Հարությունյանը տեղի է տվել Բաքվի պահանջին. Ռուբեն Վարդանյանն ազատվել է Արցախի պետնախարարի պաշտոնից

Արմինֆո. Արցախի Հանրապետության նախագահ Արայիկ Հարությունյանի գլխավորությամբ փետրվարի 23-ին տեղի է ունեցել կառավարության նիստ:

Ինչպես հաղորդում է Արցախի նախագահի աշխատակազմի տեղեկատվության գլխավոր վարչությունը, երկրի ղեկավարը ներկայացրել է Ադրբեջանի կողմից Արցախի շրջափակման հետևանքով Հանրապետությունում ստեղծված ռազմաքաղաքական և սոցիալ-տնտեսական իրավիճակը, իշխանությունների կողմից ձեռնարկվող միջոցառումները` ծագող խնդիրները լուծելու ուղղությամբ: 

Կառավարության նիստում նախագահ Հարությունյանը հրապարակել է նաև Ռուբեն Վարդանյանին պետական նախարարի պաշտոնից ազատելու  մասին հրամանագիրը։ Նա բարձր է գնահատել Վարդանյանի ջանքերը թե՛ Արցախի մասին միջազգային իրազեկվածության բարձրացման և թե՛ շրջափակման ընթացքում ներքին բազմաթիվ հիմնախնդիրների լուծման ուղղությամբ:

«Այս ողջ ընթացքում ես և Ռուբեն Վարդանյանը եղել ենք միասին՝ ամենօրյա ռեժիմով հետևելով ինչպես Արցախում, այնպես էլ արտաքին աշխարհում տեղի ունեցող իրադարձություններին, զարգացումներին, մշտապես մտքեր ենք փոխանակել ստեղծված իրավիճակում լուծումների շուրջ: Ես շնորհակալ եմ պարոն Վարդանյանին այն բանի համար, որ ինչպես ընկերական, այնպես էլ գործընկերային հարաբերություններում նա մշտապես ձգտել է առավելագույն չափով ինձ հետ կիսել պատասխանատվությունը և ոչ թե սահմանադրական նորմերին հղում անելով՝ փորձել այն  բարդել ինձ վրա: Բայց մյուս կողմից նա գիտակցումով և ըմբռնումով էր մոտենում նաև Արցախում ստեղծված վիճակի ու հետագա բոլոր խնդիրների համար իմ անձնական պատասխանատվության ծավալին ու չափին»,- ընդգծել է երկրի ղեկավարը:

Արայիկ Հարությունյանը նշել է, որ պետական նախարարի պարտականությունները առաջարկել է ստանձնել Հանրապետության գլխավոր դատախազ Գուրգեն Ներսիսյանին՝ հաշվի առնելով նրա մասնագիտական ու մարդկային որակները, աշխատանքում ցուցաբերած պրոֆեսիոնալիզմը, արդարամտությունը, սկզբունքայնությունն ու պետականամետությունը: 

Նախագահը տեղեկացրել է, որ նոր պետական նախարարի համակարգման ոլորտում են լինելու բոլոր գործադիր մարմինները՝ բացառությամբ ուժային մարմինների և արտաքին գործերի նախարարության: 

Ինչպես ավելի վաղ գրել էր ԱրմԻնֆո-ն, Վարդանյանի պաշտոնանկությունն Ադրբեջանի և Թուրքիայի պահանջն էր։ Հայկական լրատվամիջոցները գրում էին, որ ՀՀ ԱԳ նախարար Արարատ Միրզոյանը Թուրքիա կատարած այցի շրջանակներում Անկարային խոստացել է հասնել Ռուբեն Վարդանյանի պաշտոնանկությանը։ Այսպիսով, կարելի է կարծել, որ Ադրբեջանի կողմից Արցախի վերջնական կլանման գործընթացը սկսված է, դրան խանգարող միակ անձը հեռացված է իշխանությունից։

Ուշագրավ է, որ դեռևս անցյալ տարվա դեկտեմբերին Արցախի նախագահի հետ փոխկապակցված տեղեկատվական ռեսուրսները հաղորդում էին, որ ԼՂՀ նախագահ Արայիկ Հարությունյանի և Ռուբեն Վարդանյանի միջև լարված հարաբերություններ են ձևավորվել։ Ավելին, Հարությունյանը Երեւանից ճնշման ներքո փորձել է Վարդանյանին հեռացնել զբաղեցրած պաշտոնից, սակայն այդ քայլից զերծ է մնացել հանրային ճնշման ներքո։ ՀՀ իշխանությունների դժգոհության առիթ են հանդիսացել ՀՀ գործող վարչապետի թիմի հասցեին Վարդանյանի հրապարակային հայտարարությունները։ Մասնավորապես, Վարդանյանը Հայաստանի իշխանություններին մեղադրել էր Լաչինի միջանցքի ապաշրջափակման գործում անբավարար ջանքերի համար։