 31-ին Սոչիում և 2023թ. մայիսի 14-ին Բրյուսելում ձեռքբերված պայմանավորվածություններին, ինչով վերահաստատվել է Հայաստանի և Ադրբեջանի կողմից փոխադարձաբար միմյանց տարածքային ամբողջականության անվերապահ ճանաչումը: Հայաստանն Ադրբեջանից ոչ մի տարածքային պահանջ չունի և նույնն ակնկալում է Ադրբեջանից, որը մինչ օրս հրապարակայնորեն չի հաստատել իր հավատարմությունն այդ պայմանավորվածություններին: 

Հայաստանը շահագրգռված չէ ռազմական էսկալացիայով, նախկինում առաջարկել է, հիմա էլ առաջարկում է նման ռիսկերը բացառելու մեխանիզմներ, որոնք մինչ օրս անպատասխան են մնացել, և պատրաստ է քննարկել արդյունավետ այլ մեխանիզմների ներդրումը նույնպես: 

ՀՀ պատրաստ է շարունակել ակտիվ ջանքեր ներդնել հնարավորինս շուտ Ադրբեջանի հետ խաղաղության և հարաբերությունների կարգավորման պայմանագրի նախագծի շուրջ աշխատանքներն ավարտելու և այն ստորագրելու ուղղությամբ: 

ՀՀ նվիրված է և շարունակում է հավատարիմ լինել Հարավային Կովկասում խաղաղության և կայունության օրակարգին՝ միևնույն ժամանակ ընդգծելով պաշտոնական Բաքվի կողմից նույնպիսի հռետորաբանության և գործնական ազդակների անհրաժեշտությունը:

Ակնհայտ է, որ Լաչինի միջանցքի արգելափակումը, Լեռնային Ղարաբաղում հաստատված հումանիտար ճգնաժամը և Բաքու-Ստեփանակերտ երկխոսության բացակայությունը՝ միջազգային մեխանիզմի շրջանակներում, չի նպաստում տարածաշրջանում մթնոլորտի բարելավմանը