Արմինֆո.Հայաստանի մի շարք ոչ կառավարական կազմակերպություններ հանդես են եկել հայտարարությամբ, որում դատապարտել են հարձակումները լրատվամիջոցների, մասնավորապես, Aravot.am-ի յութուբյան ալիքի վրա:
ԱրմԻնֆո-ին տրամադրված հայտարարության տեքստում, մասնավորապես, նշվում է մարտի 14-ին հաքերային հարձակման արդյունքում կոտրվել է «Aravot.am» լրատվական կայքի յութուբյան ալիքը, ջնջվել տեսանյութերի ողջ արխիվը։
«Ըստ կայքի խմբագիր Աննա Իսրայելյանի, դա տեղի է ունեցել այն բանից հետո, երբ խմբագրությունն անոնս է տեղադրել հետևյալ բովանդակությամբ․ «․․․Ինչպե՞ս և որքա՞ն հարստացան հեղափոխական պաշտոնյաները պատերազմող երկրում, պատերազմի տարում: Ովքե՞ր են մեր օրերի «Չախչախ թագավորները»: Այն վերաբերում էր մոտակա ժամերին հրապարակվելիք հետաքննական տեսանյութին։
Սա առաջին դեպքը չէ, երբ մտահոգիչ զուգադիպությամբ իշխանություններին հասցեագրված քննադատությանը հետևում են առցանց հարթակների նկատմամբ հաքերային հարձակումներ։ Տեղեկատվական անվտանգության մասնագետների նախնական ուսումնասիրությունը ցույց է տալիս այդ գործողությունների ձեռագրի տեխնիկական ընդհանրությունը։ Մասնավորապես՝ մասնագետները նկատել են այս դեպքի և մեկ այլ՝ «Իրազեկ քաղաքացիների միավորում» ՀԿ-ի յութուբյան ալիքի վրա այս տարվա հունվարին իրականացված հաքերային հարձակման տակտիկայի համընկնում։ Այս պայմաններում տարակուսանք է առաջացնում, երբ իշխող քաղաքական ուժի որոշ ներկայացուցիչներ անհեթեթ և հեգնական մեկնաբանություններ են տարածում սոցցանցերում՝ մեղքը բարդելով նույն լրատվամիջոցի վրա։
Մենք՝ ներքոստորագրյալ կազմակերպություններս, ինչպեսև «Aravot.am»-ը, առայժմ ձեռնպահ ենք մնում մեղադրանք ուղղել որևէ մեկի հասցեին, քանի դեռ ձեռք չեն բերվել ապացույցներ։ Սակայն մեզ իրավունք ենք վերապահում արձանագրել և համադրել փաստերը՝ հանրային ուշադրություն հրավիրելով դրանց վրա։
Արտահայտելով մեր վրդովմունքը լրատվամիջոցի նկատմամբ իրականացված հաքերային հարձակման կապակցությամբ՝ պահանջում ենք․
- Իրավապահ մարմիններից՝ այս հայտարարությունն ընդունել որպես հաղորդում կիբեր-հանցագործության մասին և անհապաղ միջոցներ ձեռնարկել մեղավորներին բացահայտելու և պատասխանատվության ենթարկելու համար,
- Իշխող քաղաքական թիմի ներկայացուցիչներից՝ զերծ մնալ անհիմն ենթադրություններից և մեկնաբանություններից, որոնք ոչ այլ ինչ են, քան խնդրի էությունից ուշադրությունը շեղելու փորձեր», - ասվում է հայտարարությունում, որի տակ ստորագրել են Խոսքի ազատության պաշտպանության կոմիտեն, Երեւանի մամուլի ակումբը, Մեդիա նախաձեռնությունների կենտրոնը, Լլրագրողների «Ասպարեզ» ակումբը, Ինֆորմացիայի ազատության կենտրոնը, Հանրային լրագրության ակումբը,
«Լրագրողներ հանուն ապագայի» ՀԿ, «Լրագրողներ հանուն մարդու իրավունքների» ՀԿ, Գորիսի մամուլի ակումբ «Ֆեմիդա» ՀԿ:
Նախօրեին «Առավոտ» օրաթերթի դեմ կատարված կիբերհարձակումը խստորեն դատապարտել էր Հայաստանի Ժուռնալիստների միությունը: «Հայաստանի Ժուռնալիստների միությունը խստորեն դատապարտում է «Առավոտ» օրաթերթի դեմ կատարված այս կիբերհարձակումը, իշխանությունից, պետական բոլոր մարմիններից պահանջում է ամենասեղմ ժամկետում բացահայտել հանցագործության կատարողներին ու պատվիրատուներին, արժանացնել քրեաիրավական գնահատականի։ Հակառակ պարագայում կհաստատվեն կասկածները, որ «Առավոտի» դեմ հարձակումը կատարվել է իշխանության, անձամբ Նիկոլ Փաշինյանի ցուցումով։
Ցավոք, «Առավոտ» օրաթերթի դեմ տեղի ունեցածը ոչ թե բացառություն է, եզակի դեպք, այլ օրինաչափություն, որը վկայում է 2018 թվականից հետո անկախ, չվերահսկվող մամուլի դեմ իշխանությունների ծավալած հետևողական արշավի մասին։ Անցած շուրջ հինգ տարիներին իշխանությունը խտրություն չի դրել մամուլի դեմ պայքարի միջոցներում՝ սկսած լրատվամիջոցների նկատմամբ ֆեյքային հարձակումներից, մինչև փաստերի ստուգման ամենատարբեր կազմակերպությունների միջոցով ԶԼՄ-ների սոցցանցային էջերի արգելափակում կամ հասանելիության սահմանափակում։ Իշխանությունների, նրանց կողմից կառավարվող կեղծ օգտատերերի կողմից բացահայտ և քողարկված կերպով թիրախավորվում և տոտալ հարձակումների էին ենթարկվում ոչ իշխանական լրատվամիջոցների սոցիալական հարթակները, կայքէջերը, յութուբյան էջերը, խմբագիրների, լրագրողների, հանրային գործիչների ֆեյսբուքյան աշխատանքային և անձնական էջերը... Նպատակն ակնհայտ է՝ լռեցնել ազատ խոսքը, հեղինակազրկել մամուլը և լրագրողի աշխատանքը:
Հայաստանի Ժուռնալիստների միությունը «Առավոտ» օրաթերթի դեմ ոտնձգությունը գնահատում է հենց այդ հարթությունում, որպես մամուլի, խոսքի ազատության դեմ իշխանության սանձազերծած արշավի մի մաս՝ կոչ անելով բոլոր լրատվամիջոցներին, լրագրողներին՝ անկախ իրենց քաղաքական նախապատվություններից ու հակասություններից, ցուցաբերել մասնագիտական համերաշխություն և միասնաբար աջակցել հայկական մամուլի ամենաերկարակյաց և ամենապրոֆեսիոնալ ներկայացուցիչներից մեկին՝ «Առավոտին»՝ այդ միասնական հետևողականությամբ ու պահանջատիրությամբ նպաստելով հանցագործության բացահայտմանը», - ասվում է Հայաստանի Ժուռնալիստների միության հայտարրաությունում: -