ՌԴ ԱԳՆ. Ռուսաստանը բոլոր փուլերում ամենագործուն մասնակցությունն է ունեցել Լեռնային Ղարաբաղի հակամարտության կարգավորմանը

Արմինֆո.Հայաստանն ու Ադրբեջանը "տնային մշակման" են վերցրել տարածաշրջանում լարվածության թուլացման վերաբերյալ Ռուսաստանի առաջարկները։ Այդ մասին հայտարարել է ՌԴ ԱԳՆ ԱՊՀ երկրների չորրորդ դեպարտամենտի տնօրեն Դենիս Գոնչարը՝ ՏԱՍՍ-ին տված հարցազրույցում։

"Ռուսաստանի, Ադրբեջանի և Հայաստանի արտգործնախարարների մակարդակով վերջին շփումները տեղի են ունեցել հուլիսի 25-ին Մոսկվայում՝ Լեռնային Ղարաբաղում ծայրահեղ բարդ իրավիճակի ֆոնին։ Առանց զգայուն մանրամասներ բացահայտելու, կարող եմ ասել, որ մեր կողմից առաջարկվել են լարվածության թուլացման փոխզիջումային հանգուցալուծումներ, որոնք կողմերը վերցրել են "տնային մշակման, - ասել է նա։ - Ակնկալում ենք, որ մարդասիրական նկատառումները, հասարակ մարդկանց հանդեպ հոգատարությունը կգերազանցեն Բաքվի և Երևանի միջև առկա քաղաքական տարաձայնությունները"։

Դիվանագետն ուշադրություն է հրավիրել այն հանգամանքի վրա, որ Ռուսաստանը բոլոր փուլերում ամենագործուն մասնակցությունն է ունեցել Լեռնային Ղարաբաղի հակամարտության կարգավորման գործում: "2020 թվականի նոյեմբերին Ռուսաստանի աջակցությամբ և նախագահ Վլադիմիր Պուտինի անձնական մասնակցությամբ դրվեցին Ադրբեջանի և Հայաստանի միջև հաշտեցման ներկա փուլի հիմքերը, 2020-2022 թվականներին մշակվեց հայ-ադրբեջանական կարգավորման ճանապարհային քարտեզ ՝ Ռուսաստանի, Ադրբեջանի և Հայաստանի առաջնորդների եռակողմ պայմանավորվածությունների համալիրի հիման վրա", - նշել է ռուս դիվանագետը։

Գոնչարը նաև նշել է, որ ռուսական կողմը շարունակում է եռանդուն միջնորդական ջանքերը բոլոր ուղղություններով, ներառյալ տարածաշրջանում տնտեսական և տրանսպորտային հաղորդակցությունների ապաշրջափակումը, հայ-ադրբեջանական սահմանի սահմանազատման գործընթացի մեկնարկը, Բաքվի և Երևանի միջև խաղաղության պայմանագրի համաձայնեցումը, հասարակության ներկայացուցիչների և փորձագետների գծով երկխոսության զարգացումը: "Ամեն ինչ չէ, որ շարժվում է այնքան արագ, որքան կցանկանայինք, սակայն դա հասկանալի է ՝ հաշվի առնելով հակամարտության տարիներին կուտակված խնդիրների ու հակասությունների զանգվածը, - շարունակել է նա։ - Ընդ որում, արհեստականորեն չենք արագացնում աշխատանքը եւ չենք ձգտում հանդիպումներ անցկացնել հենց հանդիպումների համար, ինչով հաճախ մեղք են գործում մեր արեւմտյան գործընկերները" ։

Ինչ վերաբերում է Հարավային Կովկասում տնտեսական եւ տրանսպորտային հաղորդակցությունների ապաշրջափակմանը, նշել  է դիվանագետը, այդ հարցերը առարկայականորեն քննարկվում են եռակողմ աշխատանքային խմբի գծով ՝ Ռուսաստանի, Ադրբեջանի եւ Հայաստանի փոխվարչապետների համանախագահությամբ: Նա ասել է, որ եռակողմ աշխատանքային խմբի վերջին նիստը տեղի է ունեցել հունիսի 2-ին Մոսկվայում: "Դրա արդյունքներով կողմերը էական առաջընթաց են արձանագրել Ադրբեջանի եւ Հայաստանի միջեւ տրանսպորտային հաղորդակցությունների ապաշրջափակման եղանակների համաձայնեցման հարցում, մասնավորապես, ընդհանուր ըմբռնում է ձեռք բերվել Երասխ-Ջուլֆա-Մեղրի-Հորադիզ, երթուղով երկաթուղային հաղորդակցության վերականգնման եւ կազմակերպման կոնկրետ քայլերի իրականացման վերաբերյալ, - նշել է դեպարտամենտի տնօրենը: - Հուլիսի 25-ին Մոսկվայում Ռուսաստանի, Ադրբեջանի և Հայաստանի արտաքին գործերի նախարարների եռակողմ հանդիպման ընթացքում այս թեման ևս շոշափվել է, մեր կողմից ցանկություն է հայտնվել այս աշխատանքը հնարավորինս արագ տեղափոխել նախագծային փուլ"։

Նրա խոսքով ՝ Ռուսաստանը ձգտում է այն բանին, որպեսզի "այդ ուղու բոլոր պայմանավորվածությունները լինեն պարիտետային" ։ "Կողմերից ոչ մեկի մոտ չպետք է տպավորություն ստեղծվի, որ ինչ-որ մեկն ավելին է ստացել։ Տրանսպորտային հաղորդակցությունների ապաշրջափակումը, սկզբում՝ երկաթուղային, կօգնի բացահայտել Հարավային Կովկասի հսկայական տնտեսական ներուժը և հզոր ազդակ կհաղորդի եռակողմ աշխատանքի մնացած բոլոր ուղղություններին", - ասել է ռուս դիվանագետը։