ՌԴ ԱԳՆ. Ղարաբաղում իրավիճակի ապաէսկալացմանը կնպաստեր Լաչինի միջանցքի լիակատար ապաշրջափակմանն ուղղված միջոցառումների շուտափույթ ձեռնարկումը

Արմինֆո. ՌԴ-ը մտահոգված է Լեռնային Ղարաբաղում հաճախակի դարձած զինված միջադեպերով և հրադադարի ռեժիմի խախտումներով։ Այդ մասին հունիսի 28-ին ճեպազրույցի ժամանակ հայտարարել է ՌԴ արտաքին գործերի նախարարության պաշտոնական ներկայացուցիչ Մարիա Զախարովան։

Նրա խոսքով ՝ Մոսկվան կողմերին զսպվածության եւ բոլոր վիճելի հարցերը խաղաղ, քաղաքական-դիվանագիտական ճանապարհով կարգավորելու կոչ է անում՝ ռուսական խաղաղապահ զորակազմի հրամանատարության հետ փոխգործակցությամբ։ "Կարծում ենք, որ իրավիճակի ապաէսկալացմանը կնպաստեր Լաչինի միջանցքի լիակատար ապաշրջափակմանն ուղղված միջոցների շուտափույթ ձեռնարկումն ու բնակչության խաղաղ կենսագործունեության համար նորմալ պայմանների ստեղծումը", - ասել է Զախարովան:

ՌԴ ԱԳՆ պաշտոնական ներկայացուցիչը, մատնանշելով Ռուսաստանի դերը 2020 թվականին Լեռնային Ղարաբաղում պատերազմի դադարեցման գործում, ընդգծել է, որ այդ դերը հաստատված է փաստաթղթերով, այդ թվում ՝ մի փաստաթղթով, որի տակ դրված են և Հայաստանի, և Ադրբեջանի ստորագրությունները: "Այդ դերը չի կարող կասկածի տակ դրվել, քանի որ այն հաստատվել է անմիջականորեն հակամարտող կողմերի կողմից, եւ այդ հարցի շուրջ ձեռք է բերվել բացարձակ կոնսենսուս", - ասել Է Զախարովան:

Նա ևս մեկ անգամ ընդգծել է, որ Լեռնային Ղարաբաղի 44 - օրյա պատերազմի հանգամանքները քննող ՀՀ Ազգային Ժողովի հանձնաժողովում քննարկվող հարցերը Հայաստանի ներքին գործն են: <Իսկ եթե Ռուսաստանի կողմից ինչ-որ չար դիտավորություն գտնելու փորձեր կան, ապա դա չարից է և կեղծ ուղերձ և զուտ ապատեղեկատվություն: Հենց Ռուսաստանի նախագահի մասնակցությամբ են դադարեցվել ռազմական գործողությունները, իսկ ռուսական խաղաղապահ զորակազմն ապահովում է հրադադարի ռեժիմը", - նշել է ՌԴ ԱԳՆ պաշտոնական ներկայացուցիչը։

Պատասխանելով հարցին, թե արդյոք Մոսկվան զենք է վաճառում Երևանին, այդ թվում ՝ "Իսկանդեր" հրթիռային համալիր, որի կիրառումը սահմանափակելու պահանջ է առաջ քաշվել, ինչի մասին վերջերս ՀՀ ԱԺ-ում հայտարարել է ՀՀ վարչապետ Նիկոլ Փաշինյանը, Զախարովան խորհուրդ է տվել դիմել Ռուսաստանի պաշտպանական գերատեսչությանը և դրա ենթակա կառույցներին, որոնք պայմանագրեր են կնքում:

Զախարովան մեկնաբանել է նաև թուրք - ադրբեջանական ակտիվ համագործակցությունն ու Հարավային Կովկասի տարածաշրջանում Թուրքիայի ներկայության ավելացումը: ՌԴ ԱԳՆ ներկայացուցչի խոսքով, ռուսական կողմը բազմիցս բացասական վերաբերմունք է արտահայտել Հարավային Կովկասի տարածաշրջանում ՆԱՏՕ-ի մշտական կամ քվազի-մշտական ենթակառուցվածքի հնարավոր առաջացման նկատմամբ: