ԵԽ պատգամավորները մտահոգություն են հայտնում Լեռնային Ղարաբաղում հումանիտար իրավիճակի վատթարացման կապակցությամբ

Արմինֆո.Եվրոպական խորհրդարանի պատգամավորները մտահոգություն են հայտնում Լեռնային Ղարաբաղում հումանիտար իրավիճակի վատթարացման կապակցությամբ՝ կապված Ադրբեջանի կողմից Լաչինի միջանցքի շարունակական շրջափակման հետ: Այդ մասին ասվում է Հարավային Կովկասի հարցերով ԵԽ պատվիրակության ղեկավար Մարինա Կալյուրանդի, Հայաստանի հարցով ԵԽ մշտական զեկուցող Անդրեյ Կովաչովի և Ադրբեջանի հարցով ԵԽ մշտական զեկուցող Ժելյանա Զովկոյի համատեղ հայտարարությունում։

Ինչպես նշվում է փաստաթղթում, Բաքուն, խախտելով Հայաստանի, Ադրբեջանի և Ռուսաստանի ղեկավարների  2020 թվականի նոյեմբերի 9-ի եռակողմ հայտարարության շրջանակներում ստանձնած պարտավորությունները, անտեսում է նաև միջազգային դատարանի  2023 թվականի փետրվարի 22-ի որոշումը, որը վերահաստատվել է նույն թվականի հուլիսի 6-ին։

<Արդեն գրեթե ութ ամիս Լեռնային Ղարաբաղի տեղական բնակչությունը տառապում է շրջափակման հետևանքներից՝ գոյատևելով միայն տեղական արտադրության և անհրաժեշտ հումանիտար մատակարարումների շնորհիվ, այդ թվում ՝ Կարմիր խաչի միջազգային կոմիտեի կողմից:

Վերջին շաբաթներին Ադրբեջանի կողմից մարդասիրական մատակարարումների շրջափակման ընդլայնումը հանգեցրել է հիմնական սննդամթերքի, կենսական նշանակության բժշկական ապրանքների և առաջին անհրաժեշտության այլ ապրանքների պակասի, իսկ վառելիքի պակասը խաթարել է տեղական արտադրությունն ու բաշխումը:

Շտապ բժշկական օգնության խիստ կարիք ունեցող բնակիչների տարհանումը նույնպես խափանվել է։ Լեռնային Ղարաբաղի շուրջ 120 հազար բնակիչներ բախվել են հումանիտար ճգնաժամի, որը պահանջում է միջազգային հանրության անհապաղ ուշադրությունը", - նշվում է հայտարարության մեջ: