«Թաթոյան» հիմնադրամ. Ակնայի ճանապարհի բացումը գոյաբանական սպառնալիք է Արցախի հայերի համար

Արմինֆո.Ակնայի (Աղդամի) ճանապարհի բացումը գոյաբանական սպառնալիք է Արցախի հայերի համար և չի կարող այլընտրանք լինել Բերձորի (Լաչինի) միջանցքին: Այդ մասին ասվում է նախկին օմբուդսմեն Արման Թաթոյանի "Թաթոյան" հիմնադրամի հրատապ զեկույցում:

«Միջանցքը երաշխավորում է Արցախի էթնիկ հայերի ինքնության պահպանումը։ Ակնայի ճանապարհը կշրջանցի Ադրբեջանի նկատմամբ իրավական արգելքները, որոնք գործում են միջանցքի պարագայում։

Ադրբեջանի կողմից միջանցքի նկատմամբ միջազգային անվտանգության իր պարտավորությունների շրջանցումը կխոչնդոտի բանակցած ցանկացած բանաձևի իրագործում: Ակնայի Ճանապարհը կօգտագործվի Ադրբեջանի կողմից՝ ուժեղացնելու իր հակահայկական քաղաքականությունը», - ընդգծել են հիմնադրամում, հավելելով, որ Ադրբեջանը կօգտագործի Ակնայի ճանապարհը՝ Միջանցքը անօգտագործելի դարձնելու համար:

Հիմնադրամում համոզված են, որ Ադրբեջանը կօգտագործի Ակնայի ճանապարհը՝ Ադրբեջանից Արցախի հայերին ամբողջական կախվածության մեջ դնելու համար։

«Ակնայի ճանապարհը գործիք կդառնա Ադրբեջանի կողմից արցախահայությանը ճնշելու համար։

Ադրբեջանը կօգտագործի Ակնայի ճանապարհը՝ Արցախի ներսում հատուկ ռազմական գործողություններ իրականցնելու համար։ Ադրբեջանը կօգտագործի Ակնայի ճանապարհը՝ Արցախի հայերի առևանգումներ իրականացնելու համար` չլինելով կաշկանդված որևէ բանով:

Ակնայի ճանապարհը բացում է Ադրբեջանի կամայականության և որևէ բսնով չսահմանափակված վարքագծի լիարժեք իրական հեռանկար։  Ակնայի ճանապարհը չի ունենա որևէ այլ երրորդ կողմի հակակշիռներ և վերահսկողություն՝ Ադրբեջանի իշխանության կամ վարքագծի նկատմամբ:  Գոյություն չի ունենա ներքին վերահսկողություն նաև կամայականությունների նկատմամբ։  Ակնայի ճանապարհի բացումը կլեգիտիմացնի Ադրբեջանի անպատժելիությունը և կվերացնի թափանցիկությունը՝ որպես ընդդեմ կամայականության մնացած միակ միջոց», - համոզված են «Թաթոյան» հիմնադրամում:

Հիմնադրամի հաղորդագրության համաձայն, այս հրատապ զեկույցը պատրաստվել է ԱՄՆ հայտնի փաստաբաններ Կարօ Ղազարեանի  և Գառնիկ Քերքոնեանի անմիջական մասնակցությամբ: Զեկույցի ամբողջական տարբերակը՝ https://tatoyanfoundation.org/.../opening-of-the-Akna...