Լավրովը հայտարարել է հաջորդ շաբաթ Հայաստանի, Ադրբեջանի և Ռուսաստանի փոխվարչապետների հանդիպման մասին՝ հաղորդակցությունների ապաշրջափակման հարցով

Արմինֆո. Հայաստանի, Ադրբեջանի և Ռուսաստանի արտաքին գործերի նախարարներ Արարատ Միրզոյանը, Ջեյհուն Բայրամովը և Սերգեյ Լավրովը Մոսկվայում կայացած եռակողմ հանդիպման ընթացքում գնահատականներ են փոխանակել այն իրավիճակի վերաբերյալ, որը ձևավորվում է 2020 թվականի նոյեմբերի 9-ից ՀՀ, ԱՀ և ՌԴ ղեկավարների միջև ձեռք բերված պայմանավորվածությունների կատարման ուղղությամբ աշխատանքի համատեքստում։ Այդ մասին մայիսի 19-ին Մոսկվայում հայտարարել է ՌԴ ԱԳ նախարար Սերգեյ Լավրովը՝ ամփոփելով Ռուսաստանի, Հայաստանի և Ադրբեջանի ԱԳ նախարարների հանդիպման արդյունքները:

Այդ առումով նա հիշեցրել է, որ այդ պայմանավորվածությունները վերաբերում են, առաջին հերթին, Լեռնային Ղարաբաղում անվտանգության եւ կայունության ապահովմանը, այդ թվում՝ նաեւ ռուսական խաղաղապահ զորակազմի պատասխանատվության գոտում: "Դրանք վերաբերում են տրանսպորտային և տնտեսական հաղորդակցությունների ապաշրջափակմանը։ Դրանով զբաղվում է եռակողմ աշխատանքային խումբը ՝ Հայաստանի, Ադրբեջանի և Ռուսաստանի փոխվարչապետների գլխավորությամբ։ Եվ այդ պայմանավորվածությունները վերաբերում են նաև հումանիտար հարցերի լուծմանը, բայց, առաջին հերթին, խոսքը սահմանի սահմանազատման և դրան հաջորդող սահմանագծման մասին է։ Դրա համար Հայաստանի, Ադրբեջանի և ՌԴ ղեկավարների առանձին հայտարարությամբ ստեղծվել է սահմանազատման և հետագա սահմանագծման ՝ հայ - ադրբեջանական հանձնաժողով Ռուսաստանի մասնակցությամբ ՝ որպես խորհրդատու", - ասել է ՌԴ նախարարը։

Դրա հետ մեկտեղ, նա փաստել է, որ առանձին թեմա է խաղաղության պայմանագիրը, որի վրա կողմերը սկսել են աշխատել, եւ որն այժմ ակտիվորեն քննարկվում է, այդ թվում ՝ այլ միջնորդների միացմամբ։

"Ինչպես գիտեք, հայ և ադրբեջանցի նախարարները մեկնել էին Վաշինգտոն, Հայաստանի և Ադրբեջանի նախագահները մեկ շաբաթ առաջ եղել են Բրյուսելում։ Խաղաղության պայմանագրի շուրջ աշխատանքը, անշուշտ, հիմնարար է: Սակայն, մեր գործընկերներն այսօր հաստատեցին, որ առանց սահմանազատման, տրանսպորտային և տնտեսական հաղորդակցությունների ապաշրջափակման, առանց անվտանգության ապահովմանն առնչվող իրավիճակի ընդհանուր բարելավման՝ թե Ղարաբաղում, թե հայ-ադրբեջանական սահմանին, դժվար է առաջ շարժվել խաղաղության պայմանագրի կոնկրետ ասպեկտներով", - ընդգծել է ՌԴ ԱԳ նախարարը։

Լավրովը հաղորդել է, որ վերը նշված բոլոր հարցերը քննարկվել են համալիր, Հայաստանի եւ Ադրբեջանի գործընկերները երախտագիտություն են հայտնել ռուսական կողմին ընդհանուր ջանքերում առաջատար դերակատարման համար, որոնք մարմնավորվում են, առաջին հերթին, առաջնորդների եռակողմ հայտարարություններում եւ այն շփումներում, որոնք շարունակվում են վերը նշված ուղղություններից յուրաքանչյուրում: "Հաջորդ շաբաթ պետք է կայանա տրանսպորտային հաղորդակցությունների ապաշրջափակման հարցով փոխվարչապետների խմբի հերթական եռակողմ հանդիպումը։ Մենք հույս ունենք, որ դրական արդյունքի կհասնենք։ Կողմերն արդեն բավականին մոտ են վերջնական պայմանավորվածությանը։ Եվ մոտ ժամանակներս պայմանավորվել ենք սահմանազատման և սահմանագծման հարցերով երկկողմ հանձնաժողովի նիստ անցկացնել ՝ Ռուսաստանի խորհրդատվական մասնակցությամբ", - տեղեկացրել է Լավրովը։

Միևնույն ժամանակ, նա ընդգծել է, որ խաղաղության պայմանագրի և մի շարք հոդվածների շուրջ, որոնք այսօր քննարկվել են, հաջողվել է երկու կողմերի ըմբռնումը մոտեցնել ընդհանուր տեսլականին: "Եվ հույս ունեմ, ահա այժմ սկսվել է Հայաստանի եւ Ադրբեջանի արտգործնախարարների երկկողմ հանդիպումը, դրա արդյունքներով նրանք մեզ կտեղեկացնեն այն մասին, թե ինչի է հաջողվել հասնել", - ասել Է ՌԴ ԱԳ նախարարը, հավելելով, որ Մոսկվայի խնդիրն այդ հանդիպման անցկացումն էր։ Նա նաև հույս է հայտնել, որ բանակցությունները թույլ կտան հասնել գործնական արդյունքների: "Հետագայում ևս կնպաստենք առաջ շարժվելուն, որպեսզի լիարժեք իրականացնենք բոլոր եռակողմ հայտարարությունների բոլոր դրույթները, որոնք հիմք են հանդիսանում հայ-ադրբեջանական հարաբերությունների կարգավորման համար", - ամփոփել է Լավրովը: