Դիլիջանում ավարտվել է օտարերկրյա մարզիկների մասնակցությամբ հեծանվային լայնածավալ մրցաշարը

Արմինֆո. Հուլիսի 2-ին Դիլիջանի քաղաքային զբոսայգում ավարտվել է Ascend Armenia Ultra Distance Bikepacking Race 2023 հեծանվային լայնածավալ մրցաշարը, որին մասնակցում էին պրոֆեսիոնալ հեծանվորդներ աշխարհի ավելի քան 20 երկրներից: Հեծանվային երթուղու ընդհանուր երկարությունը կազմել է 1200 կմ և անցել Վայոց Ձորի, Գեղարքունիքի, Տավուշի, Լոռու և Շիրակի մարզերի բնակավայրերով:

Հեծանվային մրցաշարը բաղկացած էր երկար և կարճ երթուղիներից։ Երկար երթուղու մեկնարկը տրվել է հունիսի 25-ին Երևանի Հանրապետության հրապարակից: Մրցաշարին մասնակցել է 32 մարզիկ, որոնք ողջ երթուղին հաղթահարել են 5-8 օրում: Կարճ երթուղին մեկնարկել է Լոռու մարզի Մարգահովիտ գյուղից հուլիսի 2-ին, որին մասնակցել են ավելի քան 40 մարզիկներ: Երկու երթուղիների մասնակիցներն էլ ավարտել են Դիլիջանի քաղաքային զբոսայգում, որտեղ կազմակերպվել է the Ascend Armenia Cycle Fest մարզական հեծանվային փառատոն:

Մրցաշարի շնորհիվ աշխարհի տարբեր երկրներից, ինչպիսիք են ԱՄՆ-ը, Ավստրալիան, Հունգարիան, Շվեյցարիան, Վրաստանը, Բելգիան, Բելառուսը, Կուբան, Գերմանիան, մարզիկները կարողացան Հայաստանը բացել որպես էքստրեմալ տուրիզմի նոր ուղղություն: Մրցավազքի երթուղին անցավ Հայաստանի գեղատեսիլ բնությունով՝ մասնակիցներին հնարավորություն ընձեռելով վայելելու համայնապատկերային տեսարաններ, արգելոցային անտառներ և լեռնային բնապատկերներ: Մրցաշարի հաղթող է դարձել շվեյցարացի հեծանվորդ Ադրիան Լիխտին, երկրորդ տեղը զբաղեցրել է Կայ Ուվե Լենուխը (Գերմանիա), երրորդը՝ Ջեյքոբ Խորան (ԱՄՆ):

< Ascend Armenia նախագիծը կարողացավ միավորել պրոֆեսիոնալ հեծանվորդներին, ակտիվ ապրելակերպի սիրահարներին և, պարզապես, սպորտի սիրահարներին: Նման մրցաշարերը բարենպաստ միջավայր են ստեղծում մարզական ենթակառուցվածքների զարգացման, նոր արահետների և մարզահրապարակների ստեղծման, ինչպես նաև երկրի հեծանվային արդյունաբերության մեջ հովանավորներ և ներդրողներ ներգրավելու համար: Ուրախ ենք մասնակցել Դիլիջանում կայացած մարզական եզրափակիչ միջոցառմանը: Քաղաքի համար սա նշանակալի իրադարձություն է, որը նպաստում է Դիլիջանի զարգացմանը և նրա դիրքի ամրապնդմանը՝ որպես կարևոր զբոսաշրջային և մարզական>, - միջոցառումը մեկնաբանել է Impulse management company-ի գլխավոր տնօրեն Հրանտ Բաբասյանը:

Նա նշել է, որ ՀՀ զբոսաշրջության կոմիտեն մեծ կարևորություն է տալիս հեծանվային միջազգային մրցաշարի անցկացմանը Հայաստանում, քանի որ այն եզակի հնարավորություն է տալիս ներկայացնել, իսկ մասնակիցներին բացահայտել Հայաստանը ՝ որպես խորհրդավոր ուղղություն: <Հայաստանի կոմիտեի կողմից որպես զբոսաշրջային երկիր բրենդավորումը հիմնված է 4 զբոսաշրջային ուղղությունների վրա ՝ գաստրոնոմիական, մշակութային, տեղական և արկածային, իսկ այս միջոցառման շնորհիվ մասնակից հեծանվորդները, որոնցից շատերն առաջին անգամ էին Հայաստանում, բացառիկ հնարավորություն ունեցան ծանոթանալու այդ բոլոր բաղադրիչներին, հատկապես, տեղական և արկածային ուղղություններին: Հուսով ենք, որ միջոցառումը կդառնա ամենամյա և տարեցտարի ավելի ընդգրկուն բնույթ կստանա ՝ համախմբելով պրոֆեսիոնալ և սիրողական հեծանվորդներին Հայաստանում: Վստահ եմ, որ մեր հյուրերը հասցրել են սիրել Հայաստանի բնությունը, մարդկանց, հյուրընկալությունն ու մշակույթը և կվերադառնան իրենց երկրներ վառ տպավորություններով՝ կրկին Հայաստան այցելելու մեծ ցանկությամբ>, - նշել է ՀՀ էկոնոմիկայի նախարարության Զբոսաշրջության կոմիտեի նախագահի օգնական Մարիամ Հակոբյանը:

<Այս տարի մենք առաջին անգամ ենք անցկացնում  նման երկար հեռավորության վրա հեծանվավազք, որին մասնակցում են մեծ թվով միջազգային մարզիկներ: Նրանք կարողացել են ոչ միայն յուրահատուկ մարզական փորձ ձեռք բերել, այլև ուսումնասիրել երթուղիները և խորասուզվել Հայաստանի մշակույթի և հյուրընկալության մեջ: Հուսով ենք, որ մեր մրցաշարը հետագայում ավելի շատ մասնակիցներ կգրավի և նոր փուլ կդառնա Հայաստանում հեծանվային զբսաշրջության զարգացման գործում>, - նշել է Ascend Armenia նախագծի ղեկավար Տաթևիկ Ավետիսյանը:

Թե Ascend Armenia Cycle Fest-ը կազմակերպել էին Impulse management company-ն և Dilijan Development Foundation-ը (DDF)՝  Ռուբեն Վարդանյանի և Վերոնիկա Զոնաբենդի կողմից 2012 թվականին մեկնարկած Դիլիջանի զարգացման ծրագրի շրջանակում:

Ascend Armenia Ultra Distance Bikepacking Race 2023 հեծանվային մրցաշարը կայացել է ՀՀ էկոնոմիկայի նախարարության Զբոսաշրջության կոմիտեի, Հայաստանի հեծանվային սպորտի ֆեդերացիայի և այլ հովանավորների աջակցությամբ: