Հայաստանում ԱՄՆ դեսպանը հնարավոր է համարում արցախցիների իրավունքների և անվտանգության ապահովումն Ադրբեջանի կազմում

Արմինֆո. Պետքարտուղար Էնթոնի Բլինքենն արդեն հայտարարել է, որ Վաշինգտոնում բանակցությունները կառուցողական են եղել, և բանակցություններում առաջընթաց է գրանցվել: Այդ մասին հայտարարել է ՀՀ-ում ԱՄՆ դեսպան Քրիստինա Քվինը՝ ՀՀՀ հարցազրույցում անդրադառնալով Վաշինգտոնի միջնորդությամբ Հայաստանի և Ադրբեջանի արտաքին քաղաքական գերատեսչությունների ղեկավարների միջև վերջին բանակցությունների արդյունքներին։

"Միացյալ Նահանգները հանձնառու է շարունակել այդ բանակցությունները, փորձելով հասնել այնպիսի արդյունքների, որոնք երկարաժամկետ եւ արդար խաղաղություն կապահովեն տարածաշրջանում", - նշել է նա:

Դիտարկմանը, թե բանակցություններին զուգահեռ ադրբեջանական կողմը 4 հայ զինծառայողի է սպանել, կրակել է քաղաքացիական անձանց վրա, շարունակում է ագրեսիվ հռետորաբանությունը և Արցախի շրջափակումը, արդյոք այս պայմաններում հնարավոր է խաղաղություն, Քվինը նշել է, որ ԱՄՆ-ը հստակ հայտարարել է, որ այս հակամարտությունը ռազմական լուծում չունի: "Մենք հստակ հայտարարել ենք, որ բռնության բռնկումները օգտակար չեն հակամարտության կարգավորման համար, եւ բոլոր կողմերին կոչ ենք արել առկա տարաձայնությունները լուծել բանակցությունների միջոցով: Բայց մենք տեսնում ենք, որ տարածաշրջանում խաղաղության բանալին առկա բոլոր խնդիրների լուծումն է։ Այդ պատճառով մենք հանձնառու ենք այնպիսի պայմանավորվածությունների ձեռք բերմանը, որոնք կհանգեցնեն խաղաղության", - նշել է ամերիկացի դիվանագետը։

Ընդ որում, նա հավելել է, որ երկու կողմերը նստել են բանակցությունների սեղանի շուրջ և բաց քննարկումներ են ունեցել առկա տարաձայնությունների շուրջ: Քվինը հավելել է, որ ԱՄՆ-ում հավատում է, որ կողմերը կկարողանան տեսնել այն փաստը, որ խաղաղություն հնարավոր է, և ամերիկյան կողմը հույս ունի այդ հարցում օգնել իրենց:

Անդրադառնալով Արցախի ժողովրդի իրավունքների և անվտանգության ապահովման հարցին՝ Քվինն ընդգծել է, որ ԱՄՆ-նըհստակ հայտարարել է. Լեռնային Ղարաբաղում ապրողների իրավունքները պետք է պաշտպանված լինեն, և վերջնական լուծումը պետք է ներառի այնտեղ ապրողների իրավունքների և անվտանգության ապահովումը:

< Ես ինքս համոզված եմ, որ Արցախում մարդիկ պետք է հնարավորություն ունենան իրենց ապահով զգալ սեփական տներում և ունենան ընտանեկան խաղաղ կյանք վարելու, իրենց համայնքներում ներգրավված լինելու հնարավորություն: Ուստի, ԱՄՆ-ը համոզված է, որ նշված սկզբունքները պետք է ներառվեն վերջնական կարգավորման մեջ", - հավաստիացրել է նա։

Դիտարկմանը, թե հայ հասարակության շրրջանում կարծիք կա, որ նման սցենարը ֆիզիկապես հնարավոր չէ, եթե Արցախը լինի Ադրբեջանի կազմում, ԱՄՆ դեսպանը վստահեցրել է, որ իրենց համոզմամբ դա հնարավոր է: <Բոլոր կողմերը պետք է ջանքեր գործադրեն, որպեսզի դա հնարավոր լինի: ԱՄՆ-ում կարծում են, որ սա ճիշտ մոտեցում է, և բոլոր կողմերին խրախուսում են համատեղ ջանքեր գործադրել այդ մոտեցումներն ապահովելու համար ։ Լեռնային Ղարաբաղի բնակչության իրավունքներն ու անվտանգությունը պետք է ապահովվեն, եւ այժմ պետք է հնարավորություն գտնել դա իրագործելու համար", - ասել է դիվանագետը։

Հարցին, թե հնարավոր է արդյոք Բաքու-Ստեփանակերտ երկխոսություն, Քվինը նշել է, որ Վաշինգտոնում ճիշտ ուղղությամբ շարժում են համարում ցանկացած երկխոսություն, ցանկացած քննարկում: Նրա խոսքով, մնում է միայն օգնել կողմերին ընկալել առկա բոլոր մտահոգությունները, որպեսզի գտնեն խաղաղության ճանապարհ, որտեղ երաշխավորված կլինեն նաեւ Լեռնային Ղարաբաղում ապրողների իրավունքներն ու անվտանգությունը:

Հաղորդավարի այն հարցին, թե ինչու է ԱՄՆ-ին հրակավոր այդ ամենը, չէ որ նրանք տարածաշրջանում կենսական շահեր չունեն, արդյոք այդ քայլերը նպատակ չեն հետապնդում դուրս մղել ՌԴ-ին Հարավային Կովկասից, դեսպանը նշել է, որ Վաշինգտոնում ցանկանում են, որ Հայաստանը, որպես ինքնիշխան պետություն, ինքնուրույն կարողանա որոշել, թե ովքեր են իր գործընկերներն ու դաշնակիցները, եւ ինչ վեկտորով զարգանա երկիրը: Նա հավելել է, որ ԱՄՆ-ը ցանկանում է խաղաղություն Եվրոպայում և Հարավային Կովկասում և պատրաստ է աշխատել յուրաքանչյուրի հետ, ով թույլ կտա դա ապահովել: Այս համատեքստում դեսպանը նշել է, որ թե ԱՄՆ-ը, թե ԵՄ-ը Հարավային Կովկասում խաղաղությունից օգուտ են տեսնում, և հենց այդ պատճառով կողմերը սերտորեն համագործակցում են կայուն խաղաղության հասնելու ջանքերում:

<Ես կարծում եմ, որ ԱՄՆ-ը շատ կարևոր շահեր ունի Հայաստանում։ Բայց որո՞նք են այդ շահերը։ Դրանք  այն բանում են, որ մենք ունենք ընդհանուր ժողովրդավարական արժեքներ, հավատարիմ ենք այդ արժեքներին։ Մենք տեսնում ենք, որ Հայաստանն իսկապես լուսավոր կետ է տարածաշրջանում՝ այդ տեսանկյունից։ Հայաստանն ունի ազատ մամուլ, խոսքի ազատություն։ Եվ Հայաստանը ժողովրդավարություն է, որն առաջ է շարժվում, և մենք պատրաստ ենք օգնել նրան այդ ճանապարհին", - ասել է դեսպանը։