Դավիթ Բաբայան. Բաքու-Ստեփանակերտ երկխոսություն հնարավոր է միայն միջազգային ձևաչափով

Արմինֆո. Պաշտոնական Ստեփանակերտի և Արցախի ժողովրդի դիրքորոշումը չի փոխվել. մենք կողմ ենք Բաքվի հետ երկխոսությանը, բայց՝ միջազգային ձևաչափով։

Այդ մասին ԱրմԻնֆո-ի թղթակցի հետ զրույցում հայտարարել է Լեռնային Ղարաբաղի Հանրապետության նախագահի խորհրդական, հատուկ հանձնարարությունների գծով նախագահի ներկայացուցիչ, Արցախի ԱԳՆ նախկին ղեկավար Դավիթ Բաբայանը' ի պատասխան ռուսական ԶԼՄ-ներում շրջանառվող այն տեղեկատվությունը մեկնաբանելու խնդրանքին, թե Վաշինգտոնը ճնշում է գործադրում Ստեփանակերտի նկատմամբ' պարտադրելով երրորդ երկրում Բաքվի հետ հանդիպում:

Սակայն, ըստ Բաբայանի, նման հանդիպման կազմակերպումը և այն որպես ներադրբեջանական երկխոսություն ներկայացնելն անընդունելի է Ստեփանակերտի համար: Խորհրդականն այդ առումով հիշեցրել է, որ Բաքվի եւ Ստեփանակերտի միջեւ միջազգային ձեւաչափով երկխոսությունը չի գործում 1996-97 թթ. Ի վեր, իսկ այժմ այն, ընդհանրապես, շատ դժվար է գործարկել:

"Հանդիպումներ կազմակերպելն ու դրանք ներկայացնելն այն հունով, թե, իբր, "անջատողականները զղջացել են" և եկել են խոնարհվելու, իսկ "Մայր Ադրբեջանն" այնքան մեծահոգի է եղել, որ համաձայնել է "համաներել", պարզապես, որևէ շրջանակի մեջ չի տեղավորվում և անթույլատրելի է։ Այդ առնչությամբ կցանկանայի մատնանշել նաև ԱՄՆ Պետդեպարտամենտի տխրահռչակ հայտարարությունը, որում հավանության էր արժանանում Ադրբեջանի նախագահ Իլհամ Ալիևի հայտարարությունը "ղարաբաղյան պաշտոնյաների համաներման մասին, եթե նրանք անհապաղ լքեն իրենց պաշտոնները": Այս հայտարարությամբ Պետդեպը, պարզապես, չափից դուրս իջեցրել է ԱՄՆ-ի իմիջի նշաաձողը", - ասել է Բաբայանը։

Ընդ որում, նա դժվարացել է ասել, թե որքանով է իրականությանը համապատասխանում Բաքվի հետ հանդիպում պարտադրելու մասին "ՌԻԱ Նովոստի"-ի հաղորդագրությունը, սակայն, ևս մեկ անգամ ընդգծել է, որ նման հանդիպում կարող է տեղի ունենալ միայն միջազգային ձևաչափով, որտեղ Ստեփանակերտը բանակցային սեղանի շուրջ ներկայացված լինի որպես առանձին կողմ, այլ ոչ թե վասալի կարգավիճակով:

Նշենք, որ այսօր ռուսական մի շարք լրատվամիջոցներ, հղում անելով Վաշինգտոնի դիվանագիտական աղբյուրին, հաղորդել են, թե ԱՄՆ-ը վերջնագրի ձեւով Լեռնային Ղարաբաղին Ադրբեջանի հետ հանդիպում է պարտադրում, իսկ հրաժարվելու դեպքում սպառնում է հակաահաբեկչական գործողությամբ: "Վաշինգտոնը ստիպում է Լեռնային Ղարաբաղի ներկայացուցիչներին համաձայնել մոտ ժամանակներս հանդիպել ադրբեջանական կողմի հետ "երրորդ երկրում"՝ ամերիկացի համակարգողի մասնակցությամբ։ Նպատակը տարածաշրջանում ԱՄՆ-ի ներդրումն է", - գրում են ԶԼՄ-ները՝ վկայակոչելով Վաշինգտոնի անանուն դիվանագիտական աղբյուր։