Արմինֆո. Որպես Երևանի և Բաքվի հաշտեցման անայլընտրանքային հիմք դիտարկում ենք Ռուսաստանի, Ադրբեջանի նախագահների և Հայաստանի վարչապետի 2020-2022 թվականների հայտարարությունների ամբողջությունը։ Այդ մասին ԱրմԻնֆո-ին հայտարարել են Ռուսաստանի ԱԳՆ-ում' ի պատասխան այն հարցին, թե արդյոք Ռուսաստանը նախատեսում է ՄԱԿ Անվտանգության խորհրդում բանաձև նախաձեռնել Արցախում սուր հումանիտար ճգնաժամի և Լաչինի (Քաշաթաղի) միջանցքի շուրջ ստեղծված իրավիճակի վերաբերյալ:
Ռուսաստանի արտաքին քաղաքական գերատեսչությունում հավելել են, որ Մոսկվան կշարունակի գործադրել բոլոր ջանքերը Լեռնային Ղարաբաղում ճգնաժամային իրավիճակի շուտափույթ լուծման և երկու բարեկամ պետությունների միջև հարաբերությունների կարգավորմանը նպաստելու համար: Այս առումով ՌԴ ԱԳՆ-ում մատնանշել են ռուսական խաղաղապահ զորակազմի կայունացնող դերը։
"Ինչ վերաբերում է տվյալ խնդիրը ՄԱԿ Անվտանգության խորհրդի հարթակում քննարկելու հնարավորությանը, ապա ելնում ենք կողմերի միջեւ ուղիղ երկխոսության նախապատվությունից՝ առանց հակասությունները գլոբալ ֆորումներ մտցնելու, որտեղ մեծանում են դրսից "դեղատոմսեր" պարտադրելու ռիսկերը. նման սցենարները, ըստ սահմանման, կենսունակ չեն։ Այժմ ավելի քան երբևէ կարևոր է "գետնի վրա" աշխատանքը։ Առաջին հերթին, խոսքը վերաբերում է Աղդամի (Ակնա) և Լաչինի երթուղիների զուգահեռ բացման ՌԴ ԱԳ նախարար Սերգեյ Լավրովի նախաձեռնության իրականացմանը։ Դա, գործնականում, կօգներ Լեռնային Ղարաբաղում հումանիտար իրադրության բարելավմանը", - համոզմունք են հայտնել Ռուսաստանի ԱԳՆ-ում։
Միևնույն ժամանակ, Ռուսաստանի արտաքին քաղաքական գերատեսչությունում հիշեցրել են, որ օգոստոսի 16-ին ՄԱԿ ԱԽ-ում կայացած նիստը հաստատել է նման մոտեցման արդարացիությունը: Մոսկվայում ուշադրություն են հրավիրել այն հանգամանքին, որ ԱԽ շատ անդամներ կողմ են արտահայտվել նշված եռակողմ հայտարարությունների պահպանմանը:
"Հնչել են Բաքվի և Երևանի միջև երկխոսությունը շարունակելու կոչեր։ Ի դեպ, միջոցառման ընթացքում ոչ ոք չի հիշատակել Անվտանգության խորհրդի բանաձևի մշակման անհրաժեշտության մասին։ Մեր հերթին՝ հետագայում ևս կխրախուսենք Բաքվի և Երևանի միջև ուղիղ շփումները՝ երկկողմ կարգավորման փոխընդունելի ձևեր գտնելու նպատակով։ Մշտապես պատրաստ ենք դրա համար բանակցային հարթակ տրամադրել ռուսական տարածքում", - ամփոփել են ՌԴ ԱԳՆ-ում։
Նշենք, որ ավելի վաղ հայկական ԶԼՄ-ներում տեղեկատվություն էր տարածվել այն մասին, որ ԱՄՆ-ը տորպեդահարել է Արցախի շուրջ իրավիճակի վերաբերյալ ինչ-որ բանաձևի համաձայնեցումը ՄԱԿ Անվտանգության խորհրդի վերջին հրատապ նիստում, որը գումարվել էր օգոստոսի 16-ին՝ Հայաստանի նախաձեռնությամբ:
Մինչդեռ, Հայաստանում ԱՄՆ դեսպանությունում հայտարարել են, որ բանաձևի նախագիծ չեն տեսել։ Այնտեղ, մասնավորապես, նշել են. "Անցած չորեքշաբթի Լեռնային Ղարաբաղի հարցի վերաբերյալ ՄԱԿ Անվտանգության խորհրդի նիստում ՄԱԿ-ում ԱՄՆ մշտական ներկայացուցիչ, դեսպան Լինդա Թոմաս-Գրինֆիլդի նախագահությամբ քննարկվել են ընթացիկ հումանիտար իրավիճակի հետ կապված հարցեր ։ Մենք բանաձևի նախագիծ չենք տեսել, և պնդումները, թե Միացյալ Նահանգները ճնշում է գործադրել անդամ պետությունների նկատմամբ, որպեսզի նրանք չստորագրեն բանաձևը, բացարձակ սուտ են":
Ուշագրավ է, որ նախօրեին Le Figaro-ն հաղորդել է, որ Ֆրանսիան պատրաստվում է ՄԱԿ Անվտանգության խորհուրդ ներկայացնել Քաշաթաղի միջանցքն ադրբեջանցիների կողմից շրջափակելու պատճառով սովի եզրին գտնվող Արցախի 120 հազար բնակիչներին օգնություն տրամադրելու մասին բանաձևի նախագիծ: "Փարիզը և Ֆրանսիայի հիմնական շրջանները հաջորդ շաբաթ մարդասիրական ավտոշարասյուն կուղարկեն Հայաստան", - ասվում է հոդվածում:
ԱրմԻնֆո-ի ճշտմանը, թե արդյոք, իրոք, նախատեսվում է բանաձևի նախաձեռնում Փարիզի կողմից, ՀՀ-ում Ֆրանսիայի դեսպանատանը նշել են, որ իրենք ավելացնելու ոչինչ չունեն, բացի այն, ինչ հայտարարել է Ֆրանսիայի նախագահ Էմանուել Մակրոնը Le Point-ի հարցազրույցում:
Նշենք, որ ավելի վաղ Ֆրանսիայի նախագահը դատապարտել էր Ադրբեջանի կողմից Լեռնային Ղարաբաղի շրջափակումը: Նա հայտարարել է, որ Արցախի հարցում դիվանագիտության համար հատկացված ժամանակը սպառվել է։ "Մեր դիրքորոշումը հստակ է. ցավում ենք և դատապարտում. բայց արդեն դիվանագիտության ժամանակը չէ։ Մենք միշտ հայտարարել ենք, որ հանդես ենք գալիս ժողովուրդների ինքնիշխանության օգտին", - ընդգծել էր Ֆրանսիայի ղեկավարը։
Ֆրանսիայի նախագահը Լեռնային Ղարաբաղի հարցում նաեւ ընդգծել Էր Փարիզի դերը, որը ձգտում է երաշխավորել հումանիտար հասանելիությունը, սակայն հրաժարվել էր հայերի նկատմամբ իրականացված հանցագործությունները որակել "ցեղասպանություն": "Անընդունելի է հումանիտար իրավիճակը, մասնավորապես, Լաչինի միջանցքում։ Ֆրանսիայի դերը կայանում է նրանում, որ շարունակի ճնշում գործադրել մարդասիրական հասանելիություն ստանալու համար, և մենք շարունակում ենք ամեն ջանք գործադրել այդ նպատակին հասնելու համար", - հայտարարել էր Մակրոնը: