Շաբաթ, 29 Հուլիսի 2023 12:25

Արմինֆո. Անգամ մարդասիրական աշխարհն է անտեսում Արցախում ստեղծված իրավիճակը։ Այդ մասին շվեյցարական հեղինակավոր Swiss Impact with Banerjis հեռուստածրագրի հարցազրույցում հայտարարել է հասարակական-քաղաքական գործիչ, "Արցախի անվտանգության և զարգացման ճակատ" հասարակական շարժման համակարգող, "Մենք ենք մեր սարերը" տարածքային զարգացման գործակալության համահիմնադիր, Արցախի նախկին պետնախարար, հայտնի գործարար Ռուբեն Վարդանյանը:

 

Այս կապակցությամբ նա ընդգծել է, որ վերջին յոթ ամիսներին Արցախում մարդիկ չունենք ո՛չ սնունդ, ՛ոչ լույս, ո՛չ գազ. ամեն ինչ սահմանափակված է ներքին ռեսուրսներով։ «Մինչեւ հունիսի 15-ը գոնե ռուս խաղաղապահներին եւ Կարմիր խաչին թույլատրվում էր որոշ դեղորայք եւ մարդասիրական օգնություն բերել Արցախ, սակայն դրանից հետո այդ ճանապարհն էլ է ամբողջությամբ փակվել, եւ հիմա մենք տոտալ շրջափակման մեջ ենք. ոչ ոք չի կարողանում տեղաշարժվել, ոչ ոք ոչ մի տեղից չի կարողանում ոչինչ ձեռք բերել, մենք ունենք միայն մեր ներքին ռեսուրսները, որոնց հաշվին էլ մարդիկ ողջ են մնում, բայց սա իսկապես չափազանց վտանգավոր իրավիճակ է», - ընդգծել է նա։

 

Swiss Impact with Banerjis հայտնի հեռուստահաղորդման հաղորդավարներ Սվետա և Բեն Բաներջիների ասելով, Արցախի իրավիճակի մասին արևմտյան ԶԼՄ-ներում ոչ ոք չի խոսել և չի խոսում։

 

Այդ առնչությամբ Վարդանյանն ուշադրություն է հրավիրել այն հանգամանքին, որ ՄԱԿ-ի Արդարադատության դատարանը հստակ որոշում է կայացրել՝ պարտադրել Ադրբեջանին բացել միջանցքը, բայց մենք ապրում ենք մի աշխարհում, որտեղ կարող են ամենաբարձր մակարդակի միջազգային կազմակերպությունների որոշումներն արհամարհվել։ «Ես զարմացած եմ, բայց նաեւ հումանիտար աշխարհն է անտեսել այս իրավիճակը: Մենք որեւէ օգնություն ստանալու հնարավորություն չունենք։ Մենք առաջարկում ենք օդային միջանցք բացել, որը հնարավորություն կտա կազմակերպություններին որոշակի հումանիտար օգնություն հասցնել մեզ, քանի որ մենք ունենք օդանավակայան։ Հավատում ենք, որ սա լուծումներից միայն մեկն է, որ կարող ենք խնդրել աշխարհին, հատկապես Շվեյցարիայից կամ այլ վայրերից կարող են մարդասիրական բեռներ գալ ու մարդկանց սնունդ հասցնել: Այս պահին Արցախում կա 120 հազար մարդ, այդ թվում՝ 30 հազար երեխա, 20 հազար տարեց: Նորից եմ ասում, խելագարություն է այն, ինչ տեղի է ունենում, եւ, ցավոք, աշխարհը սա չտեսնելու է տալիս», - ասել է նախկին պետնախարարը։

 

Նա հույս է հայտնել, որ այդ ծրագիրը կլսեն շատ մարդիկ, այդ թվում ՝ սոցիալական ազդեցություն ունեցող ներդրողներ: Վարդանյանն ընդգծել է միջազգային կազմակերպությունների, կառավարությունների վրա ճնշում գործադրելու անհրաժեշտությունը: "Երեխաները սննդի կարիք ունեն, նրանք ապրելու իրավունք ունեն։ Ոչ ոք իրավունք չունի դադարեցնել մարդկանց նվազագույն կարիքների ապահովումը, այն մարդկանց, ովքեր անմեղ և սովորական մարդիկ են", - ասել է նա։

 

Խոսելով դիվանագիտական մեխանիզմների մասին՝ գործարարը նշել է, որ վերջին շրջանում Բրյուսելում հանդիպումներ են եղել Եվրոպական միության նախագահ Շառլ Միշելի և Հայաստանի ու Ադրբեջանի ղեկավարների միջև, մի քանի հանդիպումներ զուգահեռաբար տեղի են ունեցել Մոսկվայում:

 

Սակայն այդ քննարկումները, ցավոք, լուծումներ չտվեցին։ Վարդանյանն արձանագրել է, որ Ադրբեջանի կողմից չափազանց շատ է կեղծ հռետորաբանությունը։ "Օրինակ, Ադրբեջանն առաջարկել է մարդասիրական օգնություն, իսկ մենք ասել ենք. «Ոչ, չի ստացվի։ Մենք ձեզ չենք վստահում»: Մենք գիտենք, որ հնարավոր չէ օգնություն ստանալ այն մարդկանցից, ովքեր անընդհատ հայտարարում են, թե սպանելու են հայերին", - պարզաբանել է նա։

 

Վարդանյանն ուշադրություն է հրավիրել այն հանգամանքի վրա, որ, չնայած բոլոր մարտահրավերներին, Արցախը հաջողվել է պահպանել հայկական։ Ադրբեջանը, նրա խոսքով, 44 տարի կառավարվում է մեկ ընտանիքի կողմից ։ "Դա ավտորիտար ռեժիմ է, ոչ թե ժողովրդավարություն։ Նավթն ու գազը փողի մեծ հոսքեր են, բայց դա անկայուն է իսկապես կայուն հասարակություն ձևավորելու համար: Մենք ապրում ենք շատ խելահեղ ժամանակաշրջանում։ Հենց այդ պատճառով, քանի դեռ մենք ամուր ենք, ես վստահ եմ, որ մենք աջակցություն կստանանք այլ ժողովուրդներից և այլ պետություններից", - ասել է նա:

 

Հեռուստածրագրի եթերում մեկենասը կոչ է արել ճնշում գործադրել բոլոր կառավարությունների և կազմակերպությունների վրա՝  Եվրոպայում, ԱՄՆ-ում, Ռուսաստանում և այլուր, որպեսզի վերջիններս գործեն և չանտեսեն հակամարտությունը, որը կարող է ոչնչացնել աշխարհի հնագույն քրիստոնեական բնակավայրերից մեկը և ոչնչացնել հազարամյակներ շարունակ այդ հողի վրա ապրող ազգի ժառանգությունը:

 

Հարցազրույցն ամբողջությամբ կարելի է դիտել հետևյալ հղումով ՝  https://www.youtube.com/watch?v=FMdSu9z9DhI

 

Նշենք, որ Swiss Impact with հետ Banerjis միլիոնանոց լսարան ունեցող հեռուստածրագիրը, հիմնականում, անդրադառնում է սոցիալական, կրթական և բնապահպանական թեմաներին, ինչպես նաև՝ կայուն զարգացման խնդիրներին: