FT. Փաշինյանն ու Ալիևը կհանդիպեն Բրյուսելում

Արմինֆո.Հայաստանի վարչապետ Նիկոլ Փաշինյանը և Ադրբեջանի նախագահ Իլհամ Ալիևը մայիսի 14-ին կհանդիպեն Բրյուսելում՝ Եվրոպական խորհրդի նախագահ Շառլ Միշելի միջնորդությամբ, գրում է The Financial Times-ը:

Նշվում է, որ արեւմտյան դաշնակիցներն ակտիվացնում են հակամարտության մեջ ներգրավված հարեւան երկրների միջեւ միջնորդական ջանքերը "վիճելի սահմանի պատճառով մարտական գործողությունների վերջին բռնկումից հետո":

"Դա կլինի երկու առաջնորդների առաջին անձնական հանդիպումը փետրվարին Մյունխենում կայացած բանակցություններից և անցյալ շաբաթ Վաշինգտոնում Հայաստանի և Ադրբեջանի արտգործնախարարների ծավալուն քննարկումներից հետո: ԱՄՆ պետքարտուղար Էնթոնի Բլինքենն ասել է, որ այդ բանակցությունները "զգալի առաջընթաց են գրանցել կայուն խաղաղության համաձայնագրի հասնելու գործում", եւ, նրա կարծիքով, "համաձայնագիրը (գտնվում է) տեսանելիության սահմաններում, հասանելիության սահմաններում", Financial Times-ին հաղորդել են երեք իրազեկ պաշտոնյաներ:

Բրյուսելի հանդիպումը "առաջընթացի կարեւոր նշան է", պարբերականին ասել է երեք պաշտոնյաներից մեկը՝ անանունության պայմանով, քանի որ (հանդիպման մասին) տեղեկատվությունը դեռեւս չի հրապարակվել, հավելելով, որ ԵՄ-ի եւ ԱՄՆ-ի ջանքերը "փոխադարձ ամրապնդող" եւ "երկկողմ գործընթացները լրացնող" էին:

Երկու աղբյուրների հավաստմամբ՝ երեք առաջնորդները ծրագրում են հունիսի 1-ին եւս մեկ հանդիպում անցկացնել Գերմանիայի կանցլեր Օլաֆ Շոլցի եւ Ֆրանսիայի նախագահ Էմանուել Մակրոնի հետ՝ Մոլդովայում եվրոպական քաղաքական համայնքի գագաթնաժողովի շրջանակներում:

Միշելի և Ալիևի ներկայացուցիչները հրաժարվել են մեկնաբանություններից։ Նշվում է, որ Փաշինյանի մամուլի քարտուղարը չի պատասխանել մեկնաբանության վերաբերյալ հարցմանը։

"Ադրբեջանն իրեն բավականին հարմարավետ է զգում Շառլ Միշելի առաքելության հետ, քանի որ ԵՄ-ը քողարկված օրակարգ չունի", - ասել է Ալիևի արտաքին քաղաքականության հարցերով խորհրդական Հիքմեթ Հաջիևը: Նա հավելել է, որ ԵՄ-ն մշակել է բանակցությունների "առանցքային հայեցակարգերը" եւ դրանց կառուցվածքները: Նրա խոսքով, Բաքուն "ճկունություն" է դրսեւորում Մոսկվայում, Վաշինգտոնում կամ Բրյուսելում հանդիպումների հարցում, քանի որ արդյունքների հասնելու համար գործընթացը պետք է լինի ավելի ներառական: "Ռուսաստանը կարող է արդյունավետորեն նպաստել տարածաշրջանում խաղաղաշինության գործընթացին", - ասել է Հաջիևը: "Բայց նաև ճիշտ է, որ Ռուսաստանը շատ մտահոգված է Ուկրաինայի պատերազմով", -հավելել է նա:

< Բանակցությունները, հավանաբար, կկենտրոնանան Լաչինի միջանցքում ՝ Հայաստանից դեպի Լեռնային Ղարաբաղ տանող միակ ճանապարհին,հսկիչ անցակետ տեղադրելու Ադրբեջանի վերջին որոշման վրա: Դրանք նվիրված կլինեն նաև սահմանազատմանը, գերիների փոխանակմանը և անկլավում ցրված հազարավոր ականների վնասազերծմանն ուղղված ջանքերին", - գրում է Financial Times-ը։