Ուրբաթ, 9 Հունիսի 2023 11:50

Արմինֆո. ԱՄՆ Ներկայացուցիչների պալատի արտասահմանյան գործողությունների համար հատկացումների ենթահանձնաժողովի ազդեցիկ դեմոկրատ Բարբարա Լին Կոնգրեսի իր գործընկերներին կոչ է անում միանալ Ադրբեջանին ամերիկյան ողջ ռազմական օգնությունը դադարեցնելու պահանջներին՝ նախագահ Ալիևի կողմից շարունակվող 120 հազար բնիկ արցախահայություն վեցամսյա դաժան շրջափակման լույսի ներքո: Այդ մասին ասվում է Ամերիկայի Հայ դատի հանձնախմբի (ANCA) հաղորդագրությունում։

 

< Բայդեն-Հարիսի վարչակազմի կողմից Ադրբեջանին տրամադրվող ռազմական օգնությունը  յուղ է լցնում կրակի վրա՝ Ալիևի ռեժիմին դրդելով ագրեսիայի հետագա էսկալացիայի և Արցախի շրջափակման խստացման: Մի պահ տրամադրեք զանգահարելու, Twitter-ում գրելու նաև ԱՄՆ Կոնգրեսում ձեր ներկայացուցիչներին, որպեսզի նրանք կոնգրեսական Լիի եւ նրա գործընկերների հետ միասին դադարեցնեն ԱՄՆ-ի ողջ օգնությունը Բաքվին անվտանգության եւ ռազմական  ոլորտում, ապա խնդրեք ձեր բարեկամներին եւ ընտանիքին անել նույնը", - հայտարարել է ANCA-ի գործադիր տնօրեն Արամ Համբարյանը:

 

Կոնգրեսում Լիի նախաձեռնությունը պայմանավորված է այն հանգամանքով, որ Հայաստանի եւ Ադրբեջանի արտգործնախարարները հաջորդ շաբաթ պետք է Վաշինգտոնում անցկացնեին բանակցությունների եւս մեկ փուլ: Կոնգրեսին հղած նամակում Բարբարա Լին նշում է, որ "Ադրբեջանի կողմից Լեռնային Ղարաբաղի երկարատև շրջափակումը և Հայաստանի ինքնիշխան տարածքի շարունակական օկուպացիան ոչ միայն սպառնում են վտանգել հակամարտության կարգավորմանն ուղղված թույլ ջանքերը, այլև լրջորեն սպառնում են Լեռնային Ղարաբաղի հայ բնակչության անվտանգությանը և բարեկեցությանը":

 

Կոնգրեսականը մտահոգություն է հայտնել նաև Ադրբեջանի հակահայկական սպառնալիքներին Պետդեպարտամենտի թույլ արձագանքի առնչությամբ: Նա հիշեցրել է Ադրբեջանի նախագահ Իլհամ Ալիևի ելույթի մասին։ <Կամ նրանք (արցախցիները) վիզը կկռեն ու իրենք կգան մեզ մոտ, կամ ամեն ինչ այլ կերպ կզարգանա։ Եթե ես ասեմ, որ համաներումը կարող է տարբերակ լինել, նրանք չպետք է բաց թողնեն այդ հնարավորությունը", - այն ժամանակ հայտարարել էր Ալիևը։ "Այդ հայտարարությունը դատապարտելու փոխարեն՝ Պետդեպարտամենտի ներկայացուցիչը "ողջունել է" Ալիևի խոսքերը", - վրդովմունքով նշել է Բարբարա Լին՝ Բայդենի վարչակազմին կոչ անելով գործողության մեջ դնել Ադրբեջանի նկատմամբ 907-րդ հոդվածով սահմանված պատժամիջոցները:

 

Բարբարա Լիի՝ Կոնգրեսին հղված նամակում ասվում է. <Այս շարունակական շրջափակման և նախագահ Ալիևի կողմից չդադարող սպառնալիքների համատեքստում "Ազատության աջակցության մասին" օրենքի 907-րդ հոդվածի կիրառումից նախագահի հրաժարման երկարաձգումը վտանգավոր ազդակ է Ադրբեջանի կառավարությանը առ այն, որ ոչ մի հետեւանք չի լինելու Լեռնային Ղարաբաղի հայերին վախեցնելու, սովի մատնելու եւ մահաբեր ուժի միջոցով սեփական կամքը պարտադրելու նրա փորձերի համար>: