Արմինֆո.Արցախի մարդու իրավունքների պաշտպանը սեփական նախաձեռնությամբ քննարկում է սկսել Դավիթ Մինասյանի հրապարակային հաղորդման վերաբերյալ:
«2023 թվականի օգոստոսի 21-ին Արցախի Հանրապետության քաղաքացի Դավիթ Մինասյանը «Facebook» սոցիալական ցանցի իր կողմից վարվող նույն անվամբ օգտահաշվով հրապարակել է գրառում այն մասին, որ Արցախի Հանրապետության ներքին գործերի նախարարության ոստիկանության Ասկերանի շրջանային բաժնի աշխատակիցներն իրեն ծեծի են ենթարկել (https://www.facebook.com/photo?fbid=266990696111548&set=a.151533657657253): Գրառմանը կից Դ.Մինասյանը հրապարակել է լուսանկար, որտեղ անձի մարմնի վրա առկա են այտուցների և քերծվածքների տեսքով մարմնական վնասվածքներ:
Առաջնորդվելով «Մարդու իրավունքների պաշտպանի մասին» օրենքով խոշտանգումների և այլ դաժան, անմարդկային կամ արժանապատվությունը նվաստացնող վերաբերմունքի կանխարգելման շրջանակներում Մարդու իրավունքների պաշտպանին վերապահված լիազորություններով և ղեկավարվելով «Մարդու իրավունքների պաշտպանի մասին» օրենքի 15-րդ հոդվածով և 19-րդ հոդվածի 3-րդ մասով՝ Պաշտպանը սեփական նախաձեռնությամբ սկսել է քննարկում Դավիթ Մինասյանի հրապարակային հաղորդման վերաբերյալ», - ասվում է Արցախի ՄԻՊ գրասենյակի հաղորդագրությունում:
Նշենք, որ ավելի վաղ սոցիալական ցանցերում լուրեր էին տարածվել, որ արցախցի բլոգերը ծեծի է ենթարկվել իրավապահների կողմից՝ Արցախի նախագահ Արայիկ Հարությունյանի նմանակման հրապարակումից հետո: Երկու րոպեանոց հոլովակում Դավիթ Մինասյանը ծաղրում է Հայաստանի և Արցախի գործող իշխանությունների քաղաքականությունը ՝ նրանց մեղադրելով ԼՂՀ-ն Ադրբեջանին հանձնելու համար: