ԱԿԲԱ-ԿՐԵԴԻՏ ԱԳՐԻԿՈԼ ԲԱՆԿԻ «Խնայող վարկեր» նոր վարկային պրոդուկտը նախատեսված է էներգախնայող ծրագրերի իրականացման համար

 ԱԿԲԱ-ԿՐԵԴԻՏ ԱԳՐԻԿՈԼ ԲԱՆԿԻ հայտարարել է «Խնայող վարկեր» նոր վարկային պրոդուկտի մեկնարկի մասին: Այդ պրոդոկտի շնորհանդեսը տեղի ունեցավ ապրիլի 10-ին, «Խնայում եք էներգիա, խնայում եք գումար» խորագիրը կրող հանդիպում-քննարկման ընթացքում:

«Խնայող վարկերը կուղղվեն Հայաստանի գործարար միջավայրում, ինչպես նաև կենցաղում  էներգախնայող ծրագրերի և տեխնոլոգիաների ներդրմանը: Մենք, մեր առջև խնդիր ենք դրել անելու առավելագույնը՝ Ձեզ հասանելի դարձնելու համար էներգախնայող և էներգաարդյունավետ տեխնոլոգիաները:»,-նշել է բանկի գլխավոր գործադիր տնօրեն Հակոբ Անդրեասյանը: Նա պարզաբանել է, որ վարկերը կտրամադրվեն արտադրական, ագրարային և կենցաղային էներգախնայող տեխնիկայի ձեռքբերմանը, ինչպես նաև բնակելի և այլ շինությունների վերանորոգմանը, որոնցում կիրառվում են ջերմամեկուսիչ նյութեր, պատուհաններ, դռներ և այլն:

Տնօրենի խոսքով, հաճախորդներին էներգախնայողության հետ կապված ծրագրեր առաջարկելուց առաջ բանկն ինքն է սկսել այդ տեխնոլոգիաների կիրառումն առօրյա կյանքում: «Մենք շարունակում ենք իրականացնել ծրագրեր, որոնք ուղղված են շրջակա միջավայրի պահպանմանը, որպեսզի մեր օրինակով ապացուցենք, որ էներգախնայողությունն իրատեսական է, արդյունավետ է ու հեռանկարային»,-հայտարարել է Հ.Անդրեասյանը:

Պրոդուկտի ներդրումը ԱԿԲԱ-ԿՐԵԴԻՏ ԱԳՐԻԿՈԼ ԲԱՆԿԻ և ԱԳԲԱ Լիզինգ ընկերություննրի կողմից հնարավոր է դարձել երկու միջազգային ֆինանսական գործընկեր կազմակերպությունների՝ «Հարավ-արևելյան Եվրոպայի հիմնադրամի» և «Վերակառուցման և զարգացման եվրոպական բանկի»՝ «Էներգոկրեդիտ» հիմնադրամի հետ համագործակցության շնորհիվ: Վարկերը կտրամադրվեն 11-13% տարեկան տոկոսադրույքով, իսկ մարման ժամկետը հավասար կլինի ներդրված միջոցների հետբերման ժամկետին: Վարկերի առավելագույն չափերը, որոնք ֆինանսավորվում են «Էներգոկրեդիտ» հիմնադրամի կողմից, կազմում է 30 հազար դոլար, ընդ որում, վարկի 10%-ը վերադարձման ենթակա է` որպես շրջակա միջավայրի պահպանումը  քաջալերող միջոց: Իսկ «Հարավ-արևելյան Եվրոպայի հիմնադրամի» կողմից ֆինանսավորվող վարկերի համար առավելագույն սահմանաչափ չկա:

ԱԿԲԱ-ԿՐԵԴԻՏ ԱԳՐԻԿՈԼ ԲԱՆԿԸ վերջին տարիներին իրականացրել է մի շարք խոշոր ծրագրեր: Հայաստանի վերականգնվող էներգետիկայի և էներգախնայողության հիմնադրամի հետ համագործակցության շրջանակներում բանկը շուկա է դուրս բերել «Ապառիկ ջեռուցում» նոր պրոդուկտը, 2006-2014 թվականներին տրամադրելով 7743 վարկեր` 4,7 մլրդ.դրամ ընդհանուր ծավալով: «Ապառիկ վարկը տեղում» պրոդուկտի շրջանակներում 2014 թվականին բանկը տրամադրել է 3177 վարկ, էներգաարդյունավետ կենցաղային տեխնիկա գնելու նպատակով, ընդ որում, վարկի 10%-ը վերադարձվում է վարկառուին: Բանկի կողմից տրամադրված նման վարկերի ընդհանուր գումարը կազմել է 848 մլն դրամ: Անցյալ տարի բանկի գլխամասային գրասենյակում և 14 մասնաճյուղերում տեղադրվեցին արևային կոլեկտորներ: Բանկը կորպորատիվ սոցիալական պատասխանատվության շրջանակներում նման կոլեկտորներ է տեղադրել նաև Լոռու, Շիրակի, Տավուշի և Գեղարքունիքի մարզերի խոշոր մանկապարտեզներում: Անցյալ տարի «ԱԳԲԱ Լիզինգ» ընկերությունը գործարկեց «Green Leasing» ծրագիրը, որի շրջանակներում տեղաբաշխեց 1,5 մլն.դոլար և 500 հազար եվրո: Ստորագրվեց նաև 50 լիզինգային պայմանագիր և տրամադրվեց 150 միավոր տեխնիկա:

