Երևանի բնակիչները, հիմնականում, անտարբեր են ավագանու ընտրությունների նկատմամբ

Արմինֆո.Հայաստանի քաղաքական ուժերը, կարծես, ոչ մի ջանք չեն գործադրում, որպեսզի կոտրեն Երեւանի բնակիչների պասիվ հետաքրքրությունը տեղական ընտրությունների նկատմամբ եւ ակտիվացնեն քաղաքական գործընթացը: Նման կարծիքի են հանգել "Ժողովրդի ձայն" փորձագիտական ակումբի մասնակիցները Երևանի ավագանու ընտրություններին ընդառաջ: Նրանք մշտադիտարկում են անցկացրել՝ նվիրված ինչպես քարոզարշավի բուն մեկնարկին, այնպես էլ ընտրություններին մասնակցող քաղաքական ուժերի մեկնարկային հնարավորություններին։

Նաև, ինչպես նշում են ակումբի փորձագետները, նկատելի է, որ որոշ ուժեր փորձում են արտաքին քաղաքական ֆոն հաղորդել առաջիկա ընտրություններին։ Այսպես, օրինակ, Եվրոպական կուսակցության ղեկավար Տիգրան Խզմալյանը քարոզչություն է իրականացնում ԵՄ դրոշի ներքո, իսկ "Հանրապետություն" կուսակցության առաջնորդ Արամ Սարգսյանը քարոզարշավի ժամանակ կրկին բարձրացնում է ՀԱՊԿ-ից Հայաստանի դուրս գալու հարցը։ Ի հակադրություն՝ "Հանուն սոցիալական արդարության" կուսակցությունն իրեն դիրքավորում է որպես ուժ, որը հանդես է գալիս հայ-ռուսական հարաբերությունների զարգացման և ամրապնդման օգտին:

Դիտարկման փորձագետները նշում են, որ քաղաքական ուժերի մեծ մասի քարոզարշավում գերակշռում է պոպուլիզմը, իրական խնդիրներն իրենց արտացոլումը չեն գտնում, և չեն ներկայացվում երևանցիներին հուզող խնդիրների լուծման ուղիները: Փոխարենը՝ պարտադրվում է այլընտրանքային իրականություն ՝ դժվար իրագործելի ծրագրերով։ Այսպես, իշխանական թեկնածուն խոստանում է ամեն տարի մետրոյի նոր կայարան բացել, մյուս թեկնածուն խոսում է տրանսպորտն անվճար դարձնելու մասին։ Նման այլ անհիմն խոստումներ էլ են լսվում։

Մինչդեռ, ինչպես վկայում են ակումբի հարցումները երեւանցիների շրջանում, նրանց հետաքրքրում են այնպիսի խնդիրների լուծումները, ինչպիսիք են ջրամատակարարումը, աղբահանությունը, Երեւանում օդի աղտոտվածության աննախադեպ մակարդակը, փողոցները խցանումներից բեռնաթափելը եւ այլն: Երեւանցիներին նաեւ շատ են հետաքրքրում առողջապահության ոլորտին, մանկապարտեզներում տեղերի պակասի խնդրին վերաբերող հարցերը: Այս հարցումներն անցկացվել են Երևանի բոլոր վարչական շրջաններում՝ շուրջ 1200 երևանցիների շրջանում։

Հիշեցնենք, որ Երևանի ավագանու ընտրությունները տեղի կունենան սեպտեմբերի 17-ին: Երևանի ապագա քաղաքապետի պաշտոնի գլխավոր հավակնորդը ՝ փոխքաղաքապետ Տիգրան Ավինյանը, գլխավորում է "Քաղաքացիական պայմանագիր" կուսակցության ցուցակը: 2021 թվականին Փաշինյանի կողմից Երևանի քաղաքապետի պաշտոնից հեռացված Հայկ Մարությանը ևս հավակնում է վերադառնալ պաշտոնին ՝ գլխավորելով նոր, քիչ հայտնի "Ազգային առաջընթաց" կուսակցության ցուցակը։ Երևանի քաղաքապետ է ուզում դառնալ նաև ընդդիմադիր "Հայաստան" խմբակցության պատգամավոր Անդրանիկ Թևանյանը, ով գլխավորում է "Մայր Հայաստան" դաշինքը: "Հանրապետություն" կուսակցության ցուցակը գլխավորում է արդարադատության նախկին նախարար Արտակ Զեյնալյանը: Քաղաքապետի թեկնածու է նաև "Ապրելու երկիր" կուսակցության նախագահ Մանե Թանդիլյանը, ում թիկունքում, համարվում է, կանգնած է բարերար, գործարար Ռուբեն Վարդանյանը: Երևանի ավագանու ընտրություններին մասնակցելու հայտ է ներկայացրել նաև "Լուսավոր Հայաստան" կուսակցությունը, որի ցուցակի առաջին համարն ավագանու անդամ Դավիթ Խաժակյանն է:

Ընտրություններին մասնակցում են նաև Հայաստանի Եվրոպական կուսակցությունը (քաղաքապետի թեկնածու Տիգրան Խզմալյան), <Միասնական Հայաստան> (քաղաքապետի թեկնածու Երվանդ Թարվերդյան), <Ժողովրդավարական համախմբում> (քաղաքապետի թեկնածու Սուրեն Պետրոսյան), <Հանուն սոցիալական արդարության> (քաղաքապետի թեկնածու Արման Ղուկասյան), <Հայրենյաց ուժը> (քաղաքապետի թեկնածու Նելլի Հարությունյան), <Հաղթանակ> (քաղաքապետի թեկնածու Վիկտոր Մնացականյան), <Հանրային ձայն> (քաղաքապետի թեկնածու Արտակ Գալստյան) և <Արդար Հայաստան> (քաղաքապետի թեկնածու Նորայր Նորիկյան) կուսակցությունները: