Ուրբաթ, 2 Հունիսի 2023 11:57

Արմինֆո.Եվրոպական միությունը կանի հնարավորինը՝ Հայաստանի և Ադրբեջանի միջև հարաբերությունների կարգավորման ուղղությամբ առաջընթացի հասնելու համար: Այդ մասին հայտարարել է Եվրախորհրդի նախագահ Շառլ Միշելը՝ հունիսի 1-ին Քիշնեւում Հայաստանի, Ադրբեջանի, Ֆրանսիայի եւ Գերմանիայի ղեկավարների հետ հնգակողմ հանդիպումից հետո:

 

Միշելի ելույթի տեքստը զետեղվել է ԵԽ կայքում։  «Մենք քիչ առաջ շատ լավ հանդիպում ունեցանք նախագահ Ալիևի, վարչապետ Փաշինյանի, Ֆրանսիայի նախագահ Էմանուել Մակրոնի և Գերմանիայի կանցլեր Օլաֆ Շոլցի հետ։ Մենք հնարավորություն ունեցանք անդրադառնալ Բրյուսելում մայիսին քննարկված բոլոր թեմաներին՝ հաղորդակցությանը, անվտանգությանը և իրավունքներին, սահմանների սահմանազատմանը, խաղաղության պայմանագրին։

 

Այս հանդիպումը լավ նախապատրաստություն էր հաջորդ հանդիպմանը, որը տեղի կունենա հուլիսի 21-ին Բրյուսելում: Դա նշանակում է, որ մենք ջանասիրաբար աշխատում ենք և մտադիր ենք աջակցել հարաբերությունների կարգավորման ուղղությամբ բոլոր դրական ջանքերին։  Ես նաև հայտարարել եմ, որ մտադիր եմ կրկին հրավիրել նախագահ Ալիևին, վարչապետ Փաշինյանին, կանցլեր Շոլցին և նախագահ Մակրոնին Եվրոպական քաղաքական համայնքի հաջորդ հանդիպման շրջանակում, որը տեղի կունենա Իսպանիայում: Դա նշանակում է, որ ԵՄ-ի կողմից ամեն ինչ կանենք, որպեսզի օգնենք, աջակցենք, ավելի մեծ առաջընթաց արձանագրենք հարաբերությունների կարգավորման ուղղությամբ»,- հայտարարել է Եվրոպական խորհրդի նախագահը։