Ըստ ԱրմԻնֆո գործակալության` Հայաստանի Բանկերի և Վարկային կազմակերպությունների Ռենկինգի, ԱԿԲԱ-ԿՐԵԴԻՏ ԱԳՐԻԿՈԼ ԲԱՆԿԸ Հայաստանի բանկային համակագում առաջին տղն է զբաղեցնում ընդհանուր կապիտալի չափերով` 49.4 մլրդ դրամ: Ակտիվների չափերով բանկն զբաղեցնում է հինգերորդ տեղը` 286,4 մլրդ դրամ, տարեկան աճը` 7%: Վարկային ներդրումներով բանկը 4-րդ տեղում է` 202,4 մլրդ դրամ (ակտիվների 71%-ը), տարեկան աճը` 12%: Տնտեսության վարկավորման ծավալներով բանկը գտնվում է առաջատարների տասնյակում, 68.8 մլրդ.դրամ ծավալով: Ըստ ոլորտների, բանկի վարկային պորտֆելի դիվերսիֆիկացված է հետևյալ կերպ. Արդյունաբերություն`մոտ 19%, գյուղատնտեսություն` 32%, առևտուր`12%, շինարարություն, տրանսպորտ և կապ`2%, հասարակական սնունդ և ծառայություններ` ավելի քան 3%, սպառողական վարկեր` ավելի քան 26%: ՓՄՁ ոլորտում տրամադրած վարկերը կազմում են պորտֆելի 24%-ը:  Ընդհանուր պարտավորություններով  բանկն զբաղեցնում է վեցերորդ տեղը շուկայում` ավելի քան 237 մլրդ դրամ, տարեկան աճը` 11%, ժամկետային ավանդներով`չորրորդ տեղը` 104.2 մլրդ դրամ, տարեկան աճը` 22%: Լիզինգային գործառնություններով բանկն զբաղեցնում է առաջին տեղը` 8,9 մլրդ դրամ, տարեկան աճը` ավելի քան 14%:

ԱԳԲԱ Լիզինգ ընկերությունը հիմնական ցուցանիշներով հանդիսանում է շուկայի առաջատարը: Ընկերության ընդհանուր կապիտալը 2015 թվականի հունվարի 1-ին կազմել է 3,3 մլրդ դրամ դրամ, տարեկան աճը` 7,4% -ով: Ընկերության ակտիվները հասել են 14,9 մլրդ դրամի, տարեկան աճը`20.5%: Վարկային ներդրումները կազմել են 9,2 մլրդ դրամ կամ  ակտիվների 62%-ը, տարեկան աճը`15.5%: Ընդհանուր պարտավորությունները կազմել 11.6 մլրդ դրամ, տարեկան աճը`24,7%: 2014 թվականն ընկերությունը եզրափակել է 223,3 մլն.դրամ զուտ շահույթով, տարեկան կտրվածքով աճը`35.7%:

Նշենք, որ ՙԱԿԲԱ-ԿՐԵԴԻՏ ԱԳՐԻԿՈԼ ԲԱՆԿ՚ ՓԲԸ Հայաստանում գործում է 1995 թվականից: 2006 թվականի սեպտեմբերից որպես բանկի մաժորիտար բաժնետեր հանդես է գալիս եվրոպական խոշորագույն Credit Agricole S.A. բանկային խումբը` կապիտալում 15,56% բաժնեմասով, մասնակցության մեծությամբ նրան հետևում է SJSC "Sacam International" բաժնետիրական ընկերությունը (Credit Agricole S.A խմբի անդամ)` 12,44%, որոնցից բացի կապիտալում ներկա են գյուղացիական փոխօգնության 10 մարզային միություններ: