Արմինֆո. ԱՄՆ պետքարտուղար Էնթոնի Բլինքենը հաղորդել է, որ հեռախոսազրույց է ունեցել ՀՀ վարչապետ Նիկոլ Փաշինյանի հետ՝ վերահաստատելու Հայաստանին եւ Ադրբեջանին կայուն խաղաղության հասնելու գործում աջակցելու ԱՄՆ-ի հանձնառությունը: Այդ մասին նա հաղորդել է Twitter-ի իր միկրոբլոգում:
"Դիվանագիտությունը Հարավային Կովկասում խաղաղության միակ ճանապարհն է", - հավելել է Բլինքենը:
Միեւնույն ժամանակ, Բլինքենի և Փաշինյանի հեռախոսազրույցի մասին ԱՄՆ Պետդեպարտամենտի կայքում զետեղված հաղորդագրության մեջ նշվում է, որ պետքարտուղարը Հայաստանի վարչապետ Նիկոլ Փաշինյանի հետ զրույցում առաջարկել է ԱՄՆ-ի հետագա օգնությունը՝ աջակցելու Ադրբեջանի հետ խաղաղության շուրջ երկկողմ բանակցություններին: "Բլինքենը շնորհակալություն է հայտնել Փաշինյանին խաղաղությանը Հայաստանի մշտական նվիրվածության համար և կոչ արել կոնկրետ քայլեր ձեռնարկել չլուծված հարցերի լուծումներ գտնելու ուղղությամբ։ Նա հաստատել է, որ ԱՄՆ-ն աջակցում է ուղիղ բանակցություններին եւ դիվանագիտությանը Հարավային Կովկասում կայուն եւ հաստատուն խաղաղության պահպանման համար, եւ ընդգծել է, որ ռազմական լուծում գոյություն չունի", - ասվում է ԱՄՆ Պետդեպարտամենտի հաղորդագրությունում: