Հինգշաբթի, 13 Հուլիսի 2023 14:36

Արմինֆո. Հուլիսի 20-ից կապուտակ Սևանի ափին նավարկության եզրափակիչ փուլը կմեկնարկի «Հուսո առագաստ» հեղինակային երգի 8-րդ միջազգային փառատոնը, որը կտևի չորս օր։ Արդեն հայտնի են փառատոնի այս տարվա լավագույն մասնակիցների անունները, որոնց մի մասը կատարողներ են, իսկ մյուս մասը՝ հեղինակ - կատարողներ, որոնք ընտրվել են «Հուսո առագաստի» երևանյան՝ ընտրական փուլի արդյունքում։ Փառատոնի առաջին օրն ունկնդիրը հնարավորություն կունենա լսելու ոչ միայն այս տարվա լավագույն մասնակիցներին, այլև փառատոնի նախորդ տարիների լավագույն տասնյակների ներկայացուցիչներին։ 2-րդ օրը ելույթ կունենան արտերկրից ժամանած հյուրերն ու հայ հայտնի երաժիշտները։ Այս տարի «Հուսո առագաստն» ընդունելու է հեղինակ-կատարողների Բելառուսից, Լատվիայից, Ուկրաինայից, Վրաստանից, Լեհաստանից, Ռուսաստանից և Բելգիայից։ Փառատոնի երրորդ օրը՝ հուլիսի 22-ին տեղի կունենա գալա համերգը, որի ժամանակ ելույթ կունենա հայ հեղինակային երգի դասական Ռուբեն Հախվերդյանը, ով էլ կիթառը կփոխանցի Բարդերի ակումբի իր ընկերներին։ Հաջորդիվ բեմին կլինեն նաև արտերկրից ժամանած հյուրերն ու փառատոնի այս տարվա նորեկները։ «Հուսո առագաստի» հյուրերը, մասնակիցներն ու ունկնդիրները հնարավորություն կունենան միասին անցկացնել ու վայելել հանգիստը Սևանի ափին նաև գալա համերգին հաջորդող օրը։ Մասնակիցների համար փառատոնային օրերի ընթացքում՝ ցերեկային ժամերին կանցկացվեն բեմելների բաց փորձեր, կիթառի և վոկալի հմտության, ինչպես նաև նկարչական դասընթացներ։ Ավանդույթի համաձայն՝ «Հուսո առագաստի» բոլոր օրերին բարդերի կիթառները չեն լռի նույնիսկ համերգների ավարտից հետո․ երգերն ու զրույցները խարույկի շուրջ կշարունակվեն մինչ լուսաբաց։

Փառատոնն իրականություն է դառնում «Սիվիլ արտ» մշակութային հասարակական կազմակերպության, «Բարդերի ակումբ» ստեղծագործական միավորման և ՀՀ Կրթության, գիտության, մշակույթի և սպորտի նախարարության համատեղ ջանքերով։ Այս տարի կրկին այն տեղի կունենա Գեղարքունիքի մարզի Շորժա գյուղին հարակից  «WishUp» հանգստյան գոտում։

Հեղինակային երգի չորս օր տևող տոնի մասնակիցն ու ունկնդիրը կարող են դառնալ ժանրի բոլոր սիրահարները, որոնք մասնակցության հնարավոր ձևաչափերին (մեկօրյա, երկօրյա կամ ամբողջական փաթեթներ) ծանոթանալու համար կարող են այցելել BARD FEST ARMENIA  ֆեսբուքյան էջ կամ զանգահարել 099 94 20 22   հեռախոսահամարին։