Փաշինյան. Առայժմ չկա խաղաղության պայմանագրի համաձայնեցված նախագիծ, որը կարելի լիներ ստորագրել Քիշնեւում

Արմինֆո. Աշխարհաքաղաքական իրավիճակը Հարավային Կովկասի տարածաշրջանում շարունակում է մնալ լարված։ Այդ մասին մայիսի 29-ին հայտարարել է ՀՀ վարչապետ Նիկոլ Փաշինյանը՝  Ազգային ժողովում 2022 թվականի պետական բյուջեի կատարման արդյունքների քննարկման ժամանակ։

Նրա խոսքով՝ այդ լարվածությունը պայմանավորված է ոչ միայն Հայաստանի և Ադրբեջանի միջև բարդ հարաբերություններով, այլև ռուս-ուկրաինական հակամարտության հետևանքով առաջացած գլոբալ գործընթացներով: "Մենք տագնապալի հաղորդագրություններ ենք ստանում նաեւ Իրանի եւ Աֆղանստանի սահմանին տիրող իրավիճակի մասին", - նշել է կառավարության ղեկավարը:

Հիշեցնելով Հայաստանի ինքնիշխան տարածքի նկատմամբ Ադրբեջանի սեպտեմբերյան ագրեսիայի մասին՝ Փաշինյանն, այդուհանդերձ, նշել է երկրի իշխանությունների ընտրած խաղաղության օրակարգը։ "Հնարավոր ամեն ինչ անում ենք, որպեսզի այդ օրակարգը, ինչպես նաև խաղաղության ռազմավարությունը կյանքի կոչվեն", - նշել է Փաշինյանը։

Նա հիշեցրել է, որ նախորդ շաբաթ Մոսկվայում կայացել է Հայաստան-Ռուսաստան-Ադրբեջան ձևաչափով բանակցային գործընթացի հերթական փուլը, որի գլխավոր թեմաներից մեկը դարձել է Լեռնային Ղարաբաղում հումանիտար իրավիճակը և Լաչինի միջանցքի ապօրինի շրջափակումը: "Չեմ կարող ասել, թե այդ քննարկումների արդյունքները մեզ բավարարեցին։ Սա շատ ցավոտ իրավիճակ է, քանի որ միջանցքի փակումը տեղի է ունեցել ռուս խաղաղապահների աչքի առաջ, և դա չի կարող չառաջացնել մեր մտահոգությունը։ Բայց մենք կշարունակենք քննարկումները, այդ թվում՝ ռուս գործընկերների հետ՝ այս իրավիճակի կարգավորման ուղղությամբ", - ասել է ՀՀ վարչապետը։

Նա հիշեցրել է, որ Ռուսաստանի մայրաքաղաքում քննարկումների թեմաներից մեկը տարածաշրջանային հաորդակցությունների ապաշրջափակման հարցն էր։ <Մենք, ինչպես նախկինում, հայտարարել ենք, որ պատրաստ ենք դրան և պատկերացնում ենք, որ տվյալ դեպքում խոսքը պետք է գնա այն հաղորդակցությունների մասին, որոնց ապաշրջափակումը նախատեսված է 2020 թվականի նոյեմբերի 9-ի եռակողմ հայտարարության 9-րդ կետով։ Երևանը պատրաստ է այդ հաղորդակցությունների արագ բացմանը՝ դրանց նկատմամբ կողմերի ինքնիշխանության շրջանակներում։ Ներկայում մենք փորձում ենք գործարկել երկաթուղիները՝ այդ ուղղությամբ դրսեւորելով ճկունություն և կառուցողականություն։ Մենք, իրոք, պատրաստ ենք գնալ այդ ճանապարհով, եւ վստահ եմ, որ հաղորդակցությունների վերականգնումը եւս մեկ խթան կհանդիսանա երկրի տնտեսության զարգացման համար, բայց, ցավոք, այդ հարցի լուծումը կախված է ոչ միայն մեզանից", - ընդգծել է Հայաստանի կառավարության ղեկավարը:

Ինչ վերաբերում Է Բրյուսելում Փաշինյանի և Ադրբեջանի նախագահ Իլհամ Ալիևի հանդիպմանը, ապա, ինչպես հիշեցրել է ՀՀ վարչապետը, կողմերը պայմանավորվել են փոխադարձաբար ճանաչել միմյանց 29,8 հազար քառակուսի կիլոմետր և 86,6 քառակուսի կիլոմետր տարածքները: Այս ֆոնին անհասկանալի են թվում Ադրբեջանի նախագահի երեկվա հայտարարությունները, և այս հարցում Բաքվից և միջազգային գործընկերներից պարզաբանումներ ստանալու անհրաժեշտություն կա՝ այն առնչությամբ, թե արդյոք այդ հայտարարությունները նշանակում են հրաժարում ավելի վաղ Բրյուսելում ձեռք բերված պայմանավորվածություններից: "Մենք, իրոք, պետք է ստանանք այդ հայտարարությունների պատասխանները՝ մեր հետագա գործողությունները ծրագրելու համար", - ընդգծել է Նիկոլ Փաշինյանը:

Նա նաև հաղորդել է, որ հունիսի 1-ին Քիշնևում տեղի կունենա հնգակողմ հանդիպում Եվրոպական խորհրդի նախագահ Շառլ Միշելի, Ֆրանսիայի նախագահ Էմանուել Մակրոնի, Գերմանիայի կանցլեր Օլաֆ Շոլցի և Հայաստանի ու Ադրբեջանի ղեկավարների մասնակցությամբ: <Ավելի վաղ կարծիք էր հնչել այդ հանդիպման արդյունքում խաղաղության պայմանագրի ստորագրման հնարավորության մասին։ Այս կապակցությամբ պետք է նշեմ, որ մենք մինչ օրս Բաքվից պատասխան չենք ստացել մեր ավելի վաղ արված առաջարկներին՝ դեռ Վաշինգտոնի հանդիպումից առաջ։ Այդ իսկ պատճառով կարող եմ ասել, որ առայժմ չկա խաղաղության պայմանագրի համաձայնեցված նախագիծ, որը կարելի լիներ ստորագրել", - փաստել է Հայաստանի կառավարության ղեկավարը։