Արցախի շուրջ իրավիճակը և Ադրբեջանի ագրեսիվ հռետորաբանությունը Մոսկվայում Լավրով-Միրզոյան բանակցությունների օրակարգի առանցքային հարցերն են

Արմինֆո.Անփոփոխ բարձր ենք գնահատում մեր բարեկամական հարաբերությունները Հայաստանի հետ։ Մարտի 20-ին այդ մասին հայտարարել է Ռուսաստանի արտգործնախարար Սերգեյ Լավրովը՝  բացելով Հայաստանի ԱԳ նախարար Արարատ Միրզոյանի հետ բանակցությունները։

Այդ առումով նա հիշեցրել է, որ բոլորովին վերջերս իրենք շփվել են Նյու Դելիի գագաթնաժողովի հարթակներում։ "Նշում ենք մեր առաջնորդների միջև շարունակվող ինտենսիվ քաղաքական երկխոսությունը, այդ թվում՝ ԵԱՏՄ, ՀԱՊԿ, ԱՊՀ գծով միջոցառումների շրջանակներում։ Այս տարվա մայիսին տեղի կունենա Եվրասիական տնտեսական բարձրագույն խորհրդի նիստ", - նշել է նա։

Լավրովը հիշեցրել է, որ այս պահին Ռուսաստանը Հայաստանի առաջատար առևտրային գործընկերն ու տնտեսությունում ներդրողն է։ Այդ առումով Նա նշել է, որ անցյալ տարին ռեկորդային էր, առեւտուրը գրեթե կրկնապատկվել է՝ հասնելով  մոտ 5 մլրդ դոլարի։ "Մենք առայժմ դոլարով ենք հաշվարկում, այդ ամենը ժամանակավոր է։ Դա օգնել է ձեր երկրին ապահովել ՀՆԱ-ի ռեկորդային աճ, գործարար ակտիվության աճ", - ասել է նա՝ նշելով Մոսկվայի շահագրգռվածությունը ամրապնդել միասնական կրթական, գիտական, լեզվական տարածք, հումանիտար կապեր, շփումներ տարածաշրջանների միջեւ։

"Զգալի ժամանակ ենք հատկացնելու տարածաշրջանային անվտանգությանը։ Առաջնային խնդիրներից մեկը Լաչինի միջանցքի և, ընդհանրապես, Լեռնային Ղարաբաղի շուրջ իրավիճակի կարգավորումն է։ Մենք կասկած չունենք, որ Հայաստանի, Ռուսաստանի և Ադրբեջանի ղեկավարների եռակողմ հայտարարությունները մնում են թե տնտեսական, թե ռազմաքաղաքական և թե միջազգային իրավական ոլորտներում իրավիճակի կայունացման համար բոլոր որոշումների իրագործման բանալին։ Պատրաստ կլինենք ամեն կերպ աջակցել տրանսպորտային հաղորդակցությունների ապաշրջափակմանը, սահմանազատմանը, Երեւանի եւ Բաքվի միջեւ խաղաղության պայմանագրի համաձայնեցմանը", - ընդգծել է Լավրովը։

Իր հերթին՝ Միրզոյանը համոզմունք է հայտնել, որ բանակցությունների ընթացքում հնարավորություն կլինի քննարկել և նշել քաղաքական երկխոսության բարձր մակարդակը, տնտեսական կապերի աճը, երկկողմ հարաբերությունների խորացումը բոլոր առումներով՝ մշակութային-հումանիտար ոլորտից մինչև երկու երկրների տարածաշրջանների մակարդակով փոխգործակցություն։ Այդ կապակցությամբ Հայաստանի նախարարը հայտարարել է երկու երկրների միջև փոխշահավետ համագործակցությունը խորացնելու և զարգացնելու Երևանի պատրաստակամության մասին։

"Ինչ վերաբերում է տարածաշրջանում տիրող իրավիճակին, ապա, ցավոք, այն էլ ավելի է սրվում Ադրբեջանի բարձրագույն մակարդակի ագրեսիվ հռետորաբանության և ռազմական սադրանքների պատճառով՝ ոչ միայն Լեռնային Ղարաբաղի, այլև Հայաստանի ինքնիշխան տարածքի դեմ։

Ադրբեջանի կողմից Բերձորի (Լաչինի) միջանցքի արգելափակումը, խախտելով 2020 թվականի նոյեմբերի 9 - ի եռակողմ հայտարարությունը, ինչպես նաև Լեռնային Ղարաբաղ էներգառեսուրսների մատակարարման նպատակային խափանումները, հարցեր չեն թողնում պաշտոնական Բաքվի դրդապատճառների մասին. Լեռնային Ղարաբաղում էթնիկ զտումների իրականացում", - նշել է նախարարը։

Միրզոյանի խոսքով՝ այս ֆոնին կարեւորվում է 2020 թվականի նոյեմբերի 9-ի եռակողմ հայտարարությանը խստագույնս համապատասխան ձեռք բերված պայմանավորվածությունների կատարման և Բերձորի միջանցքի ապաշրջափակման, Ադրբեջանի դեմ ժամանակավոր միջոցների մասին Միջազգային դատարանի փետրվարի 22-ի որոշման կատարման հրամայականը։ "Ցավոք, նոյեմբերի 9-ի հայտարարության մեջ, գործնականում, չկա մի կետ, որն Ադրբեջանը չի խախտել։ Հրադադարի ռեժիմի պարբերական խախտում, Հայաստանի Հանրապետության տարածքների օկուպացում, Լաչինի միջանցքի ապօրինի արգելափակում, հայ ռազմագերիների պահում, տարածաշրջանային հաղորդակցությունների բացմանը խոչընդոտում, հայ բնակիչների՝ Ադրբեջանի վերահսկողության տակ անցած իրենց բնակավայրեր վերադարձի մեխանիզմի գործարկմանը խոչընդոտում: Ավելին, ադրբեջանական կողմն իր մշտական սադրանքով տորպեդահարում է տարածաշրջանում երկարատև խաղաղության և կայունության հաստատմանն ուղղված ջանքերը", - նշել է նա։ Այս համատեքստում Միրզոյանը նշել է ՀՀ դաշնակիցների և գործընկերների կողմից ակտիվ քայլերի անհրաժեշտությունը՝ Ադրբեջանի կողմից իր պարտավորությունները կատարելու և ուժի կամ ուժի սպառնալիքի կիրառման պրակտիկան դադարեցնելու համար, ինչը միջազգային իրավունքի նորմերի ու սկզբունքների խախտում է։

Վերջում նա հույս է հայտնել, որ հանդիպման ընթացքում կհաջողվի քննարկել վերոնշյալ բոլոր հարցերը: -