Շառլ Միշելը պատմել է Ալիևի և Փաշինյանի հետ հանդիպման արդյունքների մասին. արդյունքները Հայաստանի համար անմխիթար են

Արմինֆո. Բրյուսելում կայացել է Եվրոպական խորհրդի նախագահի, Ադրբեջանի նախագահ Իլհամ Ալիևի և Հայաստանի վարչապետ Նիկոլ Փաշինյանի հինգերորդ հանդիպումը: Ինչպես ասվում է հանդիպման արդյունքների վերաբերյալ Եվրախորհրդի նախագահ Շառլ Միշելի հայտարարությունում, որը հրապարակվել է ԵԽ կայքում, տեղի է ունեցել է բաց, անկեղծ ու արդյունքին միտված կարծիքների փախանակում:

 Նշվում է, որ ուշադրությունը կենտրոնացվել է հայ-ադրբեջանական հարաբերությունների կարգավորման ճանապարհին առաջընթացի վրա։ «Ղեկավարները կիսում են Հարավային Կովկասում խաղաղություն հաստատելու ընդհանուր պատրաստակամությունը։ Ես բարձր եմ գնահատում նրանց համատասխան ջանքերը։ Միասին մենք վերանայել ենք մեր օրակարգի բոլոր հարցերը։

Խաղաղության պայմանագրի շուրջ ԱՄՆ-ում վերջերս կայացած դրական բանակցություններից հետո պետք է պահպանվի Հայաստանի և Ադրբեջանի միջև համապարփակ խաղաղության համաձայնագրի ստորագրման ուղղությամբ վճռական քայլեր ձեռնարկելու թափը», - ասվում է ԵԽ ղեկավարի հայտարարությունում։ «Սահմանային հարցերում մենք վերանայել ենք առաջընթացը և սահմանի սահմանազատման հետ կապված հաջորդ քայլերը։ Այս համատեքստում ղեկավարները պայմանավորվել են սահմանային հարցերի շուրջ երկկողմ հանդիպումների վերսկսման շուրջ։ Ղեկավարները վերահատատել են իրենց անվերապահ հավատարմությունը 1991 թվականի Ամլաթիի հռչակագրին և Հայաստանի (29,800 քառակուսի կիլոմետր) ու Ադրբեջանի (86,600 քառակուսի կիլոմետր) համապատասխան տարածքային ամբողջականությանը: Սահմանի վերջնական սահմանազատումը կհամաձայնեցվի բանակցությունների միջոցով»,- հավելել է Միշելը։ Նրա ասելով,  կողմերը հստակ առաջընթաց են գրանցել տարածաշրջանում տրանսպորտային և տնտեսական կապերի ապաշրջափակմանն ուղղված քննարկումներում։ «Այս թեմայի շուրջ կողմերի դիրքորոշումներ այժմ միմյանց շատ մոտ են, մասնավորապես, Նախիջևանի հետ և այդ հատվածով երկաթուղային հաղորդակցությունը վերականգնելու հարցում։ Նրանց համապատասխան խմբերին հանձնարարվել է վերջնական տեսքի բերել երկաթուղային հաղորդակցության վերականգնման պայմանների և համատեղ շինարարական աշխատանքների մասին համաձայնագիրը՝ կոնկրետ գրաֆիկով։

Նրանք նաև պայմանավորվել  են օգտվել Համաշխարհային մաքսային կազմակերպության աջակցությունից այս աշխատանքի համար»,- հավելել է ԵԽ ղեկավարը:

Անդրադառնալով հումանիտար հարցերին՝ Միշելն ընդգծել է, որ եղել է հասկացվածություն, որ առաջիկա շաբաթներին ազատ կարձակվեն մնացած պահվող անձինք։ «Ես նաև ընդգծել եմ փոխըմբռնման պահպանման անհրաժեշտությունն առ այն, որ զինծառայողները, որոնք, պարզապես, մոլորվել և հակառակ կողմ են անցել, առաջիկայում արագացված կարգով ազատ կարձակվեն։ Մենք նաև քննարկել ենք անհետ կորածների ճակատագրերը պարզելու և ականազերծման աշխատանքներն ակտիվացնելու կարևորությունը։

Մենք շարունակել ենք կարծիքների փոխանակումը Լեռնային Ղարաբաղի նախկին ինքնավար մարզում ապրող հայերի իրավունքների և անվտանգության հարցի վերաբերյալ։ Ես Ադրբեջանին կոչ եմ արել միջազգային հանրության հետ սերտ համագործակցությամբ մշակել դրական օրակարգ՝ այդ բնակչության իրավունքներն ու անվտանգությունն ապահովելու համար։ Ես նաեւ բարձրացրել եմ Բաքվի եւ այդ բնակչության միջեւ թափանցիկ եւ կառուցողական երկխոսության անհրաժեշտության հարցը»,- հայտարարել է Շառլ Միշելը: Ընդ որում,նա կարևորել է թշնամական հռետորաբանությունից զերծ մնալը, բարեխիղճ գործելը, ինչպես նաև առաջնորդություն դրսևորելը փոխընդունելի լուծումների հասնելու համար։

Նա հավաստիացրել է, որ ԵՄ թաքնված ծրագրեր չունի։ «Մեր միակ նպատակն է օգնել Հայաստանին և Ադրբեջանին հասնել համապարփակ և արդար խաղաղության։ Մենք պատրաստ ենք մեր ներդրումն ունենալ նրանց համատեղ ջանքերում։ Մենք պայմանավորվել ենք Բրյուսելում հանդիպումներ անցկացնել այնքան հաճախ, որքան անհրաժեշտ է։ Ղեկավարները կրկին կհանդիպեն Բրյուսելում հուլիսին։ Եվ, ինչպես արդեն հրապարակային հայտարարվել է, ամենամոտ ժամկետներում մենք կրկին կհանդիպենք Ֆրանսիայի նախագահ Էմանուել Մակրոնի և կանցլեր Օլաֆ Շոլցի մասնակցությամբ՝ Քիշնևում Եվրոպական քաղաքական համայնքի երկրորդ գագաթնաժողովի հարթակում։ Ես նաև մտադիր եմ ղեկավարներին հրավիրել մասնակցելու համանման ևս մեկ հանդիպման Եվրոպական քաղաքական համայնքի երրորդ գագաթնաժողովին, որը կկայանա հոկտեմբերին Գրանադայում»,- ամփոփել է Միշելը։