ԴԱՀԿԾ նախկին ղեկավարն անձամբ է ԱԱԾ տնօրենին զգուշացրել թմրամիջոցների խոշոր խմբաքանակի առկայության մասին. հայտարարություն

Արմինֆո. ԴԱՀԿԾ նախկին պետ, ԱԺ նախկին պատգամավոր  Միհրան Պողոսյանը հայտարարել է, թե անձամբ ԱԱԾ տնօրենին զգուշացրել է Հայաստան կոկաինի խոշոր խմբաքանակի մատակարարումների մասին: Այդ մասին ասվում է Պողոսյանի հայտարարությունում:

«Սույն թվականի մայիսի 13-ին՝ տեղեկանալով ՀՀ տարածքում գտնվող բանանի պահեստում շուրջ 1 տոննա կասկածելի զանգվածի առկայության մասին, անմիջապես ձեռնամուխ եմ եղել համապատասխան քայլեր ձեռնարկելուն։

Մասնավորապես, զանգահարել եմ ՀՀ ԱԱԾ տնօրենի ընդունարան, արդյունքի չհասնելով՝ քիչ անց ձայնային հաղորդագրություն եմ ուղարկել ԱԱԾ տնօրենի բջջային հեռախոսահամարին, որից հետո՝ կարճ ժամանակ անց, Արմեն Աբազյանը զանգահարել է ինձ։

Հեռախոսազրույցի ընթացքում տեղեկացրել եմ նրան, որ բանանի ներմուծմամբ զբաղվող իմ մտերիմի ընկերության աշխատակիցները կոնտեյների մեջ՝ ակնկալվող բանանի փոխարեն, հայտանաբերել են խոշոր ծավալի անհայտ ծագման փոշենման զանգված։ Տեղեկացրել եմ նաև, որ ընկերության տնօրնը՝ փաստաբանական խմբի հետ միասին, ԱԱԾ շենքի դիմաց է  և ցանկանում է հաղորդում տալ։

ԱԱԾ պետին խնդրել եմ ընդունել հաղորդումն ու արագ ընթացք տալ գործին։

Եվ այս պարագայում, խախտելով գաղտնիության և անձի պաշտպանության իրավունքը, ԱԱԾ-ն գործողություններ է իրականացնում այն մարդկանց նկատմամբ՝ ովքեր ահազանգել են դեպքի մասին։

Բոլորին հասկանալի է, որ մարդիկ, ովքեր ցուցաբերելով իրական քաղաքացիական գիտակցություն, պատկան մարմիններին տեղեկացրել են 1 տոննա կոկաինի առկայության և գտնվելու վայրի մասին, կարող են ունենալ անձնական անվտանգության խնդիրներ։

Ելնելով մի շարք գործոններից առայժմ ձեռնպահ կմնամ այլ մանրմասներ ներկայացնելուց՝ հորդորելով պատկան մարմիններին անտեղի մարդկանց չքաշքշել։

  ՀՀ համապատասխան ծառայությունները հրաշալի տեղյակ են կատարվածի մասին, գիտեն եղելությունը ուստի և կոչ եմ անում այս գործի շրջանակներում բացառել «վհուկների որսն»  ու բացահայտել ամբողջ իրականությունն ու իրական պատասխանատուներին», - ասվում է հայտարարությունում։

Հիշեցնենք, որ մայիսի 24-ին Ազգային Ժողովում ելույթ ունենալիս ՀՀ վարչապետ Նիկոլ Փաշինյանը հայտարարել էր, որ ԱԱԾ-ի կողմից հարուցված քրեական գործի շրջանակում կան ձերբակալվածներ։ Նա, փաստորեն հանցագործության կատարման մեջ ուղղակիորեն մեղադրել էր Միհրան Պողոսյանին, այդ գործը կապելով նախկինում իշխող Հանրապետական կուսակցության գործունեության հետ, որի շարքերում էր ԴԱՀԿ նախկին տնօրենը, որը երկիր բանան մատակարարող խոշոր ընկերության դե ֆակտո սեփականատերն էր։

Նախօրեին ԱԱԾ-ը հաղորդել է այդ գործի շրջանակում «Մրգենի» ՍՊ ընկերության ներմուծումների և գնման բաժնի պետ Մ.Ղ-ի  ձերբակալության մասին: Ավելի վաղ Ազգային անվտանգության ծառայությունը հաղորդագրություն էր տարածել Էկվադորից մրգերի խմբաքանակի մեջ 1 տոննա կոկաինի ապօրինի ներկրման փորձի բացահայտման մասին: Թմրանյութի հսկայական խմբաքանակը, որի ընդհանուր արժեքը կազմում է շուրջ 250 մլն եվրո, Հայաստանում հայտնվել է Իտալիայի և Վրաստանի տարածքով տարանցմամբ: Միևնույն ժամանակ, ՌԲԿ-ը հաղորդել էր, որ Իտալիայի Ռեջիո դի Կալաբրիա շրջանի մաֆիայի դեմ պայքարի վարչությունը 3 տոննա կոկաին է առգրավել բանանի տարաներում, որոնք Հայաստան էին փոխադրվում Էկվադորով և Վրաստանով: Կոկաինն առգրավվել է Ջոյա Տաուրո նավահանգստում։ Թմրանյութը թաքցված է եղել 78 տոննա բանանի մեջ։ Եթե թմրավաճառները կարողանային բեռը փոխադրել, նրանք ավելի քան 800 մլն եվրո կստանային, քանի որ կոկաինը "չափազանց մաքուր էր եւ իդեալական վիճակում": Թմրանյութերի տեղափոխման և ոչնչացման համար ներգրավվել են Իտալիայի ֆինգվարդիայի ավելի քան 30 աշխատակից։