Մոսկվա. կարևոր ենք համարում, որ պաշտոնական Երևանն իր նպաստը բերի Բերձորի միջանցքում իրավիճակի շուրջ փոխընդունելի հանգուցալուծումների որոնմանը

Արմինֆո. Ներկայումս ինչպես ռուսական խաղաղապահ զորախմբի գծով "գետնի վրա", այնպես էլ քաղաքական մակարդակով անհրաժեշտ ջանքեր են գործադրվում Բերձորի/Լաչինի միջանցքի շուրջ ստեղծված իրավիճակը կարգավորելու և 2020 թվականի նոյեմբերի 9-ի եռակողմ պայմանավորվածությունների հուն վերադառնալու ուղղությամբ: Այդ մասին ապրիլի 27-ին ամենշաբաթյա ճեպազրույցի ժամանակ հայտարարել է Ռուսաստանի ԱԳՆ պաշտոնական ներկայացուցիչ Մարիա Զախարովան՝ մեկնաբանելով եռակողմ հայտարարությամբ ստանձնած պարտավորությունները կատարելու Երեւանի կոչը Մոսկվային։

Նա հիշեցրել է, որ Ռուսաստանը միջանցքում տեղի ունեցածի վերաբերյալ իր դիրքորոշումը հստակ արտահայտել է ապրիլի 24-ի հայտարարության մեջ: "Կարեւոր ենք համարում, որ պաշտոնական Երեւանն իր ներդրումն ունենա փոխընդունելի հանգուցալուծումների որոնման գործում", - հավելել Է Զախարովան:

Նշենք, որ ապրիլի 23-ին Ադրբեջանը պաշտոնապես հայտարարել է Լաչինի (Բերձոր)- Ստեփանակերտ ճանապարհին անցակետ տեղադրելու մասին:  Ընդ որում, որպես անցակետի տեղադրման պատճառ թշնամական կողմի սահմանապահ ծառայությունը ներկայացրել է հերթական կեղծ փաստարկը,  իբր, Հայաստանից Արցախ կենդանի ուժի, զինամթերքի, ականների, ինչպես նաև այլ զինտեխնիկայի տեղափոխումը կանխելու նպատակով: Միջանցքում անցակետի տեղադրումը հակասում է Հայաստանի, Ադրբեջանի և Ռուսաստանի ղեկավարների 2020 թվականի նոյեմբերի 9-ի եռակողմ հայտարարության 6-րդ կետին ։

Ադրբեջանական կողմը նաև նշել է, որ այս փաստի մասին տեղեկացված են ռուսական խաղաղապահ զորակազմի հրամանատարությունը և ռուս-թուրքական մոնիտորինգային կենտրոնը: ՀՀ ԱԳՆ-ն անցակետի սահմանումը որակել է Հայաստանի, Ռուսաստանի և Ադրբեջանի ղեկավարների 2020 թվականի եռակողմ հայտարարության կոպիտ խախտում: Ի պատասխան ՝ Բաքվում անցակետի հաստատումը "լեգիտիմ քայլ"են անվանել։

Հավելենք նաև, որ ավելի վաղ ՄԱԿ-ի Միջազգային դատարանը փետրվարի 22-ի որոշմամբ Ադրբեջանին պարտավորեցրել էր ապաշրջափակել Բերձորի միջանցքը, որը 2020 թվականի դեկտեմբերի 12-ից գտնվում է ադրբեջանական շրջափակման մեջ ։ Սակայն Ադրբեջանը մինչ օրս անտեսում է այդ վճիռը ։ Այս ամենը տեղի է ունենում միջազգային հանրության անգործության ֆոնին։