Եվրահանձնակատար. Ղարաբաղյան շփման գծում իրավիճակը շարունակում է մնալ չափազանց լարված

Արմինֆո. Ադրբեջանը կարեւոր գործընկեր է ԵՄ-ի համար, եւ Բրյուսելը շահագրգռված է շարունակել լավ համագործակցությունը, հատկապես, երբ խոսքը վերաբերում է էներգետիկային, բարեփոխումների ոլորտում համագործակցությանը, առեւտրին եւ ներդրումներին: Այդ մասին Եվրախորհրդարանում Ադրբեջան-ԵՄ հարաբերությունների շուրջ քննարկումների ժամանակ հայտարարել է հարևանության և ընդլայնման հարցերով հանձնակատար Օլիվեր Վարհեյը՝ բարձր ներկայացուցիչ/փոխնախագահ Ժոզեպ Բորելի անունից։

Այդ առումով՝ նա ընդգծել է, որ ԵՄ-ի եւ Ադրբեջանի միջեւ նոր համապարփակ համաձայնագրի շուրջ բանակցությունները շարունակվում են, եւ Բրյուսելը, նախկինի պես, հանձնառու է բանակցությունների շարունակմանը՝ դրանք շուտափույթ ավարտին հասցնելու նպատակով:

"Ինչպես նշում եք ձեր զեկույցում, Ադրբեջանում մարդու իրավունքների և օրինականության պահպանման հետ կապված իրավիճակը շարունակում է մնալ մտահոգիչ։ Դրանք ընկած են մեր հարաբերությունների հիմքում, ինչպես համատեղ համաձայնեցված է ԵՄ-ի և Ադրբեջանի միջև գործընկերության առաջնահերթություններում։ Մենք խորապես հավատում ենք, որ օրենքի գերակայությունը, մարդու իրավունքները և ժողովրդավարական ինստիտուտները անկախ, կայուն և բարգավաճ երկրի հիմքն են և կառուցողական գործարար միջավայրի պայման: Մենք ողջունում ենք Ադրբեջանի կողմից Մարդու իրավունքների եվրոպական կոնվենցիայի արձանագրության ստորագրումը, որն արգելում է մահապատիժը ցանկացած պարագայում", - ասել է Վարհեյը։

Միևնույն ժամանակ, եվրահանձնակատարը հավելել է, որ ԵՄ-ում ուշադիր հետևում են ԶԼՄ-ների մասին օրենքի կատարմանը և քաղաքական կուսակցությունների մասին նոր օրենքի ընդունմանը, իսկ Բաքվում իրենց ներկայացուցչության միջոցով հետևում են իրավապաշտպանների առանձին գործերին:

Նա նաև մատնանշել է էներգետիկ ոլորտում Ադրբեջանի հետ համագործակցության ակտիվացումը ։ Եւ կարեւորել է էներգետիկայի ոլորտում ռազմավարական գործընկերության մասին փոխըմբռնման հուշագիրը, որը կարեւոր է դեպի Եվրոպա էներգակիրների մատակարարումների դիվերսիֆիկացման ապահովման, Եվրոպային էներգիայի նոր հուսալի աղբյուրներով ապահովելու տեսանկյունից:

"Ռուսաստանի ներխուժումն Ուկրաինա մեզ ստիպեց զարգացնել և դիվերսիֆիկացնել Եվրոպայի և Ասիայի միջև առևտրային ուղիները և տրանսպորտային կապերը։ Ես համաձայն եմ, որ Ադրբեջանի հետ կապվածության ոլորտում մեր համագործակցությունը նույնպես ռազմավարական նշանակություն ունի ։ Այս համատեքստում մենք ողջունում ենք այն կարևոր օգնությունը, որն Ադրբեջանը ցուցաբերում Է Ուկրաինային", - ասել է Վարհեյը՝ հայտնելով Ադրբեջանում մինչև 2 մլրդ եվրո պետական և մասնավոր ներդրումներ ներգրավելու մտադրության մասին։

"ԵՄ-ն, առաջին հերթին, առաջնորդվում է կայուն, խաղաղ և բարգավաճ Հարավային Կովկասում ներդրում ունենալու ընդհանուր նպատակով։ Մենք պատրաստ ենք այսուհետ ևս աջակցել Ադրբեջանին ՝ լինի դա խաղաղության գործընթացին աջակցելու, թե հետագա մարդասիրական օգնության և ականազերծման օգնության տրամադրման միջոցով ։

ԵՄ-ն իր առաքելությունն է ծավալել Հայաստանում (EUMA) ՝ լարվածությունը նվազեցնելու և խաղաղության գործընթացին աջակցելու համար։ Սա կարեւոր քայլ է տարածաշրջանում կայունության ամրապնդման եւ ԵՄ դերի ամրապնդման համար։ Մենք, նախկինի պես, լիովին աջակցում ենք Ադրբեջանի եւ Հայաստանի ղեկավարների միջեւ երկխոսությանը խաղաղության գործընթացին վերաբերող բոլոր հարցերում, այդ թվում՝ ապագա խաղաղության պայմանագրի եւ սահմանների սահմանազատման շուրջ ՝ Եվրոպական խորհրդի նախագահ Շառլ Միշելի ջանքերի շնորհիվ", - ասել է նա։

Այս առումով՝ եվրահանձնակատարը կոչ է արել երկու երկրների առաջնորդներին օգտագործել պատմական հնարավորությունը այս հակամարտության վերջնական լուծման և բովանդակալից երկխոսությանը վերադառնալու համար, հավելելով, որ շատ կարևոր հարցեր հրատապ լուծում են պահանջում։

"Ինչպես ևս մեկ անգամ համոզվեցինք մարտի 6-ին, իրավիճակը շփման գծում շարունակում է մնալ շատ լարված։ Մենք ցավում ենք միջադեպերի համար, որոնց հետեւանքով զոհվել է առնվազն հինգ մարդ ։ Այս մահացու միջադեպի հանգամանքները պետք է մանրակրկիտ հետաքննվեն: Բոլոր կողմերը պետք է զսպվածություն ցուցաբերեն, որպեսզի կանխեն ցանկացած գործողություն, որը կարող է էլ ավելի խաթարել տարածաշրջանային կայունությունը եւ վտանգել խաղաղ գործընթացը", - ասել է Վարհեյը:

Քննարկումների արդյունքների վերաբերյալ իր եզրափակիչ խոսքում Եվրահանձնակատարը նշել է, որ քննարկումները վկայում են ԵՄ-ի եւ Ադրբեջանի միջեւ հարաբերությունների նկատմամբ անփոփոխ հետաքրքրության մասին: "Ես ցանկանում եմ ընդգծել այդ բանավեճերի կարեւոր եզրակացությունն այն մասին, որ ԵՄ-ն շարունակելու է ուշադիր հետեւել Ադրբեջանում մարդու իրավունքների հետ կապված իրավիճակին եւ օրենքի գերակայության պահպանմանը ։ Ես կարող եմ հավաստիացնել ձեզ, որ Ադրբեջանի հետ մեր ակտիվացած էներգետիկ համագործակցությունը չի զրոյացնում մարդու իրավունքների և օրենքի գերակայության պաշտպանությանն ուղղված մեր շարունակական ջանքերը Ադրբեջանի հետ մեր երկխոսությունում, և մենք շարունակելու ենք դա անել: Մենք կշարունակենք փոխգործակցությունը մեր ադրբեջանցի գործընկերների հետ ՝ խաղաղության գործընթացին վերաբերող բոլոր հարցերի շուրջ քննարկումներն առաջ տանելու համար", - եզրափակել է նա։